И. М. Яушев лемсэ Государственной музыкальной театрасо ютась торжественной промкс, конась алтазель Тейтерь-авань чинтень. Мельстуиця поздоровт Мордовиянь тейтертненень, аватненень, сырькайтненень ёвтась республикань Прявтось Артём Здунов. Сон тешкстась, Мартонь 8-це чись – вечкемань ды семиянь кенярксчи.
«Шкатне ней а шождат, ансяк тейтерь-аватне эрить ды вечкить. Течи тынь макстадо вийть минек цёратненень. Те пек лезды, – мерсь Артём Здунов. – Историясь невтизе, тейтерь-аватне маштыть важодеме куш кодамо сферасо ды, теке марто, улеме шкинемав ды ёроков ломанекс, трямо-тонавтомо эйкакшт, улемс мазыекс. Весе тень эйстэ ашти вандынь чись. Тынк изнявкстнэ лездыть эйкакштненень бажамс улемс алкуксонь ломанекс. Минь, цёратне, ловтано эсь прянок пек покшокс – ветятано изнямонтень иневенчтнень, ансяк зярдояк а арсетяно: аватневтеме мезеяк а улевель. Сэтьмечинть кази ансяк авась! Те чистэнть сюкпрянь валт ёвтавить тыненк, вечкевикс ават, ды арсема – цёратне свал улест вакссонк куш кодат тевтнесэ!»
Вастовоманть лувсо явшезельть покш казнеть, васняяк – Президентэнть пельде. РФ-нь Президентэнть Указонзо коряс «За заслуги перед Отечеством» II степенень орденэнь медальсэ казевсть Клюшникова Раиса Ильинична – Зубова-Полянань райононь Потьмань психоневрологической интернатонь (эйкакшонь отделения марто) пидицясь-паницясь ды Бикмурзина Сания Харисовна – трудонь ветеранось.
Здравоохранениянь ёнкссо вадрясто важодеманть кисэ Лука Крымскоень медальсэ казевсть Демидова Людмила Евгеньевна – республиканской инфекционной клинической больницянь врачось, Ежикова Валентина Петровна – медицинань лезксэнь эрязасто максомань станциянь фельдшерэсь. «Заслуженный работник социальной защиты населения Российской Федерации» почётной лемсэнть казевсь Ромодановань райононь «Доброе дело» АНО-нь отделэнь прявтось Наталья Петровна Рябинина. Мордовия Республикань Почётной грамотасо тешкставсь МР-ва ОНФ-нь исполкомонь СМИ-тнень марто важодемань коряс координаторось Лидия Семёновна Шумкина.
Меельцекс мельстуиця концерт невтсть Мордовиянь Филармониянь артисттнэ.