МР-нь Правительстванть юрсо Гуманитарной наукань НИИ-сэ ютась ансяк нолдазь эрзянь ды мокшонь орфоэпиянь валкстнэнь презентация, козонь сакшность неть нолдавкстнэнь теицятне, нолдыцятне, рецензенттнэ, библиотекартне, журналисттнэ, преподавательтне. Панжизе вастовоманть НИИГН-нь директорось Галина Куршева, кона казинзе валкстнэнь весе сыцятненень ды тешкстызе, од книгань лисемась сынст туртов те алкуксонь кенярксчи, ды секскак сыненст сась мель максомс сонзэ сеть ломантненень, кинь туртов неть пурнавкстнэ пек эрявить важодемстэ.
Книгатне лиссть алкуксонь, коень коряс сынь нолдазельть валдо-пиже тюссо, истямокс, кодамокс малав 40 иеде икеле лиссть эрзянь ды мокшонь орфографиянь валкстнэ. Сынь нолдазельть республикань бюджетэнь ярмактнень вельде кода социально эрявикс изданият, ды валкстнэ туить библиотекатнева ды тонавтома таркатнева.
Институтонь прявтонь полавтыцясь Алексей Чернов тешкстась, те иесь ловозь Семиянь иекс ды неть валкстнэнь нолдамось сынст туртов теке эйдень чачома. Неть книгатнень анокстамось жо мольсь овсе аволь вейксэ ковт, ков седе ламо. Сынь – институтонь языкознаниянь отделэнь ламо иень покш тев. Те отделэсь сехте умонсетнестэ ды эйсэнзэ роботасть истят содавикс ломантне-учёнойтне, кода А. П. Рябов, Ф. И. Петербургский, Р. М. Бузакова, О. Е. Поляков, А. И. Келина ды ламо лиятне. 1933 иестэ те отделэсь нолдась эрзянь ды мокшонь кельтнесэ васенце валкст ды седе тов эйстэст ульнесть пек ламо, кода орфографиянь, истя терминэнь, синонимень, антонимень, топонимикань, толковамонь ды ламо лия ёнксонь.
Валкстнэнь коряс эсь мелест ёвтызь О. Е. Поляков профессорось, институтонь прявтонь полавтыцясь Юрий Мишанин. Сынь ве мельсэ кортасть седе, кода мельспаросо вастызь валкстнэнь нолдамодо кулянть республиканть томбале эриця эрзятне ды мокшотне. Сынст туртов неть книгатне покш лезкс, эдь орфоэпиясь ютавтови кода «валонь ёвтамо», ды ламот сынст коряс кармить тонавтнеме, кода видестэ ёвтамс валтнэнь.
«Рузаевский печатник» типографиянь гендиректорось Александр Голиков ёвтнизе историянть, кода сынь вешнесть масторонть келес книгань лангаксонть туртов эрявикс материал ды сон кодаяк эзь муеве, эдь заказчикентень эрявкшнось, штобу сон молевель умонь валкстнэнь лангаксост ёнов. Апак учо, материалось муевсь эсест ванстома таркатнесэ, сон аштесь ды учось шканзо малав комсь иеть ды пек ладясь истямо академической книгантень.
Ольга ЦЫПЛЯКОВА, филологиянь наукань кандидат, МР-нь Правительстванть юрсо НИИГН-нь прявт научной сотрудник, языкознаниянь отделэнь прявт:
– Течи минек институтсо покш чи – лиссть мокшэрзянь кельтнень лексикографиясо васенцеде анокстазь орфоэпиянь валкстнэ – «Мокшень кялень орфоэпиянь валксось» ды «Эрзянь келень орфоэпиянь валксось», конатне нолдазь Мордовия Республикань Прявтонь Администрациянть ды Мордовия Республикань Правительстванть лезксэст вельде.
«Мокшень кялень орфоэпиянь валксонтень» совасть 17 тёжадо ламо валт. Сёрмадыцянзо – Антонина Николаевна Келина ды Осип Егорович Поляков. «Эрзянь келень орфоэпиянь валксонтень» совасть малав 16 тёжат валт. Сёрмадыцянзо – Любовь Александровна Гурьянова ды Ольга Юрьевна Цыплякова.
Валкстнэнь рецензентэкс ульнесть Н.П. Огарёв лемсэ Мордовиянь государственной университетэнь ды М. Е. Евсевьев лемсэ Мордовиянь государственной педагогической университетэнь учёнойтне-филологтне: Галина Софроновна Иванова, Мария Захаровна Лёвина, Нина Афанасьевна Агафонова ды Любовь Петровна Водясова. Минь сыненст ёвтатано покш сюкпря.
Нолдазь валкстнэ аравтыть истят путовкст: вейс пурнамс орфоэпиянь правилатнень; невтемс, кода ёвтавить гласнойтне ды согласнойтне, башка грамматикань форматне ды рузонь кельстэ саезь валтнэ.
Валкстнэ аштить истямо пельксстэ: икельце валсто, кортамо пелькстнэнь максомань невтевксстэ, мельганзо молить орфоэпиянь норматне, седе тов ушодови сонсь валксось.
Весе валтнэ максовить алфавитэнь коряс. Васня моли эрзянь ды мокшонь орфографиянь коряс валонть сёрмадомась, мельганзо – валонь ёвтамось. Тестэ лиси, анокстазь валкстнэ ве шкасто улить кода орфографиянь, истя орфоэпиянь справочникекс.
Валкстнэс совавтозь неень шкань эрзянь ды мокшонь литературной келень валтнэ, таштомозь валтнэ, флорань ды фаунань лемтне, рузонь кельстэ ды сонзэ вельде лия кельстэ саезь валтнэ.
Эряви тешкстамс: валкстнэ алтавить вузсо ды школасо тонавтницятненень ды тонавтыцятненень, сетненень, кинь ули мелест содамс ды тонавтнемс эрзянь ды мокшонь кельтнень, вадрясто ды ильведькстэме кортамс эрзякс ды мокшокс.
Видькстасынек: валкстнэнь сёрмадомась ульнесь аволь шожда тевекс, эдь сынь анокставсть васенцеде. Минь жо те тевенть топавтынек. Седе а шожда тевекс ульнесь валкстнэнь нолдамось. Секскак сёрмадыцятне ды Научно-исследовательской институтонь келень отделэсь ёвтыть покш сюкпря Мордовия Республикань Прявтонь Администрациянтень ды Мордовия Республикань Правительствантень, «Рузаевкань печатник» типографиянь прявтонтень – Александр Сергеевич Голиковнень ды тосонь важодицятненень, Юрий Александрович Мишаниннэнь ды башка сюкпря – Научно-исследовательской институтонь прявтонтень Галина Александровна Куршеванень, сонзэ полавтыцянтень – Алексей Викторович Черновнень ды весе администрациянтень, конатне весе виест путызь неть валкстнэнь лисемань тевентень.
Марина Девятова