Суббота, июня 22, 2024
Важное

Минек газетань лопань мазылгавтыцякс ды инжекс неть читнестэ кармась эрзянь од цёрась, Мордовиянь государственной филармониянь солистэсь ды содавикс этноблогерэсь Андрей Бочканов. Веенстнэ сонзэ лемдить эрзянь цёковокс, омбонстнэ – раськень сюпавчикс. Минь а мольтяно неть мельтнень каршо, мекевлангт, покш ды паро мельсэ ёвтнетяно ловныцятненень, кода неень шкасто эри-ашти эрзянь содавикс морыцясь.



Кода содасызь минек ловныцянок, Андреень чачома-касома тарказо – Рузаевкась. Тетязо, Василий Андреевич, важоди машинистэкс чугункань килангсо, авазо, Людмила Никитична – тонавтыця. Эйкакш пингензэ цёрабаесь ютавтызе Кочкуровань райононь Кацялай велесэ. Тосо эрясь вечкевикс бабазо – Наталья Васильевна. Самай сон тонавтызеяк эрзякс кортамо.
– Вишкинестэ чарькодилинь, мезде эсест юткова кортыть покштне, ансяк кортамо а маштылинь. Кода-бути весть бабам мерсь тень: «Нуцькинем, течинь чистэ саезь мон стувтса рузонь келенть ды карман кортамо мартот ансяк эрзякс. Бути ули мелеть – тонадат тонгак!» Бабань валонзо кеместэ совасть превезэнь. Самай сестэ ушодыньгак кортамо эрзянь кельсэ, – ледстни Андрей.

Школасо тонавтнемстэ Андрей свал невтнесь ёрокчинзэ эрьва кодамо мероприятиясо: киштиль-морыль, ёвтниль стихть. Эряви меремс, сценась салызе цёранть седеензэ вишка шкасто. Уроктнень прядовомадо мейле капшиль музыкальной школав, косо явсь мель «аккордеон» классонтень.

– А сёпса, малавиксэнь ютксо ули истямо ломань, конань лангс ванозь, чачськак мелем сюлмавомс музыканть марто – те монь лелям. Ледстяса, кода эрьва кенярксчистэ сон сыль инжекс седямопелензэ марто ды налксиль советской шкань фильматнестэ эрьва кодат содавикс мелодият эли морот, мон жо кургонь автезь эйсэнзэ кунсолынь, – ёвтни морыцясь.

Школанть прядомадо мейле Андрей сась тонавтнеме Саранскоев. Эсензэ туртов кочкизе Н. П. Огарёв лемсэ МГУ-нь Архитектурань ды строительствань институтонть. Се шкасто сон эзь арсекшне морыцянь карьерадо, ансяк ялатеке студентэнь вейкеяк кенярксчи эзь ютне Андрейтеме. Университетсэ тонавтнемстэ сон совась «Проспект» вокальной ансамблянтень. Юткошкасто явсь мель книгань ловномантень. Ламо ловнось рузонь кельсэ, шкань ютазь, чачсь мелезэ ловномс эрзякскак. Истя цёрась теевсь содавиксэкс К. Г. Абрамовонь шкинеманзо марто.

