Мартонь 8-це чистэ тешкстави тундонь сехте валдо ды мазый кенярксчись – Тейтерь-авань чись. Кода а ёвтнемс минек превей, мазый, эрьва кодамо тевс чарькодиця, эрьва ков кенериця аватнеде?! Кенярксчиденть икеле вастневинек «Сабанчеевское» ООО-нь важодицятнень марто. Тесэ роботыть ламо ават. Эрьва чистэ сынь теить-топавтыть пек эрявикс тев, кода эсь предприятиянть ды республиканть, истя целанек масторонть виевгавтомга.
Мелень коряс кармась агрономонь тевесь
Ламонень маряви, те роботась седе лади ёроков, виев, кеме цёратненень. Теке марто, неень шкасто агрономонь профессиясь эрямонь тевекс кармась ламот тейтерь-аватнень туртовгак. Истятнэнь ютксо превей, эряза, мазый авась – «Сабанчеевское» ООО-нь прявт агрономось Вера Сергеевна Кочурина. Важоди уш зярыя иеть. Те шканть перть ютазь-ардозь тёжат вайгельбеть паксят, ульнесть важодемань стака чить ды апак удо веть. Ансяк эсь кочкавт тевденть эзь янксе зярдояк. 2008 иестэ Н. П. Огарёв лемсэ МГУ-нь Аграрной институтонть прядомадо мейле сась эрямо Отяжелень районов. Зярыя иеть важодсь райононь Администрациянь велень хозяйствань управлениясо. Ды ве шкасто лембе ды валдо кабинетэнть полавтызе калиця чи ало ды пулев паксясо важодеманть лангс.
– Истямо полавтомадонть эзинь янксе ве чияк, – тешксты Вера Кочурина. – Мон свал бажинь варчамс эсь содамочитнень тевсэ. Институтсо тонавтнинь технологонь тевентень, нама, те аволь агрономокс. Ялатеке специальносттне пек малавикст. Ды саезь содамочитне важодемасо пек лездыть. Зярдо лисят певтеме паксяс, лекстят оймес а кельгиця кошттонть, ванносыть эрязасто касыця сюротнень, конатнень вадря касомасонть тоньгак ули путовксот. Арази те а уцяска?
Содазь, малав эрьванть эрямосо улить истят ломанть, конат лездасть васенце эскелькстнэнь теемасо, кочказь тевенть тонавтнемасо. Вера Сергеевна истямокс лови «Сабанчеевское» ООО-нь икелень прявт агрономонть Ф. М. Константиновонь.
– Фёдор Михайлович ульнесь эсь тевень алкуксонь специалистэкс, – ледстни Вера Сергеевна. – Сон ней ютксонок арась. Мартонзо важодинь кавто иеть. Нама, аволь ламо, ансяк пельдензэ ламос тонадынь. Тонавтнинь весе паксятнень: косо седе ламо чачи сюро, ламбамо якстерькай. Кель-вал муинь важодицятнень марто. Минек тевсэнть те – сехте паро ёнкс.
Фермань важодицятне – хозяйстванть виезэ
«Сабанчеевское» велень хозяйствань предприятиянть мельспарозо – ловсонь од комплексэсь, кона ашти Аловелесэ. Сон стявтозель зярыя иеде икеле. Ды свалшкане невти вадря максовкст.
Тесэнь ловсонь-товарной ферманть прявтсо ашти Татьяна Анатольевна Турова. Фермасо авась роботы 23 иеть. Ушодокшнось ваз мельга якицякс, важодсь потявтыцякс ды 10 иеть – осеменаторокс. 2019 иестэ, содамочинзэ, ёрокчинзэ ды опытэнзэ лангс ванозь, Д. Н. Игушкин аравтызе фермань прявтокс.
– Течи минек тесэ трявить-кирдевить 835 сюракшов ракшат. Юткстост 386 – скалт, конатнень эйстэ потявтовицят 330, лиятне маласо шкастонть вазыицят, – ёвтни фермань прявтось Т. А. Турова. – Ловсонь комплекссэнть ули «Ёлочка» оборудованиянть марто «MIKLINE» потявтомань зал. Эйсэнзэ сеске потявтовить 24 скалт, ули ловсонь кельмевтемка. Ловсонть ильтятано «Сыродельный завод «Ичалковский» предприятияв.
Татьяна Анатольевнань валонзо коряс, чистэ потявтыть 6350 литрат ловсо, эрьва скалсто саить 17-19 килограммат.
