Эрьва ие октябрянь меельце недлячистэнть минек масторонь водительтне тешкстыть эсь профессиональной кенярксчист – Автомобильной транспортонь важодицянь чинть. Те кенярксчись алкуксонь водительтнень-профессионалтнэнь, конатнень туртов эрямось – а прядовикс ки ды ланганзо ардозь сядот тёжат вайгельбеть. Миллионт фурат, трейлерт, автобуст ды эрьва кодамо спецтранспорт чить ды веть, пертьпельксэнь куш кодамо шкасто эвтить минек масторонь трассатнева.

Ды эрьва истямо транспортонть руль экшсэ – алкуксонь «спец», кинь туртов водителень профессиясь – эрямонь смусть. Истят профессионалт неень шкане важодить Саранск ошонь округонь «СпецСервис» муниципальной бюджетной учреждениясонть. Самай сынст вановт ало аштияк минек ошонть ваньксчизэ ды мазычизэ.

«СпецСервис» предприятиянть прявт тевезэ – ошонь куротнень, китнень-янтнэнь урядамось ды ваньксчисэ кирдемась. Тельня – те транспортонь лотксема таркатнестэ, китнень, ютамо таркатнень лангсто, площадтнестэ ловонь урядамось, салсо-чуварсо сынст почодомась. Тундонь-кизэнь шкастояк тевтнеде аволь седе аламо. Ды те весемесь кодаяк а топавтови специальной машинатнесэ важодиця водительтневтеме.

Зярыя кементь единицат техника эрьва чистэ ванськавтыть Саранск ошонь китнень ды ялго ютамо таркатнень. Предприятиянь водительтне тевень содазь ды вадрясто топавтыть эсь важодеманть. Весе сынь алкуксонь профессионалт, конатнень ютксо аволь аламо важодемань династият. Тесэ роботыть кудораськенек. Течи минь тынк содавттадызь тетят-цёрат Разновтнень ды Лытыревтнень марто, конатне эсь эрямонть сюлмизь водителень профессиянть марто.
Юрий Борисович Разнов Саранск ошонь округонь «СпецСервис» МБУ-со важоди водителекс. Сась тей аволь умок, кавто иеде икеле. Сонзэ мельга кемекстазь КамАЗ автомашинась, конанть юрсо ули кран-манипулятор. Сонсь цёрась Нижегородской областень, 35 иеде икеле сась Мордовияв ды кадовсь теске.

Средней школанть прядомадо мейле ульнесь армиясо, службанть ютась Байконурсо, старшей механикель. Армиясто велявтозь, цёрась сась Саранскоев, вешнесь тесэ важодема тарка. Трудовой кинзэ ушодызе бетононь теемань заводсо. Васняяк ульнесь бетонщикекс, зярс-бути трактористэкс, мейле роботась водителекс. Ды вана уш колоньгеменде ламо иеть сон те тевсэнть.
Юрий Борисович а стяко кочкизе водителень профессиянть. Сон уш вишкинестэ содылизе техниканть. Тетязо весе эрямонзо перть роботась эсест велень колхозсо, техниканть вечкеме тонавтынзе цёранзояк. Секскак, школанть прядозь, зярс учось армияв повестканть, Юрий Разнов истя жо роботась колхозсо трактористэкс.
Ю. Б. Разновнень «СпецСервиссэ» важодемась вечкеви. Техниказо од, вадря. Сон топавты аволь ансяк водителень, истя жо крановщикень тевенть, эдь манипуляторонть васень тевезэ – сталмотнень кепсемась-валгстомась.

Теске жо предприятиясонть Юрий Борисовичень истя жо водителекс роботы цёразо – Александр Юрьевич. Сон важоди МАЗ автомашинасонть. Александр Разнов предприятиянть марто сюлмавсь малав кавто иеде икеле. Сась тей сеске тетянзо мельга.
Водителень тевенть марто Александр сюлмавозь эйкакш шкасто саезь. Покш сюкпря тетянстэнь ды покштянстэнь.

– Мон уш вишкинестэ саезь содылинь, мейсэ «лексить» трактортнэ-машинатне. Покштям весе эрямонзо перть ульнесь трактористэкс, тетям истя жо свал тракторонь-машинань руль экшсэ. Секс вишкинестэ саезь кодамояк лия профессиядо эзинь арсеяк, – корты Александр Разнов. – Руль экшс васенцеде озынь 7 иесэ. Тетянь автомобильсэ ардтнинь веле юткова. Нейгак ледстнян, те ульнесь сеть шкатнестэ сехте содавикс машинась – «шестёркась».