– Васняяк ловныя «Пургазонть». Мелезэнь пек тусь. Шкань ютазь, теке жо авторонть, ловнынь эштё зярыя произведениянзо. Сёрмадыцянть келезэ – медь, тесэ лия валт а муят. Ловнынь ды дивсинь: кодат ульнесть эрзянь ломанть, кодамо виев раське, кодат койть! Истя мон карминь тонавтнеме эрзятнень историяст. Весе информациянть ловнынь Интернетстэ. Зярдо пачкодинь неень шкань историянтень, чарькодинь, минек раськенть туртов а сатны мезе-бути од, меремс, а берянь эйзэнзэ нолдамс свежа кошт, – мизолдозь корты Андрей.
Ды, мерят, Сонсь Пазось ветизе Андреень неть ломантнень ваксс, конатне седе тов лездасть цёрантень. Кода-бути весть «Студентэнь тундонтень» анокстамсто Андрейнень пшкадекшнесь МР-нь заслуженной артисткась, Мордовиянь государственной филармониянь солисткась Олеся Глебова (конась шкань ютазь теевсь од морыцянтень виев тонавтыцякс ды ялгакс). Авась шнызе сонзэ вадря вокалонзо ды тердизе варчамс прянзо кунсоломасо (прослушиваниясо), конань ютавтсь филармониясь. Андрей тосо морызе рузонь моронть. Жюринтень тусь мельс вайгелезэ ды артистизмазо, секскак сынь саизь цёранть эсест вановт алов. Васняяк сон уставась важодеме договоронь коряс, шкань ютазь саизь штатс. Истя Андрей ушодызе артистэнь шкинеманзо. Зярыя иень ютазь цёрась сёрмадызе «Вай, кодамо!» эрзянь моронть, конась секе жо чистэнть теевсь алкуксонь хитэкс. Истя аламонь-аламонь авторось-морыцясь нолдась зярыя морот, седе тов пурнась «Вай, кодамо!» лементь ало альбом. Эйзэнзэ совасть 20 музыкальной композицият. Эрьва морось чарькодевикс ды ёжонь витиця.

– Монь прявт тевем – эсь моротнесэ пачтямс од ломантненень мель ванстомс, а стувтомс ды а виздемс кортамс тиринь кельсэ. Ды алкукс, кунсолыцятнень ютксо ламотнень кепедеви мелест седеяк пек вечкемс тиринь келенть. Ды кода сонзэ а вечкемс? Эдь эрзянь келесь пек мазый, гайтев, теке моро, – тешкстась Андрей.
Авторонть-морыцянть валонзо коряс, келенть ванстомасо сехте эрявиксэсь се – кудосо-семиясо чачомсто саезь уш эйкакштнень марто эряви кортамс тиринь кельсэ. Ансяк сестэ минек раськесь поладови, келесь карми гайгеме эштё а вейке пинге. Андреень валонзо токасызь эрьванть седеензэ.

Кода алкуксонь профессионал, од морыцясь а соды кодамояк оймсема. Важоди чинек-венек, истя, аволь умок вечкевикс кунсолыцянзо туртов Андрей тейсь алкуксонь казне, морыцясь нолдась омбоце альбом. Лемезэ – «Минь истя эринек». Альбомонтень совасть моронь вете композицият: «Минь истя эринек», «Дока», «Пионы» (рузонь кельсэ), «Акша келуня» (мокшокс), «Велев». Кунсолыцятне вастызь од альбомонть покш мельспаросо. Эрьва морось – ледстнемань пусмо. Кунсоломсто сельме икелев лисить морыцянть эйкакш пингезэ, малавиксэнзэ, вечкевикс Кацялай велесь. Композициятне токить седей ды ойме, эрьвасонть ули домка смусть.

– Монь койсэ, омбоце альбомось седе виев васенценть коряс. А мекс мон истя кортан? Кадык эрьва кунсолыцясь чарькодьсы сонсь, – мизолдозь мерсь морыцясь.
Истя жо Андрей тешкстынзе ломантнень лемест, конатне пек лездасть альбомонть нолдамсто. Васняяк, цёрась ёвтась сюкпря вадря ялганзо ды редакторонзо Саша Данильчевень туртов, кона витни эрзянь ды рузонь моронь тексттнэнь грамматикань ёнксонть коряс. Мокшонь моротнень сёрмадомсто морыцянтень пек покш лезкс максы Оксана Белкина. Ды, нама, покш сюкпря Александр Истихиннэнь, те ломанесь важоди альбомонть аранжировканзо ды ламо лия ёнксонзо лангсо. Сонзэ роботанзо Андрей лемди «ювелирнойкс».

Тешкстасынек, Андрей Бочкановонь весе содасызь кода эрзянь ды рузонь эстрадной моротнень авторонть-исполнителенть. Цёранть эрьва морозо – те раськень хит. Андрейнень минь арсетяно а ёмавтомс те киньгак ёнов а молиця шкинемань ёнксонть ды седе товгак раштамс-таштамс моронь сюпавчинть!

Алена Артемьева

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».