Репортаж «Ремезёнское» ООО-нь паксятнестэ
Республикань районтнэсэ неень шкане поладыть сюротнень пивсэме. Комбайнатне састыне уить паксятнева, мельгаст машинатне секе-тев усксить кенерезь товзюронть. Неть читнестэ минь пачколинек Чаунзабуень Покш Эрьмезёнкав. Тесэ зярыя иень перть важоди «Ремезёнское» ООО-сь. Сонзэ вети «ООО МАПО и К» ТНВ-нь генеральной директоронь полавтыцясь Александр Борисович Ботайкин.
Зярдо минь тов пачколинек (те ульнесь августонь 17-це чистэ), велень хозяйствань предприятиясонть прядыльть яровой товзюронь пивсэманть. Кода тесэ молить тевтне, кодамо чачсь сюрось? Теде тенек ёвтни «Ремезёнское» ООО-нь прявт агрономось Андрей Александрович Алексин:
– Сюронь пивсэме тедеде лисинек июлень 28-це чистэ. Васняяк кундынек озимой товзюротнес. Сындест видезельть 365 гектарт. Вейке гектарсто саинек 63 центнерт. Валовой пурнамось – малав 2500 тоннат. Те кецявтымизь. Васенце ие видекшнынек 76 гектарт кснав. Сонзэяк пивсынек. Чачсь вадря, вейке гектарсто 34 центнерт. Шуждонть видекшнынек 486 гектарт. Вейке гектарсто саинек 42 центнерт. Валовой пурнамось – 2400 тоннат. Ней прядтано яровой товзюронть, те – 219 гектарт. Чачсь паро, вейке гектарсто саинек 46-48 центнерт. Паксятнесэ нуить ниле комбайнат – ACROS-т, одт, вадрят. Пивсэме листяно валске марто, кода ансяк росась коськи. Ды чивалгомас пивсэтяно. Фуражонь зёрнанть усктано складга, товзюронть – Саранскоень элеваторов. Мейле мольтяно лездамо шабрань отделенияв, Ромодановань райононь Пушкинав.
Пивсэмадонть башка, лия тевтькак улить. Неень шкане анокстатано паксятнень озимой культуратнень видемс. Колмо тракторт моданть кавшакавтыть-дисковить. Мелявттано, модасонть арась летьке. Сон ней пек эряви. Кемтяно, кармить пиземетькак. 405 гектарт анокстынек озимой товзюронень ды васенцеде видтяно 176 гектарт тритикале – те розь марто товзюронь гибрид. Сон парсте лиси-касы, ламо чачи. Варштасынек, кода ды мезе. Тедеде кизэсь коськель, пиземевтемель. Сюрось чачсь седе, ульнесь паксятнесэ лов, тундонь пиземеть, летькесь сатотсь. Модатнень мельга эряви парсте ваномс, мезе тензэ а сатны, шкастонзо эрявить пиземеть ды лия пургсемкат-валномкат.
Агрономонть свал ламо тевензэ ды мелявксонзо. Ансяк кенерть топавтомс мельтнень-бажамотнень ды менельскак савкшны сеедьстэ кепсемс прянть – учови-арась тосто пиземе. Сюронь пивсэмадо мейле кенерить кукурузась, ламбамо якстерькаесь. Паксясто иля тукшнояк.
Александр Николаевич Акимов пингензэ перть машинань руль экшсэ. Сон чачсь Эрьмезёнкасо, тонавтнесь ДОСААФ-со. Уш армиядо икеле кармась роботамо «Победа» эсест велень колхозсо. Служамодо мейле поладызе важодеманзо теске. Тесэ уш тонадовсь, тевенть содасы, ковгак лия таркав арась мель туемс. Эсь чачома таркадот лия паро тарка а муят. Ней цёрась ГАЗ-53 машинасо ускси сюронть тинге лангов.
Ардынек минь тинге ланговгак, сон ашти Эрьмезёнкасо. Тесэ важодить машиноведэнь лездыцясь Сергей Борисович Назаркин ды КамАЗ-со ардтницясь Василий Емельянович Потекаев. Тенст лездыть колмо цёрынеть, конатне састь ошсто кизэнь каникулав покштяст-сырькаест туртов. Комбайна алдо сюронть ускить тей, сон юты васенце обработка, ванськавтови ды явови: видьмексэкс, ракшань андомс, элеваторс.
– Сюронь пивсэмась ютась парсте. Зярдо сюрось чачи – ёжоськак весень паролгады, комбайнёртнэнь ды лия роботыцятнень. Комбайнёртнэ роботыть кедьсэнек умок. Тевест содасызь парсте, алкуксонь специалистт. Сынст аволь вейке техникаст. Тельня – тракторсо, тунда сокить-видить, изыть-кавшакавтыть, нуема шкане – комбайнасот. Те: Анатолий Ерёмкин, Олег Наумкин, Николай Парчайкин, Александр Авторин. Сынь эрьва кизэ пивсыть. «Росагролизинг» вельде саинек тенст колмо од комбайнат. Ризнэвти, од ломантнень арась мелест самс роботамо мода лангс. А сатныть тенек трактористт, скалонь потявтыцят, ваз мельга якицят. Весе кемемась сетнень лангс, кить ламо иеть важодить мартонок, – корты «Ремезёнское» ООО-нь прявтось А. Б. Ботайкин.
Ды истят ломантнеде аволь аламо. Сынст ютксо водителесь Николай Васильевич Наумкин. Сон тесэ роботы 47 иеть! Ней чизэнзэ кавксть ускси паксяв нуицятненень ярсамопель: обед ды ужин. Пиди жо эйсэст столовоень поварось Ольга Петровна Егорькина.
Эрьмезёнкасто ардомсто кияванть лоткинек. А. Б. Ботайкин содавтымизь эштё вейке роботыця марто. Те – Филипп Васильевич Наумкин. Сон тракторист. Покш тракторсонзо кавшакавты-дискови моданть, аноксты сонзэ озимоень видемс. Чизэнзэ соки 50-60 гектарт. Сонгак эрямонзо перть роботы теске. Ванат неть ломантнень лангс ды арсят – самай сынст лангсо кирдевить велетне ды масторось.
Татьяна Маторкина