Вторник, мая 21, 2024
Важное

Те иень тунда А. С. Пушкин лемсэ парксо улемстэ теевинь содавиксэкс Синюковтнень ламо эйкакшонь триця семиянть марто. Самай те шкастонть парконть куншка куросонть яволявтозельть цётамотне «Пернатый квартал» республиканской конкурсонтень. Тешкстаса, сон алтазель нармунтнень ванстомань кенярксчинтень, конась Мордовиясо эрьва иестэ тешкстави келейстэ. Ледстяса, те паро тевентень республикасонок ушодкс тейсь МР-нь Госсобраниясь, седе тов тенст вейсэндявсть «Пиже мир» ДЭО-сь (Детская экологическая организация) ды «Известия Мордовии» газетась.



«Национальный колорит» номинациясо изницядонть

Кенярксчинть ушодовомадо икеле, варштавксом каявсь письмаронь кудыненть лангс, конась лиятнень ёнов а молицяль, мазыель ды покшоль. Маласонзо аштесь а покшке цёрыне, конась эсь малавиксэнзэ марто теизе нармунтнень туртов те эрямо тарканть. Теевинек содавиксэкс. Те ульнесь Рузаевкань средней школань начальной классонь прядыцясь Матвей Синюков. Мельспарозонок, цёрынесь апак визде кармась ёвтнеме, кода кувать арсесь, кодамо тюссо артомс нармунень кудыненть. Седе тов сазоронзо марто прасть вемельс, тевс нолдамс валдо тюстнэнь. Кадык нармунтне сонзэ редясызь ве ёндояк, штобу телень якшамо читнестэ улевель тенст ков совамс ярсамо ды даволонь читнестэ варматнеде кекшеме.
Мейле ушодовсь цётамотнень яволявтомась, казнетнень явшемась. Содавиксэнек Матвей Синюков лиссь изницякс «Национальный колорит» номинациясонть. Теде мейле цёрынесь ветимизь ды теимизь содавиксэкс аванзо Маргарита Алексеевна марто. Сонзэ пельде карминек содамо, Матвей касы ламо эйкакшонь триця семиясо. Школасо сон тонавтни ансяк «ветес», вечксы спортонть, машты парсте укшномо.

Эрьва эйкакшось ёроков

Покш сазоронзо, Вероникань, сонензэ кавксо иеть, школасо тонавтнемадо башка, эштё пек ламо эрьва кодат тевензэ. Сон аволь васенце ие яки «СШ «Академия И. Винер по художественной гимнастике» Мордовия Республикань государственной дополнительной образованиянь бюджетной учрежденияв. Эштё пек вечки артомо ды морамо. Сеедьстэ невтни ёрокчинзэ Рузаевкань муниципальной райононь ды республикань конкурстнэсэ.

Синюковтнень семиясо сехте вишкине эйкакшонтень, Ариананень, моли нилеце ие. Сон эрьва мейсэ бажи улемс сазоронзо ды лелянзо кондямокс. Нейке уш бажи невтемс ёрокчинзэ художественной гимнастикань коряс, сазоронзо ладсо вечки артомо ды морамо.
Тоско, А. С. Пушкин лемсэ парксонть, теевинек содавиксэкс те семиянть покш цёраст марто. Седе марязь, Рузаевка ошонь 4№ лицеень 9-це классонь 16 иесэ парсте тонавтницясь юткошкасто аволь ансяк эрьва тевсэ лезды тетянзо-аванзо туртов, эштё кенери спортсояк невтнеме ёрокчинзэ, пек кенярдынек семиянть кисэ. Сон машты парсте укшномо, тонавтнемань таркасо сови эковолонтёронь группас, вечксынзе химия ды биология предметтнэнь. Теде башка, домкасто тонавтни японской ды французонь кельтнень. Ютубсо ули эсензэ каналозо, конань сонсь вети.
Вана истят ёроков эйкакштнеде марязь, сась шка теемс содавиксэкс ловныцятнень, кить жо сынст тетяст-аваст.

