Кочкуровань райононь Семилеень Социальной центрась панжовсь 2015 иестэ. Мелят минь евтнекшнинек те мазый, неень шкань лувсо стявтозь учреждениядонть, косо пурназь вейс весе эрявикс объекттнэ: покш актовой зал, краеведениянь музей, велень библиотека, зярыя тонавтома нупальть, косо ютавтовить урокто башка занятият ды ламо лия мезе.

Теде башка, тесэ ули покш фойе, косо ютавтневить выставкат ды мастер-класст. Башка таркасо велень аватне кодыть СВО-в кекшемань алтымат. Течинь материалсо минь евтнетяно, кода Семилеесь вансты эсь велень историянзо. Ине Отечественной войнасо Изнямонь 80 иетнень топодемантень тесэ анокстазь весемесь.

Музеень питней экспонаттнэСемилеень музеенть пурнамо 2000-це иетнень ушодкссто кармась Любовь Ивановна Бекшаева – Социальной центрань художественной руководителесь. Сестэ сон важодсь ташто клубонь библиотекасо. Велень ломантнеяк кармасть тензэ лездамо – кудосто кандсть умонь шкань лия енов а молиця кедьенкст, курмот-кармот. Истя аламонь-аламонь пурнавсь вадря-паро музей. Седе тов Любовь Ивановна ушодсь пурнамо печатной информация. Районсто сайсь веледенть сермадовкс марто газетат, войнань участниктнеде заметкат. Эдь газетась – истя жо история. Вана а пек умок тенст кандсть 1945 иень газета, самай Ине Изнямонтень алтазь экземплярось. Истят материалтнэ ней марявить седеяк питнеекс.Ламо сюпавчи музеенть туртов кадсь Алексей Емельянович Степанюк краеведэсь, кона сонськак ульнесь войнасо ды 1970-це иетнестэ ушодсь пурнамо материалт войнань участниктнеде, велень историядо. Алексей Емельяновичень куломадо мейле тейтерезэ весе таштазенть максызе велень музеев. Сынст ютксо питнейдеяк питней казнесь – фотоальбомось, тесэ самай 1945-1946 иетнень ялганзо ды сослуживецэнзэ фототне. Эрьва фотографиясонть лангозот ваны валдо, мизолдыця солдатонь чачо, конань мельсэяк арасель воевамс, эрямс бу ды эрямс тенст сэтьмечисэ, ансяк ятось эзь максо тень теемс, ды эрьвантень савсь эцемс тиринь масторонзо кис тюремань тол потс. Любовь Ивановна те альбомдонть корты пек лембестэ: «Зярдо максызь те фотоальбомонть, натой кодамо-бути талнома марто ванкшнынек эйсэнзэ, кода арсезеват – кедьсэть се шкань ломантнень историяст, седеетькак токнозеви – эдь сынь малавгавтсть Ине Изнямонть».Ламо лия ломантнеяк сюпалгавтсть музеенть. Войнань шкань раскопкат кандсь Александр Елаев. Илья Андреевич Жидкин, войнань участникесь, кандызе ручкасо сермадозь эчке блокнотонзо, косо тешкстазь автобиографиязо, войнадо ледстнеманзо. Сон ульнесь Ржев ошонть ало тюрематнесэ, сестэ тензэ ульнесть ансяк 20 иеть. Тесэ евтневи, кода стакасто ранязель, кода пельсь пильгевтеме велявтомс кудов. Пек ризнэсь тень кувалма...

Теде башка, Людмила Селивановань поисковой отрядозояк лезды пештямс музеень фондонть. Сынь кортнесть ламо сыре ломань марто, конат ней уш арасть ютксонок. Сыретнень валост коряс, Семилейга Московонть кис тюреме Пенза ошсто мольсть ламо солдатт. Ды кой-кона кедьенксост ней мукшновить модастонть. Саемга, пулеметной ящикть, саперонь койметь...
Семилеесь ашти каштанчисэ Советской Союзонь Героенть Константин Иванович Рассказовонь кувалма. «Заря» райгазетась 2024 иень декабрясто сондензэ сермадокшнось домка статья. Те газетась ней ашти музеень лався лангсо. Любовь Ивановна ледстни: «Мон ледстясынь сонзэ покштянзо-бабанзо. Атясь кувака сакало мартоль. Минь сестэ эзинек сода, нуцьказо – Герой, миненек, эйкакштненень, эрявсь варштамс сакало марто алкуксонь эрзянь кезэрень атянть лангс. Ваксозонзо молезь, мерят, евксос понгилить. Ламо мезе евтнесь тенек, ней уш а ледстявить…»
Музейсэнть ютавтовить экскурсият ды мероприятият кода эйкакштненень, истя покштнененьгак.


