Пятница, марта 29, 2024
Важное

Эрицятнень весероссиянь сёрмадстомантень кадови овсе аволь ламо шка. Сонзэ прявт эскельксэсь ушодови ожоковонь 15-це чистэ. Масторсонок свалшкань эрицятненень эряви максомс каршо вал 33 кевкстема лангс. Ютамс сонзэ мереви колмо лувга: кудов сы сёрмадстыця, тынсь мольтядо сёрмадстомань таркас эли топавтсынк тень «Госуслуги» порталонть вельде.


Эрицятнень весероссиянь сёрмадстоманть арсевсь ютавтомс 2020 иестэ, ансяк коронавирусонь орманть кувалма сон кандозель 2021 иень чадыковс, мейле – таштамковс, теде мейле Россиянь премьер-министрась Михаил Мишустин сёрмадстсь постановления од чиденть – ожоковонь 15-це чись.

2021 иень Эрицятнень весероссиянь сёрмадстоманть явовиксчикс карми се, эседенк мереви пачтямс интернет вельде. Госуслугань порталсо панжови «Ютамс эрицятнень сёрмадстома» социальной сервисэсь. Нама, эседеть пачтямодонть икеле тосо улезтядо сёрмадозь. Сёрмадстомань конёвонть мереви анокстамс эрьва мейсэ – смартфонсо, планшетсэ эли компьютерсэ. Порталось важоди чинь перть – сёрмадыцясь кочкасы сонензэ эрявикс шканть. «Госуслуги» порталсо сёрмадстоманть ютамс мереви ожоковонь 15-це чистэ саезь сундерьковонь 8-це чис. Ютамс сонзэ мереви эрьва косо – кудосо, поездсэ, важодема таркасо ды мик омбо масторсо улемстэяк. Прявт лопасо кочкатано «Ютамс эрицятнень сёрмадстоманть» ды макстано каршо валт кевкстематнень лангс. Теде мейле почтас эли мобильной телефонс сыть кудораськенть лангс QR-кодось ды эрьва эрицянть лангс цифрань кодось. Те кодось эряви сёрмадстыцянь ютавтыцянтень, кона домкасто весе вансы – илязт уле сынь кавксть Росстатонь базасо.

Нама, сёрмадстоманть туртов седе ламо пачтямотне пурнавить видьстэ кудова яказь. Кевкстнемань лопасонть (бюллетеньсэнть) кармить 33 кевкстемат, конатнень макссынзе сёрмадстыцясь. Эрьва кевкстеманть лангс каршо валт мереви максомс мелень коряс, бути арась меленк – илядо. Текенень, сёрмадстыцясь а карми вешеме пельденк кодаткак документт, кеми тынк ёвтамонтень. Ялатеке, инескеть, илядо манче. Эдь мейле Росстатонь пачтямотнень коряс тееви социальной лезксэнь максомань аравтлувось, тонавтневи масторонть демографиянь, социальной ды экономической лувось.

Эрьва сёрмадстыцянть карми улеме удостоверениязо, конась максови стационарной участкасонть. Истя жо сон карми содавомо оршамопелень коряс: фирменной символика марто куртка, шарф ды сумка. Сёрмадстыцянть арась правазо вешемс кедьстэнк паспорт эли лия документт. Истя жо эрьвантень мереви гайневтемс стационарной участкав ды кевкстемс сёрмадстыцядонть.

Бути арась меленк сёрмадстыцянть нолдамс кудов, мереви эстенк самс участкав эли МФЦ-в. Адрестнэ, косо мереви ютамс сёрмадстоманть, аравтовить официальной сайттнэсэ.

Эрьва сёрмадстыцянть мартонзо кармить колмо формань бланкт. Л формасо бланксонть тешкстазь 23 кевкстемат сетнень туртов, кить свалшкане эрить Россиясо: цёра-ава, иетне, кодамо тев топавты, кодат кельть соды ды седе тов. П формань бланксонть – 10 кевкстемат: ломаненть эрямо таркадонзо (кудодонзо), истя жо кодамо иестэ стявтозель кудось, мейстэ теезь, покшолмазо ды зяро комнатат эйсэнзэ... В формань бланкось алтави Россиясо нурька шкас эриця омбо масторонь ломантненень. Эйсэнзэ 7 кевкстемат: мезень кувалма сась Россияв ды зяро шкас карми эрямо тесэ…
Сёрмадстомадонть седе келейстэ мереви ловномс официальной сайтсэнть strana2020.ru.

Фототне саезь korschool.ruiz.ru интернет-сайттнэстэ.

Мельть-арсемат

* * *
Юрий Александрович Мишанин, МР-нь Общественной палатас совицясь, Эрзя-мокшонь раськень регионъютконь вейсэндявксонь прявтось:

– Масторонь историясо неть читнестэ ушодови Эрицятнень цифровой сёрмадстомась. Сонзэ ютавтомс анокстазь электронной анкетат, конатнень сёрмадстыцятне кармить тешкстамо планшеттнэсэ. Теде башка, граждантнэ каршо валтнэнь кармить ёвтамо дистанционна: порталтнэсэ ды «Госуслуги» мобильной приложениянть вельде эли молить МФЦ-нь сёрмадстомань участкас.
Юрий Александрович тешкстась, Мордовиянь весе эрицятненень эряви невтемс эсь прянть Весероссиянь эрицятнень сёрмадстомасонть. Эдь неть ванкшноматне кармить тевс нолдавомо федеральной центрасо финансонь кевкстематнень решамсто, мезесь ары юрокс Мордовиянь экономиканть виевгавтомсто.