Эрьвась эстензэ кочки вечкевикс тев

– Мон чачинь Рузаевка ошсо, тетянь ёндо раськетне саить ушодкс Пензань областень Исса посёлкасто, – ушодсь ёвтнеме Маргарита Синюкова. – Кода тетянь, Алексей Фёдоровичень, истя жо авань, Елена Борисовнань, вишка шкаст ютась ламо эйкакшонь триця семиясо. Тетям умок уш кулось, авам эри маласонок, сон эрьва тевсэ тенек лезды.

Кевкстеманок лангс: кинь ёнов седе пек молить ёроков эйкакшост, Маргарита Алексеевна мерсь: – Минь сынст мезеньгак тееме вийсэ а кармавттано. Койсэнек, эрьвась кадык сонсь кочки эстензэ ки, вечкевикс тев. А сёпса, школасо тонавтнемадо башка, сисем иеть якинь Рузаевкань искусствань школав, якстере диплом марто прядыя фортепиано отделениянть. Кода икеле, истя нейгак вечкан артомо, морамо. А вана неень шкасто тень теян вейсэ эйкакштнень марто, – мизолдозь мерсь ламо эйкакшонь триця авась.

Сынь учить эрямонь од тарка

Школанть прядомадо мейле Маргарита Синюкованень а стака ульнесь теевемс Рузаевкань Машиностроениянь институтонь студентэкс, тонавтнеськак тосо парсте, ансяк меельце курссо чарькодсь, те аволь сонзэ тевесь. Седе тов тонавтнеманзо поладызе Самарань Чугункань кинь институтсо. Теде мейле ламо иеть важодсь проводницакс. Те профессиясь мелезэнзэ туекшнесь пек, васняяк, се тувталонть кувалма, што савсь тензэ мазый од таркат неемс, ламо ломань марто содавиксэкс теевемс.

Проводникень тевесь куш а шождаль, ялатеке вечкевсь тензэ. Эрямосонок лиясто аволь весемесь ашти минек эйстэ, кинень косо ды зярдо улема, нать, ансяк Вере Пазось соды. Истя лиссь Маргарита Синюковань эрямосояк, проводникень тевенть савсь полавтомс «Рузхиммаш» заводсо важодеманть лангс. Самай тосо 2012 иестэ теевсь содавиксэкс Алексей Синюков марто, сон тосо топавтсь слесарень тевенть. Одтнэ а кувать вастневсть, пельиень ютазь венчасть-урьвакстсть. Васня эрясть Маргаритань аванзо кедьсэ, шкань ютазь тусть сиведезь эрямо таркав. Тесэ мельга-мельцек чачсть эйкакштне, колмоце ды нилеце эйкакштнень чачомадост мейле региональной авань капиталонть вельде рамасть эстест эрямо тарка. Куш ниле эйкакшонь триця семиянтень сон пек вишкине, ялатеке од семиясь а ёмавты кемеманзо очередень коряс седе покш эрямо таркань максомга.

Се маней чистэнть парксо улемстэ, эзинь кирдеве, кевкстия Маргарита Алексеевнань: кода сеедьстэ те мазый таркантень эйкакштнень марто сынь сакшныть оймсеме, юткошкаст ютавтомо?
– Кода, эно, эдь эйкакштнень свал ули мелест ванномс мазый таркатнень, оймсемс мелень коряс. Тей сеедьстэ сакшнотано, – мерсь Маргарита Синюкова. – Эдь Вероникань эрьва недля усксетяно спортонь школав.

Ансяк кортамодонок мейле карминь содамо – те семиянть аволь ансяк эрямо таркаст вишкине, транспортосткак арась… Ули покш кемема, муевить паро ломанть ды лездыть ламо эйкакшонь триця семиянтень, ёроков эйкакштнень кастыцятненень. Эдь сынь минек вандынь чинек, сынь минек кемеманок!

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».