Вторник, мая 21, 2024
Важное

Репортаж «Агропромсервис» ООО-нь паксятнестэ

 

Республикань велень хозяйствань предприятиятнесэ молить пси шкат – аграрийтне топавтыть видемань тевтнень. Те иестэ республиканть келес сюронь культуратнень алов явозь 763 000 гектарт. Региононь предприятиятнень ули весе эрявиксэсь, штобу роботатнень прядомс шкастонзо ды агротехнологиятнень топавтозь.

Ютазь иенть коряс тедеде видемань модатне ламолгавтозь 3,7 тёжат гектарс. Седе покш пельксэнть арсеви видемс ней, тунда. Те малав 518000 гектарт яровой сюрот: товзюро, шуж, пинеме, кукуруза, суро, ликша. Ды сюрот-бобат – кснав ды чичавка. Истя жо кармить видеме-кастомо 111 тёжа гектарт масличной ды 25 000 гектарт технической культурат.

Озимой сюротнеде Мордовиясо видезь 156 000 гектарт.

Тундонь тевтне весе вийсэ молить Ицялонь райононь «Агропромсервис» ООО-сояк.

Кода ёвтнесь велень хозяйствань предприятиянь прявтось Владимир Ильич Нужнов, те иестэ сюротнень алов явозь малав 6300 гектарт модат. Истя, озимой товзюродонть видезь 1400 гектарт, яровой сюротнеде – 2158 гектарт. Тень ютксо, 650 гектарт – яровой товзюро, 700 гектарт – шуж, 230 гектарт – сюрокс кукуруза, 300 гектарт – кснав, 78 гектарт – пинеме. 239 гектарт хозяйствасонть максозь силосокс кукурузанть алов. Ламбамо якстерькайденть те иестэ видеви 1951 гектар. Истя жо 188 гектарт видевить веиень тикшеть, теде икеле видезь ламо иенсетнеде – 360 гектарт. Те иестэ арсеви видемс соя. Сонзэ алов явозь 200 гектарт.

Тедеде минь васенцеде карматано видеме соя. Экономиканть ёндо ваннозь, те культурась седе выгодной сюронть коряс. Целанек жо, бути ванномс ютазь иень невтевкстнэнь, сехте рентабельной лиссь ламбамо якстерькаесь, – тешксты Владимир Ильич.

Кода уш тешкстынек, «Агропромсервисэнь» паксятнесэ сёксня видезельть малав 2 тёжат гектарт озимой товзюро. Ней неть паксятнесэ видьметнень гербицидсэ валномаськак уш теезь. 

Видьмекстнэнь уличинть коряс кортамсто Владимир Ильич тешкстызе, тесэ кодаткак мелявкст арасть.

Сортонь одкстомтоманть туртов минь эрьва ие раматано элитной видьметь кода озимой, истя яровой культуратнень. Видтяно зярыя кементь гектарт, весе паксятнень рамазь видьмесэ а видьсыть, те питней. А уш касозенть эйстэ эсенек туртов тейтяно васенце репродукциянь видьметь, – мерсь Владимир Ильич. – Течи эряви роботамс сюронть вадрячинзэ кастоманть лангсо, штобу сон улевель аволь ансяк ламо, истя жо паро. Ютаволь аволь ансяк ракшатнень андоманть туртов, почтонь теемантеньгак. Теке марто те питнентькак седе кастсы, истямо сюронть рамицянзояк седе ламо. 

Велень хозяйствань техникань коряскак предприятиясонть мелявкст арасть. Сон весе вадря, ламо мезе рамазь меельце иетнестэ. Трактортнэнь-машинатнень ды эрявикс агрегаттнэнь одкстомтоманть-полавтоманть мельга тесэ ваныть пштистэ. Неень шкане ули ламо вадря техника, конась аволь ансяк важодеманть шождалгавты, истя жо урожайностенть кастомасояк лезды. 

Хозяйствасонть тевтне аштить а беряньстэ. Важодемась моли кемекстазь аравтомань коряс. Ломантне парсте содыть, тундонь чись ие анды, – тешксты Владимир Нужнов.  

Эряви ёвтамс, кода республикань ламот лия предприятиятне, «Агропромсервис» ООО-сь покш лезкс максы СВО-нтень. Аволь умок цёратненень кучозель УАЗ автомашина. Истямо транспорт максови уш омбоцеде. Свалшкане пурныть-кучнить гуманитарной лезкс. Хозяйствань весе важодицятне те тевенть кирдить ды а аштить ве ёно.

