Суббота, июня 22, 2024
Важное

Маень 27-це чистэ тешкстави Библиотекатнень весероссиянь чись. Те кенярксчинть тешкстыть сеть, кить вишка шкасто саезь тонавтыть минек вечкеме ды ловномо книгатнень, кить невтить ёвкстнэнь ды художественной произведениятнень лия ёнов а молиця масторонть, кить сехте вадрясто содасызь, кода явовтомс книгань ловномантень меленть.

Истятнэнь ютксот Кочкуровань райононь Центральной библиотекань важодицятне. Сынь пек парсте содыть, кода неень шкане важодема ловныцятнень марто, штобу книгань ловномась сынст туртов улевель эрявикс ды вечкевикс тевекс.

Елена Борисовна Войновань чачома-касома ёнксозо Кочкурова велесь. Тесэ прядызе средней школанть ды мольсь тонавтнеме М. Е. Евсевьев лемсэ Мордовской государственной педагогической институтонь филологиянь факультетэв. Институтонть прядомадо мейле велявтсь тиринь велев ды кармась важодеме Кочкуровань райононь центральной библиотекасо. Кода корты сонсь Елена Борисовна, библиотекав мольсь нурька шкас. Эдь сестэ сонзэ эйкакшозо эштё овсе вишкинель.

– Библиотекарекс роботамо самодонть икеле арсинь, зярскак те тевсэнть важодян, эйкакшось аламодо касы, ды муян эстень лия тев, – корты Елена Войнова. – Весемесь жо лиссь овсе лиякс. Роботан тесэ уш малав колоньгемень иеть. Малав ниле иеть – библиотекань прявтокс. Те шкас мельсэнь ашти важодемань васенце чись. Ансяк совинь залонтень, ютынь книгань лавсятнень юткова ды ёжомгак натой паролгадсь, мария прям эсень таркасо. Книгань ловноманть мон вечкса эйкакшпорасто саезь ды, зярдо сынь библиотекав важодеме, тевесь вечкевсь сеске.

Неень шкане Кочкуровань центральной библиотеканть юрс совить райононь велетнесэ аштиця весе библиотекатне – эйстэдест весемезэ 13. Важодицятнеде лововить 18 ломанть. Вететне эйстэст роботыть Центральной библиотекасонть, вейке – Кочкуровань Эйкакшонь библиотекасонть, лиятне – велетнень библиотекатнесэ.
Кочкуровань прявт библиотекасонть важодить методистэсь – Надежда Максимовна Исайкина, комплектованиянь ды обработкань отделсэнть – Наталья Васильевна Еврюшкина, обслуживаниянь отделэнь библиотекарекс роботыть Елена Николаевна Адмайкина ды Елена Анатольевна Зыбкина. Эйкакшонь библиотекасо вишка ловныцятнень марто важоди Елена Николаевна Васькина. Эйкакштнень туртов библиотекась панжозь Кочкуровань средней школанть юрсо.
Неень шкане Кочкуровань райононь библиотекатнень вейсэнь фондсонть лововить 97 382 экземплярт книгат. 31 993 экземплярт – прявт библиотеканть фондозо.

– Меельце шкастонть од книгатнень рамамонть лангс седе кармасть явомо ярмакт. Те тевенть топавты Мордовия Республикань Культурань, раськень политикань ды архивень тевень министерствась. Покш сюкпря тенст тень кисэ. Эдь библиотекатнень фондонть одкстомтомась – тевесь эрявикс. Неень шкань литературантень ловныцятне явить покш мель. Ды од книгатне важодемасояк панжить од ёнкст, – тешксты Елена Борисовна.

2023 иестэ Кочкуровань райононь Центральной библиотекась фондонть одкстомтоманзо туртов ярмаконь лезксэнть получамга примась участия пелькстамосонть. Сынь кармасть конкурсонь изницякс ды библиотекантень явозель 328870 целковоень покшолмасо субсидия.
– Ней кочкатано эрявикс литературанть. Маласо шкасто эсь ловныцятнень кенярдовтсынек од книгасо, – ёвтни Елена Войнова. – Истя жо Од Пурнянь велень библиотекась пелькстась «Культурань сехте вадря учреждения, конась важоди велесэ» конкурссонть. Сынь истя жо понгсть изницятнень юткс ды явозь ярмактнень лангс библиотеканть туртов раминек ноутбук, ламо функциянь центра ды сонзэ туртов эрявиксэнть. А вана Сурвелень ловнома кудось «Культура» национальной проектэнть лувсо вадрясто витнезель-одкстомтозель, рамазель мебель, эрявикс оборудования ды тосо ней важоди неень шкань модельной библиотека.

