Республикань кудосо ютась кенярксчинь вастовома, конась алтавсь Россиянь печатень чинтень. Тесэ ёвтасть поздоровт сетненень, кинь вельде минь марятано Мордовиясо, Россиясо ды масторлангсо молиця тевтнеде; минек вановт алов понгить кенярдовтыця ды талновтыця кулятне; минь содатано прявт, мельстуиця ды апак учонь тевтнеде.
Весень тень нон-стоп лувсо топавтыть журналистэнь тевень мастертнэ: корреспонденттнэ, оператортнэ, фотографтне, редактортнэ ды издательтне. Печатень чинть кувалма Мордовиянь медиаиндустриянь важодицятненень поздоровт ёвтась МР-нь Прявтось Артём Здунов:
– Весе вейсэ минь тейтяно кулянь вейкине пространства, кемекстатано республикань имидженть ды региононь повестканть, лездатано эрицятненень ды минек земляктненень, конат эрить васоло Мордовиянть эйстэ, миненек максовить каршо валт талновтыця кевкстематнень коряс, ёвтневи республиканть эрямодо. Минь важодтяно прявт тевенть коряс – топавттано масторонь суверенитетэнть ды национальной безопасностенть. Нама, массовой информациянь средстватнень таликаст пек эрявикс. Ломантне тынк лангс нежедить.
Мордовиянь Прявтось тешкстась, те профессиясь виевгады, теевить од медиат, седе ламо контент тееви социальной сеттнесэ. Пек эряви PR ды пресс-службатнень важодемась. Секскак свалшкань СМИ-тнень марто вейсэ те чистэнть казнеть максозь блогертнэнень, госпабликтнень ды школань медиацентратнень администратортнэнень.
Артём Здунов ёвтась башка сюкпря республикань ды райононь СМИ-тненень специальной военной операциянь теманть невтемасо профессионализманть кисэ – 2022 иень февральстэ саезь те кевкстеманть коряс лиссть 40 тёжадо ламо материалт. Теде башка, редакциятне аволь ансяк невтсть СВО-в гуманитарной сталмотнень пачтямонть, истя жо сынсь ульнесть лезксэнь пурнамонь ушодыцякс.
Эштё вейке прявт темакс Артём Здунов ёвтызе государственной национальной политиканть. Сюкпрянь башка валт ёвтазельть газетатнень, телеканалтнэнь ды соцсеттнесэ пабликтнень лемс «Россия» выставканть-форумонть ды Мордовия Республикань Чинть, конась ютавтовсь ВДНХ-со, невтеманзо кисэ.
– Тынь эрьва чинь лувсо ёвтнетядо национальной проекттнэнь топавтомадост, конатнень яволявтынзе минек Президентэсь. Тынь содатадо, зяро витнесть-петнесть школат, строясть эйдень кужот, поликлиникат, панжсть куватьс строявиця объектт. Теде эряви ёвтнемс, ломантне теде содаст! – мерсь Артём Здунов.
Те иестэ, конань масторонь Президентэсь яволявтызе Семиянь иекс, Мордовиясо эштё Трудонь династиятнень иекс, журналисттнэнь пшти вановтост алов понгить республикань семиятне, авакс улемань ды эйкакш порань ванстомань системась, ламо эйкакшонь семиятненень социальной лезксэсь, трудонь династиятнень славамонь опытэсь.
– Те иестэ тынь поладтадо ёвтнеме республикань эрицятненень Мордовиянть туртов прявт тевтнеде. Сехте прявт тевесь – Россиянь Федерациянь Президентэнь кочкамось. Весе масторлангонть вановтозо ули каязь Россиянть лангс! Минек вейсэнь тевесь – седе келейстэ ды видестэ максомс кулят республикань эрицятненень, топавтомс кочкамонь кампаниянь ютавтомань законностенть, – тешкстась Мордовиянь Прявтось.
