Крымесь – исторической регион, косо эрить ламо эрьва кодат раськеть. Лиссь истя, мокшэрзянь раськеськак тесэ муизе эсь тарканзо. 1989 иень Эрицятнень весесоюзонь сермадстомань максоматнень коряс, Крымсэ лововсть малав 4 тежат эрзят ды мокшот. Неень шкане Крымсэ эрить малав 1,5 тежат минек раськень ломанть. Икеле яла кортыльть, Крымень эрьва велесэнть улить эрзянь ды мокшонь семият. А стяко Крымсэ эрзянь-мокшонь раськень общественной вейсэндявксось макссь эрьва ендонь касома-кепетема.
Мокшэрзянь историянть ды культуранть ванстомасо 2007 иестэ саезь башка тарка максови «Крымское мордовское общество им. Ф. Ушакова» общественной организациянтень, конань правлениянь председателекс весе те шканть перть важоди Владимир Михайлович Старчков.
Обществанть важодемазо алтави эрзянь-мокшонь культуранть ды кельтнень ванстомантень, Крымсэ раськень койтнень-кирдатнень невтемантень, раськень духовно-нравственной сюпавчитнеде од ломантненень евтнемантень. Эрьва ие Ф. Ушаков лемсэ вейсэндявксось ютавты эрзянь-мокшонь культурань чить, «Шумбрат!» фестиваль, эрьва кодат мероприятият раськеютконь сюлмотнень кемекстамга.
Истя, те иень августонь 28-це чистэ Симферопольсэ «Шумбрат» фестиваленть ды тематической кругловой столенть лувсо Крымень, Мордовиянь, Самарской областень ды Севастополень представительтне кортызь Россиянь раськетнень межкультурной коммуникациянь неень шкань енкстнэнь, од ломантнень патриотической воспитаниянь кевкстематнень. «Шумбрат!» фестивалесь, кона ютавтовсь Крымскотатарской государственной академической музыкально-драматической театрасо, усиянь эрицятнень ды инжетнень содавтынзе финнэнь-угрань раськетнень койтнень-кирдатнень ды ремеслатнень марто.
Керчь ошсонть-геройсэнть фестивалень участниктне путсть цецят Митридат пандонть прясо аштиця Славань Обелискентень ды содавтызь Аджимушкайской кевень таргамо таркатнень (каменоломня) оборонань историянь музеенть. Мода алонь экспозициянть марто весень содавтынзе Елена Пшеничная экскурсоводось. Инжетне неизь лисьманть, казарманть, пидема-панема тарканть, газоубежищанть ды гарнизононь штабонть, госпиталенть эйстэ кадовкстнэнь ды братской калмотнень. Каштанчи ульнесь, зярдо экскурсоводось евтнесь Мордовиясо чачозьденть – Аджимушкайской кевень таргамо таркатнень оборонань руководительденть полковниктенть Павел Ягуновдо. Фестивалень участниктнень марто мода алов валгонесь Мэри Рудольфовна Никольская, кона эйкакш шкасто вейсэ эсь семиянзо марто зярыя чить кекшнесь неть кевень таргамо таркатнесэ.
Мордовиянь делегациясь усксь мартонзо казне – эрзянь раськень оршамосо няка, конань коень коряс кадызь калмонть лангс, тесэ чавовозь эйкакштнень ледстнемга.
Истя жо путозельть цецят «Героям Аджимушкая» кеврунгонтень ды Аджимушкай поселкань скверсэ советской воинтнэнь братской калмонтень, козонь 1987 иень майстэ одс калмазельть кевень таргамо таркатнестэ муезь Павел Максимович Ягуновонь кадовксонзо.
Ф. Ушаков лемсэ Эрзянь-мокшонь вейсэндявксонть мелензэ ды лезксэнзэ вельде 2025 иестэ снимавсь «Командир подземного гарнизона» документальной фильмась, конась невти Павел Ягуновонь, советской военной деятеленть, полковникенть, 138-це стрелковой дивизиянь командирэнть, Ине Отечественной войнань шкасто Аджимушкайской кевень таргамо таркатнень оборонань руководителенть подвигензэ.
«Шумбрат!» фестивалесь кармась вадря площадкакс опыттэнть евтнеманть, койтнень-кирдатнень невтеманть ды эрзянь-мокшонь культуранть популяризациянть туртов. Сонзэ участниктне ве мельсэ кирдизь истят мероприятиятнень эрявиксчинть раськеютконь сюлмотнень кемекстамосо ды Россиянь раськетнень культурань сюпавчитнень ванстомасо.
Фестивалень цетамокс кармась Мордовия Республиканть ды Крым Республиканть ютксо культурань ды образованиянь енкссо сюлмотнень кемекстамось. Вейсэнь важодемась лезды ванстомс Крымсэ эриця эрзятнень ды мокшотнень культурань сюпавчитнень.
«Шумбрат!» эрзянь-мокшонь раськень культурань фестивалесь – те Россиянь сюпав культуратнень покш кенярксчи.
Крым Республикасо фестивалесь пурназель уш вейксэцеде. Мероприятиянь арсицякс-ютавтыцякс кармасть Крым Республикань раськеютконь тевтнень коряс государственной комитетэсь, «Дом дружбы народов» РК-нь ГБУ-сь, «Крымское мордовское общество им. Ф. Ушакова» общественной организациясь, Эрзянь-мокшонь раськень регионъютконь общественной вейсэндявксось МР-нь Культурань, раськень политикань ды архивень тевень министерстванть лезксэнзэ вельде.
Юлия Сушкова,
историянь наукатнень доктор,
Н.П. Огарев лемсэ МГУ-нь Юридической институтонь
теориянь, государствань ды раськеютконь правань
кафедрань профессор.