Татьяна Турова тескень, Аловелень. Саранскоень кооперативной институтонть прядомадо мейле ошсо паро эрямонь вешнеме эзь карма, велявтсь тиринь велев. Уцяскась жо учось эйсэнзэ теске. Мирдензэ, Александр Сергеевич марто покш вечкемасо ды уцяскавсто эрить уш аволь вейке кементь иеть, трясть-кастсть вадря ды ёроков тейтерь, конась истя жо кочкизе велень хозяйствань ёнксонть. Эряви ёвтамс, Александр Сергеевич истя жо важоди хозяйствасонть. Сон – механизатор.
Аловелесэ скалонь комплекссэ осеменаторокс важоди Татьяна Ивановна Бухаркина. Сон чачсь-кассь Аловелесэ. Тесэ кемекстызе обуцянзо. Ней эри Сабанцелесэ. Колхозсо Татьяна Ивановна роботы уш колоньгемень иеть. Велень хозяйствасо важодемань кизэ ушодовсь полеводческой бригадасонть, мейле тердизь скалонь потявтыцякс ды уш кеменьшка иеть роботы осеменаторкс. Те тевенть сон пек парсте содасы.
– Нама, од тевенть свал ушодомс а шожда. Покш сюкпря хозяйствань важодицятненень, Татьяна Анатольевнанень, весемес тонавтымизь. Истя жо ульнинь осеменаторонь курсасо, конатнесэ кастынь те тевенть коряс содамочим. Сынь ютавтозельть Ромодановань райононь Малые Березники велень тонавтнемань центрасонть, – ёвтни Татьяна Ивановна. – Тосо тенек ловность лекцият, ёвтнесть ракшань искусственной осеменениядо. Курсатне мольсть колмо ковт. Сынь ютавтозельть МР-нь Велень хозяйствань ды продовольствиянь министерстванть ушодксонзо коряс.
– Татьяна Ивановна монь кеме нежем, – тешкстась ракшань комплексэнь прявтось Т. А. Турова. – Минек комплекссэнть ракшатне ламолгадыть ды теньсэ, нама, покш таликазо Т. И. Бухаркинань.
Ветеринарной врачокс фермасонть роботы Алевтина Константиновна Федулова. Те тевсэнть авась уш 15 иеть. «Сабанчеевское» ООО-со жо важоди 30 иень перть. Кода лиятнеяк, ульнесь скалонь потявтыцякс, зярс-бути роботась учётчицакс. Мейле аравтызь ветврачокс. Теньс аванть ульнесть содамочинзэ. Школадо мейле прядызе Н. П. Огарёв лемсэ МГУ-нь Аграрной институтонть «Ветеринария» специальностенть коряс.
Алевтина Константиновна ломанесь хозяйствасонть эрявикс. Сонзэ эйстэ ашти ракшатнень шумбрачись ды ловсонь ламочись.
– Мон пштистэ ванан скалтнэнь-вазтнэнь эрямост-аштемаст мельга. Шкастонзо ютавтан вакцинациянть ды профилактикань весе мероприятиятнень. Эдь монь ды весе лиятнень важодеманть эйстэ ламосо ашти предприятиянть вандынь чизэ, – кемексты Алевтина Федулова.
Хозяйствасонть улемстэ вастовинек прявтонть кеме нежензэ, конторасо важодиця аватнень марто. Неть: бухгалтертнэ, кассиртнэ, экономисттнэ. Сынст тынь несынк седе вере минек фотографонть Эдуард Ретунскиень фототнесэ.
Юлия Еремина
– Мельвановикс ават! Ёвтан тенк седейшкавань поздоровт кенярксчинть кувалма. Весенень арсян кеме шумбрачи, оймень вийть ды паро эрямо! Весе содыть, авась кази эрямо, кази лембечи. Тынь пештятадо минек эрямонть мазычиде, макстадо вийть од тевтнень теемантень. Покш сюкпря тенк эсь тевенть алкуксокс топавтоманть кисэ! Эйстэнк ашти кудосо сэтьмечись, тынк кедьсэ – семиянь лембесь-валдось. Седейшкава арсян тенк, штобу вечкемась ды кемевиксчись, мелень явомась свал улевельть маласонк. Эйкакшонк касост шумбракс, превеекс, кенярдовтовольть тынк эсест изнявкссост. Уледе уцяскавокс! А минь, цёратне, путсынек весе виенек тень топавтомга.
Д. Н. Игушкин,
«Сабанчеевское» ООО-нь прявт
Фотосо: Конторасо важодицятне (керш ёндо витев): В. В. Горбунова, Т. Н. Козина, Н. В. Калинина,
Л. И. Кузоваткина, А. П. Виряскина, Т. А. Иневаткина, В. С. Кочурина (прявт агроном);
Фермань важодицятне А. К. Федулова, Т. А. Турова, Т. И. Бухаркина