Республикань массовой информациянь средстватнень важодемась аволь весть тешкстазель федеральной уровеньсэ ды отраслянь пелькстамотнесэ. Кенярксчисэнть Артём Здунов истя жо явшесь покш казнеть журналисттнэнень, медиацентратнень представительтненень, блогертнэнень, од автортнэнень. Казнеть истя жо максозь Мордовия Республикань Прявтонь премиянь, Мордовиянь социально-экономической виевгавтомань коряс теманть сехте вадрясто панжоманть коряс ды «ИнтоНАЦИЯ» пелькстамотнень дипломанттнэнень ды лауреаттнэнень.
«Эрзянь правда» газетань прявт редакторось Марина Девятова, сонензэ максозь «Лауреат премии Главы Республики Мордовия» лемесь, ёвтась сюкпря Артём Здуновнень эрзянь ды мокшонь раськень культурань койтненень-кирдатненень ды кельтненень покш мелень явоманть кисэ.
– Артём Алексеевич, тынь пшкадиде эрзянь ды мокшонь раськентень тиринь эрзянь кельсэ. Минек туртов те кармась кенярксокс ды кемемакс: эрзянь ды мокшонь кельтне кармить эрямо, сюпалгадомо ды пачтявить эйкакштненень-нуцькатненень. Тынь кармиде паро невтемакс весе минек од ломантнень туртов. Мон, кода офицерэнь ни, седе товгак карман служамо ине Россиянтень, вечкевикс Мордовиянтень ды весе эрзянь-мокшонь раськентень! – мерсь Марина Николаевна.
Истя жо вал сайнесь «Мордовия» ГТРК-нь радиовещаниянь службань прявтось Ирина Колесникова, «ИнтоНАЦИЯ» пелькстамонь лауреатось:
– Течи, кода зярдояк, журналисттнэнь покш тевест – эдь минь эрятано аволь шожда шкасто. Зярдо журналисттнэ анокстыть сюжетт, репортажт, интервьют, минь башка талнома марто явтано мель валонтень. Те минек прявт инструментэсь, ды сон пачкодезэ эрьва ломанентень. Весе минь тейтяно путовкс Россиянь, минек вечкевикс региононь виевгавтомантень, минек вейсэнь изнямонтень.
«Год педагога и наставника» пелькстамонь изницятнень ды призёртнэнь казинзе МР-нь Правительствань Председателень тевтнень топавтыцясь Галина Лотванова, терроризмань ды экстремизмань а нолдамонь кевкстеманть сехте вадрясто невтемань пелькстамонь – МР-нь Правительствань Председателень полавтыцянь тевтнень топавтыцясь Алексей Ежов.
Коллегатненень поздоровт ёвтась Мордовия Республикань Прявтонь ды Мордовия Республикань Правительствань Администрациянь Руководителень полавтыцясь – Мордовия Республикань Прявтонь Пресс-службань руководителесь Елена Башкирцева. Сон явшесь казнеть «Герои среди нас» патриотической воспитаниянь кевкстеманть сехте вадрясто невтеманть коряс журналистэнь пелькстамонь дипломанттнэнень ды лауреаттнэнень.
Тешкстасынек, «Эрзянь правда» газетась лиссь изницякс «ИнтоНАЦИЯ» ды «Лучшее освещение темы о социально-экономическом развитии Республики Мордовия» номинациятнесэ.
Семиянь иесь ансяк ушодовсь. Кенярксов ды мельстуиця тев лиссь те вастовомасонть. МР-нь Прявтонь протоколонь службань важодицясь Алексей Арекаев ёвтась вечкемадонзо ды тердизе никс Алёна Крапивинань. Сон казсь тензэ мазыйдеяк мазый цецяпусмо ды суркс. Тейтересь важоди «Мордовия» ГТРК-со корреспондентэкс (Алексейгак тосо икеле важодсь малав кемень иеть). Алёнань натой лиссть сельведензэ, сон эзь сода те сюрприздэнть, мерсь, лиси тензэ мирденень. Арсетяно тенст пси вечкема ды кеме семия!