Кода ёвтнесь Елена Войнова, неень ловныцятне башка мель явить художественной литературантень. Эрсить шкат, зярдо седе вешевицякс ульнесь тонавтнемань литературась. Сестэ фондтнэнь одкстомтомстояк истямо литературантень явовиль башка мель. Ней жо кудосо весень ули Интернет, секскак истямо литературантень меленть явить аволь истя пек.

Башка мель течи явови эйкакшонь литературантень. Прявт библиотекаренть валонзо коряс, ютазь иестэ вишка ловныцятнень туртов рамась ламо мельстуиця эрьва кодат книгат.
– Минек улить свалшкань сакшныцянок, конатне книгань ловномантень явить покш мель. Сынь сакшныть недлязонзо зярыяксть. Минь уш содасынек сынст вешемаст ды бажатано кармавтомс тенст вечкевикс литературанть. Истят ловныцятне минек туртов пек питнейть, – тешксты Елена Борисовна.
Библиотекась ламо важоди ловныцятнень туртов эрьва кодат мероприятиятнень анокстамонть-ютавтоманть лангсо. Тесэ тематне ванкшновить эрьва кодат. Ламот вастовоматне алтавить содавикс сёрмадейтнень чачома читненень, государственной покш кенярксчитненень, ютавтовить литературань чокшнеть, райононь содавикс ломантнень марто вастовомат, патриотической мероприятият.

Койсэнь, кинь туртовгак а карми салавачикс се, неень библиотекатнесэ важодить содамочи марто, тевень содыця ды ёроков ломанть. Зярдо электронной ресурстнэ кеместэ совасть минек эрямонь весе сфератнес, библиотекасо важодемась ашти аволь ансяк книгань явшемасонть. Те профессиясь кеместэ сюлмавсь музеень тевенть, краеведениянь тонавтнеманть, архивень тевенть марто, тесэ пурнавить ды тевс нолдавить данноень компьютерной базатне, теевить каталогт ды эрьва чистэ покш робота ветяви ловныцятнень марто.
Надежда Максимовна Исайкина Кочкуровань райононь Центральной библиотекасо роботы методистэкс. Ловнома кудосонть важодемань кизэ ушодовсь кемень иеде икеле.
Надежда Исайкинань чачома-эрямо ёнксозо – Кочкуровань буесь. Школадо мейле тейтерь-авась прядызе Н. П. Огарёв лемсэ МГУ-нть, «Государственное муниципальное управление» специальностенть коряс. Зярыя шкань перть роботась Эрицятнень социальной защитасо. Мейле эрямось ладявсь истя, мольсь библиотекав. Ды овсе тень коряс а янкси.

– Библиотекарень тевенть мон пек вечкса ды кодамояк лия профессиясо эсь прям а неян. Кадык савкшны ютавтомс ламо мероприятият, роботамс эйкакш марто, ялатеке профессиясь сэтьме. Библиотекасо эсь прям марян пек уцяскавокс, – тешксты Надежда Исайкина.

Библиотекатнень тевсэст кода икелеяк, истя нейгак кадови краеведениясь. Эдь эсь ундокстнэнь ды историянть стувтозь, а содави вандынь шкась, кодаяк а чарькодеви ды а путови питне течинь чинтень.
Краеведениянь важодемасонть покш мель явови минек ёнкссо чачозтненень ды касозтненень, поэттнэнь ды прозаиктнень эрямонь ды шкинемань кист тонавтнемантень. Тесэ минек Мордовиянь автортнэнь книгаст, тесэ нолдавиця журналтнэ ды газетатне. Пачтяви, кодамо писателенть юбилеезэ.
Теке марто башка таркасо ашти од ломантнень духовно-нравственной ды патриотической воспитаниясь. Неть ёнкстнэнень явови покш мель ды ютавтовить эрьва кодат мероприятият. Кода тешкстыть библиотекань важодицятне, од ломантне – минек вандынь чинек. Секскак сынст эйстэ эряви кастомс эсь масторонь алкуксонь патриотт.
Кочкуровань райононь Центральной библиотекась – те тарка, косо эрямось лаказь лаки. Вейс пурнавкшныть эрьва кодамо иесэ ломанть, сынст туртов, книгань ловномадонть башка, тейневить лезэнь кандыця, паро вастовомат. Тесэнь важодицятне теить весементь, кадык сыцятне седеяк ламо ловныть ды книгантень вечкемась карми мартост эрямонь перть!

Кочкуровань райононь Центральной библиотекань библиотекартне эсь тевенть содасызь ды топавтыть сонзэ неень вешематнень коряс. Кие тей сакшны, видестэ ёвтасызь, сынь – алкуксонь библиотекарть.

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».