Саранскойсэ пенсионеркась кеминзе манчицятнень ды кадовсь эрямо таркавтомо, конань питнезэ 2 миллиондо ламо целковойть!

Августонь 10-це чистэ Саранск ошонь келес Россиянь УМВД-нь 1-це № ОП-нь дежурной частентень пшкадсь 72 иесэ тесэнь эрицясь. Авась ёвтнизе полицейскойтненень, июнень меельце читнестэ сонензэ гайневтсь а содавикс ломань, кона яволявтызе прянзо «ФСБ-нь важодицякс».

Манчицясь мерсь авантень, келя, квартиразо сонзэ согласиявтомо миезь недвижимостень агентствасо. Эрямо тарканзо велявтомга ды манчицятнень муемга, келя, эряви миемс квартиранть теке жо агентстванть вельде.

Асодавиксэнть валонзо топавтомга, пенсионеркась пшкадсь ёвтазь организациянтень ды теевтсь миемадо договор. Риелторось эрямо таркантень путсь питне 2,5 миллионт целковойть.

Июньстэ саезь август ковс квартиранть ваннызь зярыя рамсицят. Ансяк сыненст марявсь пек покш кисэнзэ питнесь.

Ды вана квартирась миезель 2 миллиондо 460 тёжат целковойде, конатнестэ 98 тёжатне тусть агентэнть важодеманзо кис.

Миемадо мейле авантень гайгстась секе жо «ФСБ-нь важодицясь», кона мерсь, келя, ярмактнень эрявить явомс 100 тёжат целковойга ды пачтямс банкоматонть пачк ёвтазь реквизиттнэва.

Весе те тевденть кармась содамо аванть урьвазо, кона эзь мере тензэ пачтямс ярмактнень. Теке жо чистэнть таго тензэ гайневтсь секе жо цёрась ды кевкстсь, кодамо тувталонь кувалма авась эзинзе пачтя ярмактнень.

Теде мейле манчицясь кармавтсь максомс наличной ярмактнень курьерэнтень, конась, келя, макссынзе сынст «манчицятнень» кедьстэ одов рамамонь кис. Теке марто цёраломанесь оймавтсь аванть, келя, илязо ризнэ, весе ярмактнень тензэ велявтсызь, зярдо «кундасызь манчицятнень».

Августонь 10-це чистэ вень куншкава авантень ардсь а содавикс ломань, конантень сон максынзе 2 миллионт 360 тёжат целковойтнень. Седе тов «ФСБ-нь важодицянтень» зярыяксть гайневтемадо мейле, авась чарькодсь, сонзэ манизь, ды пшкадсь правань ванстыця органтнэс.

Неень шкасто полициянь важодицятне ютавтыть тевтеемат, конат алтазь манчицятнень вешнемантень.