Неть читнестэ Саранскойсэ ютавтовсь «Лучший уполномоченный (доверенное лицо) по охране труда в Республике Мордовия» республикань XVI-це пелькстамонь финалось. Сонзэ арсицякс-ютавтыцякс, кода свал, ульнесть Мордовиянь Профсоюзтнэнь федерациясь ды республикань Эрицятнень социальной ванстомань, трудонь ды занятостень министерствась.
Пелькстыцятненень пшкадемстэ МР-нь Профсоюзтнэнь федерациянь председателень полавтыцясь Владимир Кисткин тешкстызе, профсоюзтнэнень максови башка ёнкс важодема таркасо зыянтомочинь лувонть ладямосо.
– Профсоюзтнэ аволь ансяк примить участия трудонь ванстомань коряс законтнэнь ды нормативной документтнэнь арсемасо, истя жо домкасто ваныть сынст топавтоманть мельга. Тень туртов профкомтнесэ теезь ды важоди трудонь ванстомань коряс уполномоченнойтнень институтось. Целанек минек республикасо эсь важодеманть топавтыть трудонь ванстомань коряс профсоюзонь 1180 доверенной ломанть. Ды течи тезэ пурнавсть сынст ютксто сехте вадрятне, – мерсь Владимир Кисткин.
Покш питне уполномоченнойтнень важодемантень макссь МР-нь Эрицятнень социальной ванстомань, трудонь ды занятостень министрань полавтыцясь Татьяна Биушкина. Ды ёвтась мель, сынст лезксэст вельде минек республикасо трудонь ванстомань ёнксонть коряс важодемась карми седе домкакс.
Пелькстамось ютавтовсь кавто этапсо. Васенцесь ульнесь заочной, сонзэ вельде невтевсь уполномоченнойтнень важодемась тедеде. Финалонь, очной, этапсонть жо участниктне сёрмадсть тест трудонь ванстомань ёнкссо законодательстванть содамга ды невтизь содамочист командатнень налксемань шкасто.
Тедеде пелькстамосонть эсь ёрокчист невтизь трудонь ванстомань коряс кемготово уполномоченнойтне. Ламот эйстэст эсь виест варчнизь икеле иетнестэ.
Пелькстамотнень коряс комиссиясь кочкась кавто изницят «Производственная сфера» ды «Непроизводственная сфера» номинациятнесэ. «Лучший уполномоченный (доверенное лицо) по охране труда среди организаций производственной сферы» номинациясонть изнясь Пётр Бочков – «Т Плюс» ПАО-нь «Мордовский» филиалонь важодема таркасо зыянтомочинь ванстомань коряс уполномоченноесь. Аволь производственной сферань организациятнень ютксо васенцекс кармась «Весна» ООО-нь уполномоченноесь Людмила Крашенинникова.
Теде башка, пелькстыцятнестэ колмотнень вадрят невтевксэст практической важодемасо ды трудонь ванстомань коряс законодательной, нормативной правовой акттнэнь содамочисэ. Истятнэстэ васенцекс кармась «Рузхиммаш» АО-нь трудонь ванстомань коряс уполномоченноесь Валентина Рузманова, омбоцекс – «Птицефабрика «Чамзинская» АО-нь специалистэсь Александр Базайкин, колмоцекс – Мордовия Республикасо «Ростелеком» ПАО-нь филиалонь трудонь ванстомань коряс уполномоченноесь Сергей Грызайкин.
Эзть кадово казневтеме лиятнеяк. Весенень максовсть свидетельстват ды ледстнемань казнеть.
Юлия Еремина