Ине Отечественной войнасо Изнямонь 80 иетнень тешкстамодо икеле Покш Березниксэ панжозель «Сурань рубеж» мемориальной комплексэсь. Сон алтави Сурань рубежень стявтыцятнень подвигест ледстнемга. Мемориалонть теемасо лездась Россиянь военно-исторической вейсэндявксось.
Сура леенть чиресэ ванстомань рубеженть теемазо ушодозель 1941 иень октябрясто. Теде кармавтома макссть СССР-нь прявттнэ. Ятонть эрявсь кирдемс, ванстомс масторонь промышленной таркатнень, а максомс фашисттнэнень ютамс каявомас. 45 чить ды веть Мордовиясо строясть Сурань оборонань рубежень 80 вайгельбетнень. Теицятне ульнесть ават, сыре ломанть ды эйкакшт. Мордовиянь малав 70 тежат эрицятне, весе вийсэст, натой ниленьгемень градусонь якшамотнень пингстэяк, эзть лотксе чувомо, важодсть окоптнень, блиндажтнень теемга. Ломантнень ине тевест казезель – ятось потась!
Вана уш 15 иетнень перть Сурань рубежень строямонь таркатнесэ ютавтовить исторической реконструкцият. Нейгак реконструкциянь истямо пелькс невтезель пурнавозтненень. Те покш стройканть вельмезь участниктне – эйкакштне, сыре ломантне, аватне – чатьмонезь ютасть ваныцятнень вакска. Сынст ледстизь чатьмонемань минутасо, мемориалонтень путсть цецят.
Мордовиянь Прявтось Артем Здунов велень эрицятненень ды инжетненень пшкадемстэ тешкстызе, мемориальной комплексэнь панжомась – аволь ансяк республикань, те весе Россиянь покш тев: «Войнань васенце телесь пек якшамоль, мольсь мобилизациясь, кияк эзь сода, мезе карми седе тов. Ансяк весемесь ульнесь фронтонть туртов! Ломантне кемсть Изнямонтень. Стака важодемань 45 чить ды рубежень 80 вайгельбеть, конатнень бу ятось аволинзе юта. Сынст томбале ине Советской Союзонь промышленной потенциалось, конань эрявсь ванстомс ды конась лездась советской ломантненень изнямс. Весементь тень теизь минек покштятне-бабатне. Модас сюконятано весенень, кие топавтсь те ине тевенть, весенень, кие кирди сонзэ мельсэнзэ, пачти неть содамочитнень эйкакштненень!»
Крутицкой ды Коломенской митрополитэсь Павел пачтинзе Московонь ды весе Русень Патриархонть Кириллэнь баславамонь валонзо. «Минек ломантнень салавачист сеньсэ: минь седейшкава кемтяно Пазонтень, кемтяно минек Отечествантень. Арсян тенк оймень вийть. Кадык те мемориалось карми минек ломантнень вейсэндявомань тешксэкс. Кадык кемемась карми минек эрямонь нежекс».
РФ-нь Президентэнь гуманитарной енкссо государственной политикань коряс управлениянь прявтонь полавтыцясь, Россиянь военно-исторической вейсэндявксонь прявтонь полавтыцясь Николай Овсиенко евтынзе Владимир Мединскиень пельде поздоровонь валтнэнь: «Те монументэсь – Мордовиянь эрицятнень важодемань героизмадост ледстнема. Кеврунгонь башка фигуратнень прообразокс кармасть алкуксонь строицятне».
Саемга, Чаунзабуень Сорлиней велесэ чачозесь Филипп Петрович Гусев саезель Сурань рубежень строямо 1941 иень январьстэ плотникекс. Авань кеврунгонть истя жо ули алкуксонь прообразозо – Лямбирень райононь Саловка велесэ чачозесь Надежда Афанасьевна Грунина. Сурань рубежень строямодонть башка, войнань иетнестэ сон истя жо ардтнесь палымодатнень (торфяниктнень) лангс важодеме. Эйкакшонь кеврунгось теезь архивень документтнэнь ды рубежень строицятнень (сестэ тенст ульнесть 14–17 иеть) ледстнематнень коряс. Невтемакс, Покш Березникбуень Марьяновка велесэ чачозесь Галина Семеновна Бодина, сон саезель модань чувомо 16 иесэ. Сурань рубеженть строясь васенце читнестэ саезь прядовоманть видьс.
Мемориальной комплексэнь панжоманть кувалма поздоровт истя жо евтасть ПФО-со Россиянь Президентэнь Полномочной представителень полавтыцясь Олег Машковцев, ЦВО-нь командованиянь административно-территориальной управлениянь прявтось Виталий Михайлов ды республикань ветеранонь организациянь председателесь Иван Цыганок.
Зярс минь вансттано минек геройтнень ине тевест коряс ледстнематнень, карми эрямо ды виензамо минек Чачома масторось. «Сурань рубеж» мемориалось кадови неть ледстнематнесэ пингеде-пингес.