Декабрянь 12-це чистэ масторонь келес тешкставсь Российской Федерациянь Конституциянь чись. Мордовиясо сонензэ алтавсть ламо мероприятият. Кенярксчиденть икеле Республикань Кудосо ютавтовсь кенярксчинь промкс, конась алтазель РФ-нь Конституциянь чинтень. Сонзэ ушодовомадо икеле весе пурнавозтне кунсолызь Российской Федерациянь Гимнанть. Теде мейле Мордовиянь Прявтось Артем Здунов евтась поздоровт те покшчинть кувалма, сон пачтясь те кенярксчинть смусттензэ ды эрявиксчидензэ.
«Конституциясонть путозь минек эрямонь юрось, те минек паро эрямонь ды виевгавтомань гарант, сон топавты политической, экономической ды военной сэтьмечинть, – тешкстызе Артем Здунов. – Минек Президентэнть лезксэнзэ вельде минь панжтано од предприятият, вадрялгавттано оштнень ды велетнень. Эряви путомс ярмакт медицинантень, образованиянтень, культурантень ды спортонтень, секс мекс весе те лезды ванстомс ломантнень, ламолгавтомс чачтоматнень ды кувалгавтомс эрямонть».
Истят питнейчитне, кода Тиринь масторонтень кемевиксчись, раськетнень ютксо чарькодемась, тиринь модантень лезэнь кандомань бажамось, эрявикст весе шкатнестэ. Самай секскак масторонь Президентэсь яволявтызе сы иенть Россиянь раськетнень вейсэндявомань иекс.
Мордовиянь Прявтось евтась сюкпря минек боецтнэнень, седе пек сетненень, кить ней передовойсэть. Государственной зярыя покш казнеть максозельть куломадо мейле. Маштовозтнень ледстизь чатьмонемань минутасо.
Казнеть максозь Отечествань ламот ванстыцятненень. Артем Здунов казсь Мужествань ордент Саранскойстэ Андрей Макеевнень ды Александр Силантьевнень. Кавонест геройтне тердезельть церемониянтень малавиксэст марто. Андрей Макеев Кристина нинзэ марто кастыть колмо эйкакшт: покш церынентень вете иеть, вишка тейтернентень – 9 ковт. Ды сехте эрявиксэсь, кода кортыть мирдть-нить, – те вейке-вейкеде мелявтомась.
Александр ды Екатерина Силантьевтнень кавто эйкакшост – сынь уш школасо тонавтницят. «Кирдтяно каштанчи эсь тетянок кувалма, эдь сон Тиринь масторонь ванстыця», – мерсть Оля ды Дима Силантьевтне.
Кенярксчинь промкссонть ютавтовсь эште вейке покш тев – кемнилее иесэ школасо тонавтницятненень паспорттнэнь явшемась. Республикань Кудонтень тердезельть од ломантне, конат сайсть изнявкст тонавтнемасо ды спортсо. Республикань Прявтось евтась тенст поздоровт прявт документэнь получамонть кувалма. «Покш честь получамс паспортт Ине Изнямонь 80 иетнень топодемань иестэнть, – мерсь сон. – Покш мелем, штобу тынь кирдевлинк мельсэ те чинть. Паро улевель, бути Изнямонь 100 иетнень тынь тешкставлинк эсенк эйкакшонк марто. Те кемема сеньс: минек государствась карми эрямо, карми ванстомо геройтнень» – мерсь МР-нь Прявтось.
Республикань эрицятненень казнеть истя жо явшесть Мордовия Республикань Государственной Собраниянь Председателесь Владимир Чибиркин ды МР-нь Правительствань Председателесь Батыр Эмеев.
Валентина Юдина