Телень васенце чистэнть МР-нь Государственной някань театрасо неень шкань лувтнень коряс «Теремок» ёвксонть невтизь аволь профессиональной артисттнэ – 39-це школань 4-це «В» классонь тонавтницятне. Истя меремс, вишка ваныцятне варчизь виест алкуксонь сцена лангсо.
Те невтемась путозь «КультПроСвет» АНО-нь «Мордовская республиканская детская библиотека» ГБУК-нь «Теремок – Библиотека детского театра (БДТ)» проектэнть вельде, конантень максозель Культурань инициативатнень Президентэнь фондонь грантось. 39-це школань 4-це «В» классонь тонавтницятне Ирина Евгеньевна Исупова классонь ветицяст марто кавто ковонь перть важодсть сценариенть лангсо. Урокто мейле эйкакштне ютавтсть певтеме репетицият, анокстасть-вешнесть оршамот (те ульнесь сехте стакась – эрьва эйкакшонтень эрявсь башка костюм, секскак пшкалесть ошонь весе культурань кудотнева ды вешнесть интернет-сайттнэва), тонавтнесть валт, важодсть интонациянть ды выразительностенть лангсо. Ве ёнов эзь кадово вейкеяк эйкакш. Классонть марто истя жо важодсь психолог, кона тонавтсь а пелемс сценадонть, кемемс эсь вийтнес.
– Ирина Евгеньевна, ошонть келес кочказель тынк классось. Ёвтнеде, кода понгиде те проектэнтень?
– Минь ламоксть якинек эйкакшонь библиотекав эрьва кодамо мероприятияс. Тосонь важодицятне умок содасамизь, неизь, кодат эйкакштне ёроковт, ды сась мель примамс участия истямо проектсэ, конась панжовлинзе эйкакштнесэ актёронь талантонть ды лездаволь тенст лоткамс виздеме ламо ломань икеле сцена лангсо налксеме. Васняяк пурназель тетянь-авань промкс, косо кевкстезель сынст мелест, ды ансяк теде мейле карминек анокстамо те покш тевентень. Те васенце путовксонок алкуксонь театрасо, мезень кис покш сюкпря ёвтатано някань театрань прявтонтень Евгений Романовскийнень. Теке проектэнть вельде февральстэ анокстатано омбоце ёвкс – «По щучьему веленью», а вана майстэ Изнямонь чинтень невтьсынек «Каша из топора» путовксонть.
«Мордовской республиканской эйкакшонь библиотека» ГБУК-нь информационно-библиографической отделэнь прявтось Татьяна Андреевна Шевчук ёвтнесь:
– «КультПроСвет» автономной аволь коммерческой вейсэндявксось, конась важоди образованиянь ды культурань организациятнень марто, изнясь Культурань инициативатнень Президентэнь фондонь грант, конань вельде эйкакшонь библиотекась ды 39-це № школань тонавтницятне кармасть анокстамо путовкст. Васняяк ютавтозель анкетирования, сакшнынек школав тетянь-авань промксос, кевкстнинек, эряви а эряви тенст истямо проектэсь, ули-арась эйкакштнень мелест невтемс эсь пряст покш сцена лангсо… Тешкстама, эйкакштнень марто ламо важодсть минек психологтне. Прявт мельтне тень пингстэ ульнесть зярыя: панжомс эйкакштнесэ артистэнь талантост ды кортамс сценадо, ваныцятнеде апелемадонть; тонавтомс лия ломанень ёжомарямотнень печтямо – улезэ шожда тенст вейкест-вейкест марто кортнемстэ ды седе тов. Неть ёрокчитне лездыть эйкакштненень седе парсте тонавтнемскак. Эдь ёми пелемась каршо валонь максомсто.
Эряви тешкстамс, някань театрань залось пешксель тыц, натой савсь совавтомс зярыя стулт – кельгест весе ваныцятне. Тесэ ульнесть 4-це «В» классонь тонавтницятнень тетятне-аватне, покштятне-бабатне ды кавто параллельной классонь эйкакштне. Путовксонть шкасто мазыйдеяк мазый декорациятнень ютксо эйкакштне анокстасть зярыя киштемат-налксемат.
Ваныцятне кувать цяпасть ды сеересть «Браво!». Эйкакштнень сырькаест ёвтасть сюкпря классонь ветиентень Ирина Евгеньевнанень, конань мельспародонть эзть кирдеве сельведензэяк.
Марина Агафонова
