Течи минек республикась пек сюпав фольклорной ансамблятнесэ, конатнень репертуарсо ванстовсть эрзянь кезэрень моротне. Неть ансамблятне улить малав эрьва велесэнть. Сынь – эрзянь келень, культурань ванстыцят, койтнень-кирдатнень вельмевтицят.
Пек паро, раськень коень-кирдань ванстыця истят ансамблят улить аволь ансяк Мордовиясо. Течи эсь ловныцятненень минь евтнетяно Нижегородской областень Большеболдинской райононь Пикшня велень «Чилисема» эрзянь народной фольклорной ансамблянть ланга. Сон пурназель малав колоньгемень иеде икеле. Те шканть перть аволь весть полавтовкшнось составозо, ансяк зярдояк эзь полавтовкшно ансамблянть аравтлувозо. Прявтокс свал ульнесь – эрзянь кезэрень моротнень вельмевтемась, раськень койтнень-кирдатнень ванстомась.
«Чилисема» народной фольклорной ансамблянть вети Пикшня велень Культурань кудонь прявтось Людмила Николаевна Туршатова. Клубонь прявтокс авась важоди 2019 иестэ саезь, седе икеле ульнесь культорганизаторокс. Культурасо важодемань кизэ жо ушодовсь 1997 иестэ. Кода корты культроботникесь, сась аламошкас, зярс лия важодема тарка эзь лисе.
– Ансяк важодемась истя вечкевсь, туемадо уш эзинь арсекшнеяк, – тешксты Людмила Николаевна. – Зярдо мон ушодынь тесэ роботамо, Культурань кудонь прявтокс ульнесь Татьяна Николаевна Туршатова. Васень шкастонть весе арсесть, минь ават-тейтерть. Алкукс жо, фамилиянок ансяк вейкеть. Библиотекасо важодсь Любовь Петровна Доронина. Культурасо сынь кавонест роботасть уш умок, секскак ульнесь покш мелест пурнамс морамонь коллектив, конанень максовсь «Чилисема» лемесь. Нама, васенце шкастонть морыцятнеде ансамблясонть ульнесть седе ламо, ней кадовинек ветенек. Неть: Елена Филипповна Ежова, Антонина Васильевна Камбаратова, Валентина Михайловна Седойкина, Людмила Валентиновна Болиева ды мон.
Зярдо Людмила Николаевна ансяк ушодсь Культурань кудосо роботамо, Л.П. Доронина ды Т.Н. Туршатова арсизь якавтомс тевенть ансамблянтень народной лементь максомга. Защитадонть икеле ульнесть ламо репетицият, мелявкст. Ансяк тевесь лиссь, эрявикс документэнть максызь ды «Чилисема» фольклорной ансамблясь кармась народноекс. Те лементь колективесь аволь весть кемекстакшнызе.
Морокуронть репертуарозо пек сюпав. Сынь морсить кода эрзянь кезэрень ды неень шкань морот, истя жо рузоньгак. Улить репертуарсост раськень обрядткак: «Вирьавантень сюконямо», «Инечи», «Эрьбанедля» ды лият. Сынст яла невтить раськень кодамояк кенярксчинень алтазь мероприятиятнестэ, эли жо православной покшчистэ. Нама, раськень кенярксчинь-коень невтемась моли эрзянь кельсэ. Теке марто, обрядтнэнь невтемантень эрьва кодамо тюсонь парсейсэ мазылгавтови эли килейне, эли калень тараднэ.
Эряви евтамс, «Чилисема» ансамблянть пек мазыйть оршамост. Ды сынст ули эсест историяст.
– Васняяк, кода морокурось ансяк пурназель, аватне оршамот эстест стакшность сынсь. Костюмонть юрсо ульнесь юбка, мазый ковта ды икельга паця. Мейле теекшнинек лия костюмт, косо уш пулайгак ульнесь, эрьва кодат мазылгавтомат, – евтни Людмила Николаевна. – Нама, оршамотне мазыельть, ансяк минек сельменек сявадыльть лиятнень лангс. Кодамояк покш кенярксчис мольтяно, тосо ансамблятне весе раськень вадря костюмсот, а минек истят арасть. Ды весть минек Пикшня велень раськень музеев сакшнось Мордовия Республикань сестэнь Прявтось Н.И. Меркушкин. Сонензэ минек мода лангсо касозь сюпавчитнень марто мольсь Любовь Петровна Доронина ды мерсь: «Содатадо, минь вана эрьва кува ардтнетяно, нейдяно кодамо мазый оршамосо весе морсить-киштить, истя бу тенек эрявольть эрзянь раськень костюмт». А сон мери: «Илядо мелявто!» Ды алкукс, зярыя шкань ютазь велень чинть тешкстамо миненек сакшность Пикшня велесэ чачозесь, Мордовиянь заслуженной писателесь Павел Кириллович Любаев ды «Торама» ансамблясь, конатне мартост усксть покш казне – вадря ды мазый костюмт, конатнень оршинек сеске. Ды ульнинек истят мазыйть, те шкас неть ежомарямотне ванстовсть. Палятнень оршнетяно ансяк покш кенярксчис ды ванстано эйсэст. Неень шкане минек колмо парат костюмонок ды весе сынь стазь Мордовиясо.