– Минек республикасо эрить ламо раськеть, тень ловозь, те мероприятиясь минек туртов пек эрявикс тев. Россиянь финно-угратнень ютксто эрзятнеде ды мокшотнеде сехте ламо, минь финно-угрань вейсэндявксонь куншкакуро, – мерсь Юрий Александрович. – Неень шкане минь весе виенек путтано сенень, штобу эрьва эрицянтень толковамс сёрмадстоманть эрявиксчинзэ, конатнень ютксо эрзят ды мокшот, косо бу сынь авольть эря, минек республикасо эли сонзэ томбале.

Миненек а стувтома ундокстонок, раськенек койдест-кирдадост, покштядонок ды сырькайтнеде. Ды, нама, сеть таркатнеде, косо минь чачинек-касынек.
Кемтяно, те мероприятиясь Мордовиясо, кода свал, ютавтови парсте ды лезэвстэ.

Марина Николаевна ДЕВЯТОВА, «Эрзянь правда» газетань прявт редакторось:

– Вечкевикс ялгат! Вечкевикс эрзянь ломанть! Ожоковонь кеветееце чистэ ушодови Россиянть келес эрицятнень сёрмадстомась ды минек лавтов лангсо пек покш канст. Сёрмадстыцятне кармить кевкстнеме эйсэнек 33 кевкстемань коряс, ансяк сехте прявтокс кармить кавтотне: минек раськеденть ды кельденть. Ули мелем пшкадемс весе эрзятненень ды мокшотненень, кие лови прянзо эрзякс-мокшокс, мордвинэкс, эли сонзэ улить истят ундоксонзо, илядо визде теде ёвтамс видестэ, чарькодевиксстэ: мон мордвин-эрзя, мон мордовка-эрзя, эли бути а содатадо, эрзя тон эли мокшо, сестэ сёрмадт видьстэ – мордвин, а маняват. Те а карми ильведевксэкс. Те карми тынк раськенть, покштятнень-бабатнень туртов мельваномакс.
Эрзятне ды мокшотне эрить весе масторонть келес ды натой томбалеяк. Минек раськетнеде пек ламо Ульяновскоень, Нижней Новгородонь, Самарань, Пензань, Саратовань ёнкссо, Татарстансо, Башкортостансо ды лия покш оштнева. Косо ансяк арастяно… Ламот содыть эсь ундокстост, аштить тень кувалма каштанчисэ, улить ютксонок пек ламо содавикс ломантькак. Кой-кить жо ансяк марсесть васолдо эсь ундокстост. Ули мелем сыненст пшкадемс. Ялгат, бути тынк рунгова чуди эрзянь эли мокшонь верь, тееде эсь кочкамонк вельде паро тиринь раськенть туртов, максынк кисэнзэ вайгеленк, сёрмадстынк прянк мордвинэкс-эрзякс эли мордвинэкс-мокшокс. Тень теезь, тынь тейтядо од кеме сюлмо раськенк марто!

Ули мелем тешкстамс эштё вейке ёнксонть. Сёрмадстомась – те эдь аволь ансяк эсь раськеденть эли кельденть яволявтома, эйзэнзэ сюлмазь политикась. Весе верде арсематне-лездамотне – тиринь кельтнень ванстомадо, кемекстамодо, эрзянь ды мокшонь кельтнень тонавтнема книгань нолдамодо, кельтнень коряс мероприятиятнень ютавтомадо, гранттнэнь явомадо, лия ярмаконь максомадо – кармить аштеме сеньстэ, зняро эйстэнек ловить. Лисни, зняро эйстэнек (эрзятнеде ды мокшотнеде) улить, тень коряс, кода мерить, ломанекс путомо кармить. Секскак, те сёрмадстомасонть пек питней эрьва ломанесь. Содасынк сёрмадстомань яволявтоманть: «России важен каждый мордвин»? Россиянтень эряви эрьва эрзясь-мокшось, эштёяк минь эрявтано весе Мордовиянть туртов ды сеть регионтнэнь, косо эрить эрзятне ды мокшотне.

Чарькодтядо, кодашка канст каязь лангозонок: минек эйстэ ашти ламось – ванстомс эсь келенть, культуранть ды покштянок-бабанок койтнень-кирдатнень. Минек кедьсэ, арсезеведе, тиринь раськень уцяскась, келесь, сынст сыця шкаст. Кода мерсь вейке превей ломанесь: келесь – аволь ансяк кортамонь ёнкс, те раськень ойме, сонзэ обуцянь, лия ёнов а молемань невтема, раськень культурань генофонд. Ёми келесь, ёми раськеськак. Миненек эряви весенень кирдемс пряудемсэ те превей меленть-арсеманть. Кадык тынь а содасынк парсте келенть, кадык овсе а содасынк, ялатеке, бути сонзэ сёрмадсынк эсенк тиринь келекс, тынь макстадо минек эрзянь келентень покш лезкс, эдь сонензэ карми лездамо сонсь государствась а ёмамс, виензамс ды ванстовомс седе тов.

Миненек, эрзятненень ды мокшотненень, эряви ванстомс финнэнь-угрань сехте покш раськень лементь. Эдь минденек ютазь сёрмадстоматнесэ ульнесть малав миллион! Зяро ней эйстэнек кармить? Ансяк эсенек эйстэ ашти! Ды бути сон карми покшокс, миненек карми седеяк паро! Лисни, карми эрямо эрзянь раськесь ды тиринь эрзянь келесь!
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».