Четверг, декабря 08, 2022
Важное
Неть читнестэ Мордовия Республикань Пресс-центрасо ютавтовсь промкс, козо сакшность Саранскоень мэрэсь Игорь Асабин, сонзэ полавтыцятне ды ошонь районтнэнь прявттнэ. Вастовомань прявт кевкстемакс кармась Мордовиянь прявт ошонть вадрялгавтомась.

Игорь Асабин тешкстызе, республикань Прявтонть Артём Здуновонь Кучомасо башка мель явовсь Саранск ошсо мелявтовтыця кевкстематнень решамонтень.

«Региононь Прявтонть Мордовиянь Госсобраниянтень Кучомась местной самоуправлениянь органтнэнь туртов карми седе тов важодемань аравтлувокс. Минь поладсынек ули-паронь инвентаризациянть, тейтяно весементь муниципалитеттнэнь доходост кастомга. Прявт вановт ало – эрицятнень мелявксост. Секскак домка важодема поладови Региононь управлениянь центранть марто. Мордовиянь прявт ошсонть поладови китнень теемась ды витнемась, общественной таркатнень вадрялгавтомась. Покш ды эрявикс проектэкс карми ванськавтыця сооружениятнень витнемась. Тень коряс важодеманть арсеви ушодомс вейсэ ВЭБ.РФ ды Росводоканалонть марто 2024 иестэ», – тешкстызе мэрэсь.
Фонтантнэнь аштема таркась, конась сюлми Советской площаденть, А. С. Пушкин лемсэ культурань ды оймсемань парконть ды Саранка леенть чирева вадрялгавтозь территориянть, ловови эрицятнень ды ошонь инжетнень вечкевикс таркакс. Ламодояк ламо иетнень перть сон кармась ошонть мазылгавтыцякс. Покш мероприятиятнень шкасто тесэ ютавтневить декоративно-прикладной творчествань республикань ды лия региононь кедьчелькевтнень важодевксэст выставкат ды ярмункат. Ансяк неень шкане тесэнь фонтантнэяк ды ютамо таркаськак кольсть-каладсть ды овсе а ладить течинь вешематненень, секскак учить витнемань тевтнень. Тень кувалма, 2023 иестэ фонтантнэнь тарканть кемекстазь витнемс-вадрялгавтомс.
Проектно-сметной документациянь анокстамонть коряс пелькстамось уш ульнесь, концепциясь арсеви. Проектировщиктне кундасть тевс, ды маласо шкастонть минь несынек, кодамокс жо карми фонтантнэнь перька одкстомтозь таркась. Прявт тевесь – вадрялгавтомс те тарканть ды ванстомс сонзэ эрявиксчинть. Кода тешкстыть ошонь Администрациянь специалисттнэ, пек покш полавтомат учомс а эряви, ансяк од совавтомат кармить, конатне, учови, туить Саранскоень эрицятнень ды инжетнень мельс. Витнемань тевтне ушодовить 2023 иестэ.

Истя жо сы иестэ допрок витневи Тёжа иень площадесь. Кода тешкстызе Игорь Асабин, Мордовиянь Прявтось ёвтась мель ванстомс «Звезда Мордовии» фонтанонть, витнемс сонзэ ды ладямс важодеманзо. Ней арсеви площадень чачось. Тосо полавтсызь брусчатканть, ладить архитектурной теевкст, арсить оймсема тарка ды седе тов. Башка мель явови пижелгавтомантень. Арсеви, Тёжа иень площадесь налксезеви од тюссо.

«Тёжа иень площадесь ды «Звезда Мордовии» фонтанось кармасть Саранск ошонь визитной карточкакс. Тесэ вечкить оймсеме эйкакш марто семиятне, од ломантне ды седе сыретнеяк. Те иестэ туристической объектэнтень топодсть кемень иеть – аволь пек ламояк, ансяк течи ютамо таркатне тесэ весе каладсть, фонтанось важоди аволь весе вийсэнзэ, эйсэнзэ оборудованиясь каладома лангсо. Маласо шкастонть анокстави од таркань проектэсь. Витнемань-вадрялгавтомань тевтне ютавтовить частной инвестициятнень тевс нолдазь», – мерсь Игорь Асабин.

Эрицятнень сехте покш мелест, штобу «Звезда Мордовии» фонтанось важодевель весе вийсэ. Тень лангсо течи важодить ве ёндо сазь специалисттнэ, конатне теить те тарканть предпроектной ванноманть ды фонтанонь инженерной пелькстнэнь одкстомтоманть.
«Футболонь коряс масторлангонь чемпионатонть шкасто те площадесь топавтсь фан-зонань тевенть ды ульнесь ламо ломантнень пурнавома таркакс. Те удалась. Течи те а эряви. Карматано тееме весементь, штобу площадесь вельмевель, налксезевель од тюссо. Витнемадонть мейле тесэ карми неень шкантень ладиця тарка. Теевить зонат студенттнэнь, эйкакштнень ды сынст тетятнень-аватнень оймсеманть туртов», – пачтясь Саранск ошонь Администрациянь Перспективной касомань-кепедемань департаментэнь прявтонь полавтыцясь Майя Ликомаскина.