Лезксэнть кисэ аволь умок цёратне кучсть тенек сюкпрянь валт ды казнекс Россиянь флагонть, – тешксты Владимир Ильич. – Минек тосо службанть кандыть эсь предприятиянь цёратнеяк. Мобилизациянть шкасто саевсть ниле ломанть. Минь кирдтяно мартост сюлмот, лездатано мейсэ улить виенек. А кадтано семиясткак. Бути эряви тенст кодамояк лезкс, весементь тейтяно.

Неень шкане «Агропромсервис» предприятиясонть роботыть 130 ломанть. Весе сынь важодемантень алтасть аволь вейке ие, секскак эсь тевенть содасызь ды топавтыть сонзэ парсте. Весень сынст ули мезень кисэ шнамс, те неяви важодемань невтевкстнэнь коряс.

Зярдо содавтынек «Агропромсервис» ООО-нть, сюротне те шкантень малав уш весе видезельть, кадовкшность соясь ды кукурузась. Истя жо мольсь ламбамо якстерькаень видемась. Понгинек самай се паксянтень, конась явозь якстерькаень сортучастканть алов. Лиякс меремс, тесэ видевить ламбамо якстерькаень эрьва кодамо сортонь видьметь ды мейле ваннови, конась седе лади минек ёнкссонть кастоманть туртов. Весе важодемась ветяви «Ромодановосахар» ООО-нть ды видьмень теиця предприятиятнень вановтост ало. Роботанть жо теить «Агропромсервисэнь» ёроков механизатортнэ.

Андрей Николаевич Дупленков «Агропромсервис» ООО-со роботы механизаторокс-трактористэкс вана уш кемголмово иеть. Весе те шканть перть тевтнень топавты тракторонь руль экшсэ. Андрей Николаевичень чачома-касома тарказо – Ицялонь Оброчное велесь. Школанть прядомадо мейле тонавтнесь Саранск ошонь 10-це № СПТУ-со, косо максозель тензэ механизаторонь профессиясь. Училищанть прядомадо мейле важодемань кинзэ ушодызе эсь райононь колхозсо. Андрей Николаевич – вете эйкакшонь тетя. Сонзэ кавто тейтерьканзо ды колмо цёранзо.

Механизаторось свал тевсэ, кизэнек-теленек. Тундось, кода содатано, велень хозяйствань весе важодицятнень туртов пси шка, трактористтнэнь туртов жо седеяк. Андрей Дупленков ёроков куш мейсэ. Сон модатненьгак соки-изы, видемасояк важоди. Неть тевтне прядовить, вант, тикшетнень анокстамось, сюротнень нуемась ушодови. Сёксня кенери ламбамо якстерькаесь, сонзэ урядама. Зярдо жо паксятне чамить, тагояк ушодовить видемантень анокстамот.

Тельня механизатортнэнь учить лия эрявикс тевть, эряви витнемс-анокстамс эсь техниканть, конавтомонть минь ковгак, – корты Андрей Николаевич. – Техникась минек андыцянок. Ды штобу тракторось эли машинась вадрясто ды кувать важодевельть, сыненст эряви явомс башка мель.

Хозяйствань эштё вейке механизаторось – Сергей Владимирович Михеев. Цёрась истя жо тескень, Оброчное велень. Школадо мейле прядызе Кемлянь Аграрной колледженть, косо тензэ максовсь механизаторонь специальностесь. Те ёнксонть кочкизе а стяко, Сергей Владимирович весе эйкакш шканзо ютавтызе эсь Ицялонь райононь паксятнесэ – тетязо эрямонзо перть важодсь трактористэкс ды те тевентень тонавтызе цёранзояк.  

Армиясо службанть ютамодо мейле Сергей Михеев сась «Агропромсервис» ООО-в. Те ульнесь 2010 иестэ. Сеске ушодсь трактористэкс. Важодемань весе те шканть перть пурнась вадря опыт ды ней иенть перть эрьва кодамо техникань руль экшс озакшны. Видемасто роботы «Беларус» тракторсо, тикшетнень ледема шкасто – «Мак Дон» комбайнасонть, сюротнень нуемань шкастонть – комбайнасо, сёксня модатнень сокамонь тевсэнть озы «Джон Дир» седе виев тракторонть руль экшс. Истя жо роботы неть тевтнесэ нолдавиця ламот агрегаттнэнь марто. Тельня Сергей Михеев роботы фермасо – анды ракшатнень, кепси-ускси сюронть.

Кода нетяно, «Агропромсервис» ООО-со важодить эсь тевень вечкиця ломанть, конатненень виень коряс куш кодамо робота. А зярдо хозяйстванть прявтсо алкуксонь азор, весемесь топавтовикс.

Юлия Еремина

Фототне

Эдуард Ретунскиень

 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».