МР-нь Пресс-центрасо ютась вастовома, косо пачтявсть сексень призывной кампаниянь ютавтомань цетамотне, кортавсь военной службав анокстамонть ды республикасо 2026 иень призывенть коряс. Промксонть ветясь МР-нь Военной комиссарось полковникесь Николай Видяйкин.
2025 иень октябрясто саезь декабряс мольсь сексень военной службас тердемань кампаниясь. Центральной военной округонь штабонь вешематне весе топавтозь. РФ-нь Вооруженной Вийтнес ды воинской формированиятнес Мордовиясто кучозельть малав 500 ломанть. Весенень макссть форма, оршамопельть, нессерт, банконь ды электронной картат.
– «О воинской обязанности и военной службе» Федеральной законсо полавтоматнень коряс, ней военной службав тердемась моли иень перть – январень 1-це чистэ саезь декабрянь 31-це чис. Иень перть ютавтовить медицинской ванкшномат, профессиональной психологичской кочкамот. Сынст коряс призывной комиссиясь максы отсрочка эли жо евты военной службав саемадо.
Военной службав саемань шкась эзь полавтово. Истя жо карми иезэнзэ кавксть: апрелень 1-це чистэ саезь июлень 15-це чис ды октябрянь 1-це чистэ саезь декабрянь 31-це чис. Служамонь шкась – 12 ковт. Тундонь кампаниясто арсеви саемс военной службав республикастонок малав 1500 ломанть. Военной службав саезетне а кучовить специальной военной операциянь таркатнес.
Весе призывниктне кучовить военной службань ютамо Вооруженной Вийтнень, эрьва кодамо войскатнень воинской часттнень свалшкань дислокациятнес, конат аштить Россиянь регионтнэсэ. ДНР-нь, ЛНР-нь енкстнэс, Херсонской ды Запорожской областев а саевить, – пачтясь военной комиссарось.
Призывниктнень тердемга тевс нолдыть электронной повесткат. Бути ломанесь а сы 20 чинь перть, корязонзо кармить ограничительной мерат. Электронной повесткань кучомадонть пачтяви Госуслугань порталонь личной кабинетсэяк.
Апрелень 10-це чистэ саезь республикань военной комиссариатсо карми важодеме «пси линия» призывной кампаниянь кевкстематнень коряс (8342) 38-55-14.