Минек масторлангось певтеме. Неень шкасто лангсонзо эрицятнеде малав 8 миллиардт. Ды, паряк, арась истямо ломань, конась чачсь кодамояк таланттомо, эдь эйсэнзэ Пазось эрьванть чачомсто казьсы. Кие парсте арты, кие моры, кие машты налксеме музыкальной седямопельтнесэ, кие тантейстэ пиди-пани, кие мазыйстэ сты, а кие, кода Маргарита Шукшина – тейни флорариумт. Талакавты а рузонь те валось, ансяк кармавты арсезевемеяк. Кодамо жо сонзэ смустезэ – ёвтнетяно седе тов.
Маргарита Шукшина чачсь 1995 иень августонь 8-це чистэ Саранскойсэ. Тетязо-авазо эрямонь перть важодсть заводсо. Маргарита кассь эряза тейтерькакс. Сон, кода ошонь лия эйкакштнеяк, школасо тонавтнемстэ сёрмадстовтокшнызе прянзо эрьва кодамо кружокс.
– Мельс ледстяса, кода вишкапингестэ саезь мон бажилинь улемс сцена лангсо морыцякс, ансяк Пазось эзь казе тень мазый вайгель, седе мейле седейсэнь кирвазсь лия сяткине – мезеяк лангс апак вано, тонадомс налксеме гитарасо. Ды 5-це классто саезь ды течинь чис те седямопелесь монь аявовикс ялгам. Пек вечкилинь артомо, стамо, варчакшныя прям сёрмадомань тевсэнтькак, ансяк поладомс сынст эзь лисе. Нейгак свал тень маряви, мон яла вешнян ды вешнян эсь прянть. Ды содатадо, те пек вадря, эдь марян прян эрицякс, – корты Маргарита.
Школанть прядомадо мейле тейтересь мольсь тонавтнеме Гуманитарной институтов, косо тонавтнесь бухгалтерэкс. Неень шкасто сон важоди те ёнксонть коряс. Ансяк, кода ёвтни сонсь авась, важодемадо мейле эрьва чистэ сон анок ливтямс кудов, штобу седе курок озамс ды поладомс седеентень вечкевикс тевенть – флорариумонь тейнеманть, конантень тонадсь аволь пек умок, ансяк авантень маряви, те тевентень вечкемась мартонзо чачсь.
– Флорариумонть марто содавиксэкс теевинь 2021 иестэ. Весть а мезень теемадо саия кедезэнь телефононть ды совинь Интернетс, тосо понгинь флорариумонь тейнеме тонавтыцянть Татьяна Смирновань кулялопанзо лангс. Зярсыя ванкшнынь аванть тейневксэнзэ. Сынь педясть седеезэнь. Ды чачсь покш мелем, мезеяк лангс апак вано, тонадомс аванть ладсо. Кедьстэнзэ раминь тонавтнемань курсат, косо тонавтыцясь пек шождасто ды чарькодевиксстэ толкови эрьва вишка тевенть. Аламонь-аламонь монгак тонадынь тейнеме флорариумт – те вейке эли жо седе ламо апокш цецянь оранжереят, конатне озавтозь сулика или суликань ваза потмос, лиякс тенст мерить цецянь аквариумт, – ёвтни Маргарита.
Флорариумонь теемс саевить аволь весе цецятне, нама, седе вадря важодемс апокш цецине марто: фиалкатнень, кактустнэнь, эхевериятнень, тропической плющенть, кевень розатнень, нупоненть ды декоративной лишайникенть.
– Седе сеедьстэ важодян фиалка ды кактус марто. Вечкевить сынь монень, неть цецятнень мельга пек якамс а эряви ды Саранскоень цецянь микшнема таркатневаяк сынь седе сеедьстэ вастневить. А вана вере ёвтазь цецятнень пек стака муемс. Мон свал яксян ошонь лавкатнева – вешнян сынст, пек чуросто мезеяк од мукшнан. Ды мезть сёпомс, Саранскойсэ флорариумонь тейницят арасть, секс цецянь миицятне свал абунгадозь ваныть лангозон, зярдо кевкстнян кодамояк тропической цецядо, – тешксты авась.
Нама, Маргарита пек а ацирьгали цецятнень арасьчинть коряс, сон эсь сырнень кедьсэнзэ истят дивавтыцят тейни, валсояк а ёвтавить, артовкссояк а артовить. Те корты седеяк, што авась эсь важодевкстнэс путы седейлембензэ.
Лангозост ванозь, эсь пачкат арсезеват, флорариумонь теемасонть кодаткак стакачить арасть. Вачкат суликанть потс дренаж, путат зярыя нупонь ды мазый кевнеть, юткозост озавтсак цецянть, путат гирлянда, конась кирвазтеви батарейкасо, ды весе… Ансяк те а истя, те тевенть теемстэ зяро эряви юткошка, цидярдома… Эдь а стяко кортави: «Путодо важодема тевентень седейлембе ды эрямосонть весемесь ули вадря!»
– Нама, васня, кода кундынь тейнеме флорариумт, талакавтсь эйсэнь се, ломантне а чарькодьсамизь, кармить пейдеме ды згилямо лангсон: «Рита, эдь аволь вишка тейтерькат, мезть стяконь тевть тейнят, шка ёмавтнят?!» Ансяк неть апаро мельтнень-арсематнень куроксто нардызь превстэнь малавиксэнь – мирдем Саша ды вете иесэ цёрынем Миша, эсест лембе валсост ды монень кемемасост. Арсян, сынтемест аламо мезе лисевель. Алкукскак, малавиксэнек – те вейке покш вий, конань марто а пелят кундамс куш кодамо тевс. Масторлангсонть эрьва эрицянтень арсян истямо вий лавтовонзо удало, – полады Маргарита.
Течинь чинтень Маргаритань ули покш мелезэ пурнамс эстензэ ломанть ды максомс сыненст весе содамочинзэ флорариумонь тееманть коряс.
– Покш мелем ули варчамс те тевентень тонавтомо весе бажицятнень. Васняяк, нама, арсян ушодомо ютавтомо мастер-класст эйкакштнень туртов. Содатадо, кодамо покш мель марто монь цёрам тонавтни тейнеме флорариумт?! Мельспаросо лезды тень. Арсян, пек паро карми, бути вишкинетнеяк кармить содамо те тевденть. Флорариумонь теемстэ эрьва ломаненть панжови эсензэ стилезэ, ёжомарямозо, а бути кортамс эйкакштнеде – сынст седеяк вадрясто виевгавтови вишка моторикась, – тешксты авась.
Маргарита весе важодевксэнзэ путни «ВКонтакте» кулялопазонзо. Муевкшнить ломанть, конатне кедьстэнзэ рамсить, натой кучовтыть лия васоло ошовгак.
Эжди арсемась, што масторлангонь эрьва ломанесь панжсы эсь ёрокчинзэ, карми сонзэ нолдамо тевс ды кецявтомо лиятнень.
Алёна Артемьева