Библиотекась анокстась «А стувтовиця полк»Семилей велень библиотекань фондсонть 4000 книгат. Те иестэнть библиотекантень кучозельть колмосядто ламо од книгат, ламотне эйстэст – те эйкакшонь литература, конатнень туртов явозель башка тарка.Библиотекань важодицясь Любовь Ивановна Авдюшкина чачсь-кассь Семилейсэ, школадо мейле Саранскойсэ васня тонавтнесь поварокс, мейле библиотекарекс. «Важодян тиринь велесэ, пек вечкса эсь енксом. Мирдемгак тестэнь. Кавто эйкакшонок: цера ды тейтерь. Церанок 9 классто мейле тусь тонавтнеме ошов сварщикекс, тейтеренек яки 5-це классос».Библиотекасо ютавтовить весе мероприятиятне – патриотическойть ды краеведческойть. Апрелень 26-це чистэ тесэ ютась библиове, конань туртов анокстазель патриотической программа. Парта лангс нурька биография марто ладсезельть Семилей велень войнань шкань участниктнень портретэст. «Сынст ютксо минек кудораськень ломантнеяк. Вана монь прапрапокштям – Тятюшкин Маркел Иванович (1911–1980). Сон чачсь Семилейсэ, войнасо вейке тюремасо пек ранязель, теде мейле сонзэ ильтизь тылэв, косо сон тонавтсь ават тюрема тевентень, штобу мейле сыньгак туевельть фронтов. Тесэ ули мирдень покштянзояк Авдюшкин Иван Сергеевичень (1925–2003) портретэзэяк. Сонензэ прась уцяска живстэ велявтомс войнасто ды эрямс кувака пинге», – евтнесь Любовь Ивановна.Эряви тешкстамс, Л.И. Авдюшкина – ероков ломань. Сон библиотекантень тейнесь зярыя мазый ужинеть (уголокт), конат каявить весень сельмес. Невтемга, каминэсь, конань икеле ацазь чевте кумбо. Истямо мазычинть лангс ванозь, марят эсь прят лембе кудосо, каминэнть ваксс ули мель озамс ды апак капша ловномс мельстуиця книга.Сехте пек минек дивавтымизь а стувтовиця полконь макетэсь, конань Любовь Ивановна мелень путозь зярыя чинь перть тейсь эсь кедьвийсэ. Колмошка сантиметрань сэрьсэ фотографиятне педявтнезь чувтонь чова палкине лангс ды путнезь прок пьедесталс – эчке пенопластонть лангс. Истямо а стувтовиця полконь мини-макетэсь пек парсте невти, зяро ломанть тусть войнав Семилейстэ 1941–1945 иетнестэ. Библиотекаренть валонзо коряс, тесэ натой аволь весе солдаттнэ, паряк, пурнави эште вейке истямо макет. Любовь Ивановна евтни: «Зярдо састь эйкакштне, сыненст пек тусь мельс истямо «полкось», конань марто теинек вейсэнь фото. Столенть лангс путыя те макетэнть, удалонзо аштесть эйкакштне, лиссь истя, мерят, алкуксонь а стувтовиця полк ютась. Секскак эряви те важодеманть поладомс седе товгак».
Вана истя Семилей велесэ седейлембе марто ванстыть минек ине историянть ды аволь ансяк евтнить, невтнить сонзэ од ломантненень.Алтыматнень кодыть седейлембе марто

Неень шкань историяськак сермадови течи. Зярдо минь сакшнынек Семилеев, ульнесь валскень шка, секскак эртевинек алтымань кодыця ансяк колмо аватнес. Обедтэ мейле сынст полавтсызь лият. Сынь важодсть оймень путозь ды покш мель марто.Надежда Викторовна Тятюшкина кекшемань алтымань кодамо ушодсь васенцетнень ютксо. Авась чачсь Воеводское рузонь велесэ, тонавтнесь 8 иеть эсест велень школасо, 2 иеть – Семилейсэ. Мейле мирдененьгак лиссь Семилеев. Школадо мейле прядсь медучилища, ансяк важодемс специальностень коряс эзь саво. Пенсиязонзо роботась страховой агентэкс. Иеде икеле мирдезэ кулось инфарктто, тензэ ульнесть 65 иеть. Теде мейле авась чистэ кармась тей сакшномо тошначиденть, ансяк бу а аштемс чаво кудосонть. Колмо тейтерест уш покшт, эрить Рузаевкасо.
Людмила Григорьевна Францевань туртов Семилеесь – тиринь велезэ, тонавтнесь бухгалтерэкс, 26 иеть важодсь «Электросетьсэ». Кавто эйкакшонзо: тейтерь ды цера. Эри вейсэ церанзо семиянзо марто, нуцьканстэнь 12 иеть. Тейтерезэ эри Тольяттисэ, важоди «скоройсэ».Нина Ивановна Кипайкина чачсь-кассь истя жо Семилейсэ, 36 иеть важодсь Самарань чугункань ки лангсо. Рана кадовсь довакс. «Тейтерем важоди библиотекасо, тынь тов теде икеле совсиде. Церам – «Норовсо», кияк ве енов эзь туе. Пек вечксынек тиринь енксонок. Алтымат кодан СВО-нть ушодовомсто саезь».
Аватнень эйстэ эрьвась тешкстызе, куш мейсэяк лездама цератненень. Пенсиясь вишкине, ярмаксо а лездават. Мелявтовты, мекс неень шкастояк улить минек масторонь ятт, конат а лотксить апаронь арсемеде тиринь масторонок туртов. Ансяк кемтяно, зярс фронтсо улить икелев молиця ды кеме, а пелиця солдатт, тылсэ жо истят ават, Изнямось карми минек!

Марина Агафонова