Эряви евтамс, «Чилисемань» морыцятнень аволь ансяк оршамост стазь Мордовиясо, минек республикасо сынь свалшкань инжеть. Сакшныть раськень весе кенярксчитнес. Большеболдинской райононть марто шабрацек ашти Покш Игнатбуесь, конась сынст туртов, прок эсест. Ансамблянть тосо содасызь ды вечксызь.
Морокурось –
весе эрямост
Людмила Туршатова чачсь-кассь Саранскойсэ. Нижегородской областень Пикшня велесэ жо чачсь авазо ды тосо эрясть тейтерьканть бабазо, патянзо. Нама, весе каникулатнень Людмила ютавтсь Пикшнясо. Тосо вастызе вечкевиксэнзэяк ды мирденень лисемадо мейле одтнэ кармасть эрямо те велесэнть.
– Морамонть вечкилинь вишкине шкасто саезь. Свал яла мезе-бути моткодинь-морынь. Школасояк, училищасо тонавтнемстэяк морсилинь, – евтни Людмила Туршатова. – Зярдо жо Пикшняв мирденень лисинь, Культурань кудонь сестэнь прявтось недлянь ютазь чийсь тень кудов ды тердимим ансамбляс морсеме. Те шкастонть саезь «Чилисема» ансамблянть ды морамонть марто сюлмавозь весе эрямом.
Ансамблянь лия морсицясь – Людмила Валентиновна Болиева – шабра Игнатбуень Протасова велень. Эсест велесэ авась комсь иеть роботась библиотекасо, зярдо жо колхозось тосо каладсь, мирдензэ ды церанзо туртов робота арасель. Пикшнясь жо аволь васоло ды васня тей эрямо сась Болиевтнень цераст, мейле семияст целанек. Колхозонть пельде тенст макссть квартира ды истя сынь лиядсть теске.
Людмила Валентиновна важодсь фермасо, ульнесь скалонь потявтыцякс, ваз мельга якицякс. Мейле роботась больницясо пидицякс, ней пенсиясо.
Протасовасояк эрямсто морсесь ансамблясо: «Мон аватненень яла евтнян, Протасовасо минь сеедьстэ яла пьесат путнилинек. Парторгонок ульнесь пек активной ломанесь, свал яла кодамояк пьеса сонсь арсиль. Минь жо невтилинек сонзэ кенярксчитнестэ, ломантненень вечкевильть. Ды зярдо тердимизь «Чилисема» ансамбляв морамо, эзинь отказа. Пенсиясо шкась ламо, а тесэ свал тевсат, ломань ютксат».
Валентина Михайловна Седойкина ансамблясонть васенце читнестэ саезь. Сон малав 40 иеть важоди Культурань кудосо культорганизаторокс.
– Культурасо важодеманть кочкия, штобу седе ламо шка эсь семиянть туртов явомс. Сынь аволь куватьс, кадовинь жо, кода те сеедьстэ эрси, свалшкас, – тешксты Валентина Михайловна. – Ансамблянть марто косо ансяк араселинек. Ды весе неть ардтнематне, ломантнень марто вастовоматне, кенярксчитне кармасть эрямонь пельксэкс.
Антонина Васильевна Камбаратова весе пингензэ перть эри Пикшня велесэ. Школадо мейле тонавтнесь Нижней Новгородсо, мейле аламос роботась Арзамассо.
– Монь тримим бабам. Сон вейкине малавикс ломанем ульнесь ды зярдо уш сыредсь, эзия кадо ськамонзо, велявтынь тиринь велев. Лисинь тесэ мирденень ды бабам куломазонзо эрясь минек марто. Мон пандынь тензэ сонзэ паронзо кисэ, – евтни Антонина Васильевна. – Морамонтень вечкемась истя жо бабань пельде ютась. Сонзэ вайгелезэ пек мазый ульнесь. Секскак кудосо мон свал моран. Одсто, зярдо эйкакштне вишкинеть ульнесть, сыненст яла мадемадо икеле морылинь, весе тевтнень истя жо моро марто топавтылинек. Паряк, тень коряс, покш тейтерем школасо истя жо свал морыль.
Ансамблянь эште вейке морыцясь – Елена Филипповна Ежова. Сон вана уш 20 иеть важоди почтальонокс, содасы велень эрьва эрицянть. Аванть весе семиязо сюлмавозь музыканть марто. Тетязо-авазо ды лелязо свал налксильть гармошкасо, морамонтькак вечкильть. Ды Елена Филипповнаяк весе эрямонзо перть моро марто.
Неть аватне – раськень культуранть ды эрзянь койтнень-кирдатнень алкуксонь ванстыцят.
Юлия Еремина
Фотось Егор Горинэнь.