Школадо мейле цёрась ульнесь армиясо, служась Чувашия Республикань Чебоксары ошсо автомобильной войскасо ды самай тосо ушодынзеяк васенце эскелькстнэнь водителень профессиясонть.
Армиядо мейле Александр Юрьевич эзь кочка лия тев, кармась роботамо водителекс. Важодсь «Мордовдорстрой» предприятиясонть ды кувать частной организациясо. Эрьва косо роботась покш автомашинатнесэ – МАЗ-т, КамАЗ-т ды лият. Зярдо сась роботамо «СпецСервис» предприятияв, васня мельганзо кемекстакшность КамАЗ-сельхозник, конанть руль экшсэ важодеманзо невтизе пек парсте, ды ютазь иестэ тензэ макссть од МАЗ.

Александр Разновонь свалшкане тевензэ ламо: тельня усксить-урядыть ловонть, тунда – ванськавтыть ошонть теледе мейле кадовозь шукшонть ды рудазонть эйстэ, тельня ды сёксня истя жо пштистэ ваныть Саранск ошонь округсо ваньксчинть мельга.
Истя жо тетят-цёрат предприятиясонть важодить Евгений Владимирович ды Артём Евгеньевич Лытыревтне. Евгений Владимирович Саранск ошонь «СпецСервис» МБУ-со важоди уш умок. Сон – водитель-тракторист. Ламо иетнень перть савкшнось роботамс эрьва кодамо техникасо, кувать ветнесь КамАЗ, седе малавикст жо кармасть тракторось ды погрузчикесь. Сонзэ туртов сынь кода-бути седе вечкевить. Погрузчиксэнть важодицятне аволь ансяк кепсить эрьва кодат сталмотнень, истя жо пек лездыть ошонть ванськавтомасояк. Сынстемест а кода ловонть, китнень ды ютамо таркатнень чирева рудазонть урядамсто.

Кода тешксты Евгений Владимирович, техникась кадык аволь покшке, ялатеке пек ёроков. Эйсэнзэ роботамс шожда.
– Мон эстень профессиянть кочкия эйкакш шкасто. Тетям, Владимир Тимофеевич, весе эрямонзо перть роботась трактористэкс колхозсо. Ды бути видестэ кортамс, водителень-трактористэнь минек кассь аволь вейке поколения, – ёвтни Евгений Владимирович. – Покштям, тетям, лелян-ялаксон – весе куш кодаяк ды сюлмавозь водителень тевенть марто. Мон арсян – те самай цёрань профессиясь. Монськак весе эрямом перть руль экшсэ, ней цёрамгак важоди те тевсэнть.
Евгений Владимировичень цёразо, Артём, тетянзо ладсо роботы UMG-погрузчиксэ. Предприятияв сась ютазь иестэ. Тетянзо кунсолозь, кода мельспаросо сон ёвтни коммунальной ёнкссонть важодемадонть, истя жо арсизе варчамс.

Кадык школадо мейле техникумсо тонавтнесь «Информационная безопасность» специальностенть коряс, кочкизе жо водителень тевенть.
– Арасель мелем аштемс кабинетсэ ды арсия варчамс водителень тевенть. «СпецСервисэв» важодеме сынь сеске армиясто велявтомадо мейле. Весе кортыть, тетям тей ветимим. А мон, апак сёпо тешкстаса, эзинь содаяк, сон тесэ роботы. Содылинь, важоди ЖКХ-нь ёнкссонть, ансяк икеле предприятиясь кандтнесь лия лем. Ды зярдо уш саимизь роботамо, тетянень-аванень ёвтынь. Сестэ карминьгак содамо, тетянь марто важодеме карматано вейсэ. Ды те а берянь. Сонзэ ули покш опытэзэ, толковасы тень весементь, косо эряви, лездыяк, – тешксты Артём Лытырев.

Цёранть мельга кемекстазь Саранск ошонь куншкакурось. Самай тосо вейсэ лия важодицятнень марто сынь ванськавтыть ульцятнень ды площадтнень. Самай сынст тевест – ютамо, оймсема таркатнень ды ардома китнень ваньксчинть эрьва чистэ редить минек эрицятне.
Вана истят сынь, алкуксонь профессионалтнэ, конатне теить эрямонть вадрякс. Уледе кемевикст эсь кочкавт тевентень!

Поздоровт
Мельвановикс ялгат! Ёвтан тенк седейшкавань поздоровт тынк профессиональной кенярксчинк кувалма – Автомобильной транспортонь важодицянь чинть марто!
Тынь алкуксонь профессионалт ды важодемадонк ламосо ашти минек республиканть ды целанек масторонть вандынь чизэ. Тынь тейтядо покш ды эрявикс тев. Шумбрачи тыненк ды малавиксэнк туртов, уцяска, ламо паро тевть ды од изнявкст!
М. В. СТРУЁНКОВ,
Саранск ошонь округонь
«СпецСервис» МБУ-нь прявт.


Юлия Еремина
Фототне Эдуард Ретунскиень.