Августонь 10-це чистэ Отяжбуень Свято-Троицкой кезэрень церькованть маласо ютась «Пазось мартонок» духовной моронь регионъютконь васенце фестиваль. Инжетне пурнавкшность «Каменка» оймсемань комплексэнть ваксс, сонзэ музыкальной кужинесэнть ютаськак концертэсь.
Фестивалень ютавтоманть баславизе Орданьбуень ды Отяжбуень епископось Вениамин. Васняяк концерттэнть икеле ютась молебен. Мейле весенень явшесть светязь ведь.
– Минь васенцеде пурнынек истямо фестиваль. Сонзэ вельде бажатано ёвтнемс койтнеде-кирдатнеде, культурань сюпавчитнеде, конат пингеде-пингес ульнесть покштянок-бабанок эрямосо. Паро улевель ванстомс неть койтнень, ёвтнемс сындест одтнэнень, кадомс тенст православной культуранть. Кемтяно, те фестивалесь карми ютамо эрьва иестэ, штобу тей сыця морамонь коллективтне пачтявольть духовной сюпавчитнеде. Пазось лездазо тенек те паро тевсэнть! – кортась Орданьбуень ды Отяжбуень епископось Вениамин.
Орданьбуень Кеченьбие (руз. Кечушево) велень церьковань настоятелесь о. Игорь Леонтьев сась тей аволь ськамонзо. Сонзэ марто – 27 ломанть. Од ломантне пурнасть веломотопоход. Цёрынетне састь мотоцикласо ды велосипедсэ. Мезе парось, сынст велесь те таркадонть 10 вайгельбешка. Кода ёвтнесь о. Игорь, Каменкав сынь сакшныть малав эрьва ие Троицянень. Эйкакштне ванськавтыть церькованть перька тарканть, озныть. Теде башка, ютавтыть эрьва кодат налксемат-пелькстамот, пидить штюрьба, ушосо пидезесь а ёвтавияк кодамо тантей. Тедеде Троицянень эзь саво понгомс тей, пачкодсть ней – алкуксонь кенярксчис. «Мон арсян, течинь фестивалесь кады сынст оймес лембе ды валдо ледстнемат, конатне а ютыть стяко», – мерсь священникесь о. Игорь.
О. Евгений Самаркин ламо иень перть служи церьковасо. Сон умок уш морси Пазонь морот. Сёрмады морот сонськак, конатнесэ алкуксонь проповедь. Течи морынзе весенень содавикстнэнь – «Слава Богу за всё», «Русь жива», «Божий храм», «Серафим Саровскойде» ды лия моротнень.
– Истят вастовомат пек эрявить. Сынь вейсэндить ломантнень. Минь кортатано Паздо, славатано Пазонть. Неть фестивальтнесэ гайгить оймень морот, сынь максыть лембе, Пазонь чанстямо. Зярдо Пазось мартонок? Сестэ, зярдо вейкенек-вейкенек вечктяно, лездатано, вансттано. Ды бути вейсэ истя пурнавтано – Пазось мартонок! – кортась о. Евгений.
Неень шкане священникесь строи-стявты церькова Орданьбуень Жаренки велесэ. Тосо сядо иень перть арасель ознома тарка. Ней церьковась карми конторань ды клубонь ташто зданиясо, конань эряви пек витнемс-петнемс. Кемтяно, муевить ломанть, конат кармить лездамо те паро ды валдо тевсэнть.
Концертсэнть паро инжекс ульнесь о. Валерий Логачев. Сон сакшнось Оренбургонь митрополиянь Орскоень епархиясто. Те ломанесь пек содавикс. Сон – духовной музыкань раськеютконь ды весероссиянь фестивалень лауреат ды участник. Ардтни Россиянь весе оштнева ды чизэнзэ ютавты зярыя концертт. Эрявикс аппаратуранзо ускси мартонзо машинасо, сонзэ ладямсто кодаткак мелявкст а эрсить. Низэ вети Кардаиловской народной хор ды эйкакшонь зярыя коллективть. 2017 иестэ Логачевтнень семиясь пелькстась «Иень семия» Весероссиянь конкурссо. Сынь изнясть «Велень сехте паро семия» номинациясо. Каменкасо о. Валерий морась зярыя морот.
Истя жо «Пазось мартонок» концертсэ морасть Отяжелень эйкакшонь хорось, Кирилл Галкин, Владимир Титяпкин, Александр Дёмкин, стихть ловность Полина Карпушкина, Надежда Аитова. Алкуксонь вишка концерт невтсь МР-нь Государственной камерной хорось (художественной ветицясь П.Карташов). Хорось анокстась од программа, косо гайгсть духовной морот.
Весе морыцятне казевсть дипломсо ды казнесэ. Сюкпрянь валт ёвтазельть «Талина» агрохолдингенть лемс, конась макссь лезкс мероприятиянть ютавтомасо. Малав весе инжетне кортасть: сы иестэяк эряви ютавтомс моронь фестиваленть. Тей сакшность Отяжбуень, Орданьбуень велетнестэ, ульнесть ламо эйкакшт. Теде мейле инжетнень тантейстэ каванизь.
…Шкась эзь марявояк, кода ютась, чизэ мадсь, менельс чалгась покш ковось, конась аштесь Каменкань Свято-Троицкой церькованть велькссэ. Кода карминек содамо, те таркасонть панжови од церькова. Каменкасо одс вельмевтьсызь озноматнень ды те пек кецявты.
Татьяна МАТОРКИНА
Фототне Сергей ЧИЖЕНКОВОНЬ