Теде башка, сы иестэ «Формирование комфортной городской среды» проектэнть лувсо Саранскойсэ вадрялгавтови Цаплинэнь бульварось – Светотехстроень эрицятнень вечкевикс таркась. Ледстясынек, тесэ ашти Ине Отечественной войнань «Мордовский колхозник» Т-34 танкось, сонсь бульварось лемдезь Советской Союзонь Героенть Павел Цаплинэнь лемсэ. Те территориянть эрицятне кочкизь сынсь.
«Тедедень кизна пурназельть вастовомат эрицятнень ды райононь активисттнэнь марто, конатне ёвтызь эсь мелест-арсемаст: эряви панжомс те тарканть исторической ёнксонзо – мекс тесэ ашти танкось ды кие истямось Цаплинэсь? Ёвтавсь мель оймсема таркань ды эйкакштнень туртов налксема таркань теемадо. Маласо шкастонть тагояк вастовтано эрицятнень марто ды кемекстасынек весе эрявикс таркатнень», – тешкстызе ошонь Пролетарской райононь прявтось Александр Кузьмин.

2023 иестэ поладови роботась «Формирование комфортной городской среды» федеральной проектэнть лувсо. Явовить 19 млн ламо целковойть, конатнень вельде витневить кеменде ламо кудотнень перька таркатне.

Вастовоманть лувсо Игорь Асабин ёвтнесь сень коряскак, кодамо важодема вети ошось азортомо кискатнень-псакатнень кевкстеманть решамга. Тень коряс эрсить ламо пшкадемат эрицятнень пельде.
«Азортомо ракшатнень коряс Саранск ошсо важодемась ветяви 498 № ФЗ федеральной закононть юрсо. «СпецСервис» предприятиясь шкастонзо топавты ракшатнень кундсемга яволявтоматнень, конатне сакшныть ЕДС-нть ды эрицятнень пельде, – ёвтни Игорь Асабин. – Ошонь таркатнень ванкшномась топавтови эрьва чистэ. Кудовтомо весе ракшатне пачтявить приютс, конась ашти Пролетарской куронь 121а кудосонть. Тосо сыненст тееви весе эрявиксэсь – вакцинациясь, стерилизациясь ды седе тов. Сынст лангс истя жо понгавтовить эрявикс биркат, конасонть ули весе эрявикс информациясь. Теде мейле сынст мекев нолдасызь икелень таркатнес. Маркировка марто ракшатне одс а кундавить».

Пресс-конференциясонть толковавсь общественной транспортонь коряс мелявксоськак. Башка мель явовсь 45-це, 32-це ды 15-це маршруткатненень, конатнень ардомань шканть коряс эрицятнень пек ламо кевкстемаст.

«Водительтнень асатоманть кувалма ламолгавтомс транспортонь единицатнень а кода, секскак автобустнэнь ютксо ардома шкась кувалгады. «Пси» шкасто (руз. в час пик) 15-це № ды 32-це № маршруттнэнь невтемаст аштить планонь коряс. 45-це № маршрутонтень аравтыть лия автобуст, конатне, арсематнень коряс, ламолгавтовить. Усксицятнень лемс кучозь сёрмат, косо ули кармавтома чокшне ланга топавтомс ардомань расписаниянть. Теде башка, маласо шкасто арсеви рамамс 35 од автобуст «ГЭТ» МП-нь автопарконтень. Те седе киртясы ардоматнень ютксо шканть», – тешкстызе Саранск ошонь Транспортной управлениянь прявтось Евгений Лещенко.

Истя жо тешкставсь, ваннови кевкстемась Пиже рощасо Эйкакшонь республиканской клинической больницянть видьс транспортонь нолдамонть коряс, ков течи а арды вейкеяк маршрут. Кода тешкставсь, стакачись сеньсэ, тосо арась автобустнэнь велявтомань ды аштемань туртов эрявикс тарка. Кевкстемась ваннови. Решамс сонзэ арсеви сы иестэ.

Пресс-конференциянть прядовомсто Игорь Асабин токизе сыця Од иень кевкстеманть. Мэрэнть валонзо коряс, те иестэ ошсонть кенярксчинь мероприятият ды салют а кармить. Теке марто ошонть мазылгавтсызь иллюминациясо, школатнесэ ды эйдень кужотнесэ ютавтовить кенярксчинь мероприятият. Башка мель явови кажовсто эриця, ламо эйкакшонь триця ды военнослужащейтнень семиятненень, конатне неень шкане специальной военной операциянь таркатнесэ.

Юлия Еремина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».