Четверг, декабря 02, 2021
Важное

Аволь умок Мордовия Республикань «Клуб активного долголетия» Сыре ломанень ассоциацияс совицятне пурнавкшность отчётонь-кочкамонь вейсэнь промксос. Седе, мезе теить ды кода шумбралгавтыть рунгост, весенень пачтясь «Клад» Ассоциациянь Президентэсь Галина Мареськина. 

Галина Анатольевна ледстнесь те вейсэндявксонть васенце эскелькстнэде, конат теезельть 2000 иетнень ушодовомсто. Виде, сестэ сыре ломанень вейсэндявксось вастневсь ламо стакачи марто: а косо ульнесь тенст пурнавомс, арасельть рунгонь шумбралгавтомань кедьёнкст. Иетнень ютазь ламось полавтовсь паро ёнов. Кода мерсь Галина Мареськина, неень шкане «Клад» Ассоциациянтень ули мезень коряс аштемс каштанчисэ. Сон аволь весть лиснесь изницякс РФ-нь Президентэнь грантонь коряс пелькстамотнесэ, конатнеде минь ёвтнинек ловныцятненень тиринь газетань лопатнесэ.
Текенень поладсынек, те вейсэндявксось сови аволь коммерческой организациятнень общероссийской реестрантень, конат теить лезэв тевть.

Тешкстасынек, Галина Анатольевна – «Клад» Ассоциациянть пурныцязо-теицязо ды ветясь эйсэнзэ комсь иень перть. А вана ней сайсь мель туемс оймсеме.
Ламо паро валт ды седейшкавань арсемат сонзэ лемс ёвтасть Мордовской республиканской военно-патриотической воспитаниянь коряс ветеранонь Весероссиянь общественной организациянь прявтонь полавтыцясь Михаил Китаев, Мордовия Республикасо «Трудовая доблесть России» ВОО-нь региононь отделениянь правлениянь председателесь Иван Дзюбак. Ламо иень перть парсте важодемань кисэ МР-нь Спортонь, од ломанень политикань ды туризмань министерстванть пельде Галина Мареськинанень максозель Благодарность Мордовия Республикасо спортонть ды физической культуранть виевгавтомасо покш путовксонть кисэ. Промксос сыцятне вейке мельсэ максызь вайгелест Галина Анатольевнанень «Почётный Президент Ассоциации» лементь максоманзо кисэ.
Промкссонть «Клад» Ассоциациянь Президентэкс вейке мельсэ кочказель Елена Геннадьевна Лезина, кие седе икеле топавтсь вице-президентэнь тевенть.

Изнясть сехте виевтне

Неть читнестэ «Клуб активного долголетия» вейсэндявксось ютавтсь пелькстамот укшномань коряс, конат алтавсть Сыре ломанень ковонтень. Те разнэ сыненст вейсэндявсть Мордовия Республикань Кочкуровань муниципальной райононь «Клад» Ассоциацияс совицятне. Пелькстамо пурнавозтненень седейшкавань вал марто пшкадсь «Клад» Ассоциациянь президентэсь Елена Лезина.

Аламо шкань перть ведьсэ виест варчамодо мейле, ушодовсть пелькстамотне. Сыненст эрявсь ютамс 25 метрань кувалмосо тарка. Аватнень ютксто сехте парт невтевксэнзэ Вера Саушкинань, омбоце таркас лиссь Елена Громова, колмоцес жо – Светлана Мясоутова. Цёратнень ютксо васенце тарканть саизе Кочкуровань райононь «Клуб активного долголетия» Ассоциацияс совицясь Дмитрий Зоткин, омбоценть – Валентин Лазарев (сонензэ 81 ие), колмоцекс финишентень сась Рашид Мухаметзянов. Изницятненень ды призэнь саицятненень максозельть питней казнеть ды медальть.

Те мероприятиясь эштё весть минек кемевти спортонть эрявиксчидензэ, куш кодамо шкасто шумбра лувонть эрямос совавтомадо. Ледстясынек, пелькстамось ютавтовсь Президентэнь грантонь фондонть лезксэнзэ вельде «Кладовая здоровья» проектэнть лувсо.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».