Кадык кизэсь эзь марявояк, кода ютась, Галина Осипова течи мельспаросо сырги школав, косо вастови тонавтницянзо марто. Сон свал учи таштамковонь 1-це чинть, зярдо ушодови тонавтнема од иесь. Эйкакштнеяк чиить каршонзо ды казить цецят. Озыть од партатнень экшс. Ней классозояк уш покш – 7 «А», эйсэнзэ 27 тонавтницят.
Кода кочкизе тонавтыцянь кинть? Те васенце кевкстема, конань максынек минек героинянть туртов. Галина Анатольевнань авазо – Анна Васильевна Осипова – пингензэ перть важодсь Покш Березникбуень Шугурова велесэ эрзянь ды рузонь келень тонавтыцякс. Вишка шкасто Галя свал налксесь «школынесэ», косо, нама, ульнесь тонавтыцякс. Немецень келень! Пек уш вадряль немецень келень тонавтыцяст Мария Фёдоровна Тизяева. Уроктнеде башка, сон ветясь интернациональной ояксчинь клуб. Те кружоконтень якась весе школась. Тонавтницятне кучнесть сёрмат ды посылкат Болгариянь, Германиянь эйкакштнень туртов. Истя кирдсть ялгаксчи.
Г.А. Осипова сырнень медаль марто прядызе Шугуровань школанть. Мольсь тонавтнеме Н.П. Огарёв лемсэ МГУ-нь филологиянь факультетэнь «Романо-германская филология» отделенияв. Кочкизе немецень келенть. Прядызе университетэнть 1994 иестэ. Кавто иеть важодсь Покш Березникень школасо. Мейле сась Саранскоев, кармась тонавтомо 8№ школасо. Седе тов – 21 № школасо (ней сон арась), те ульнесь вишка школа, косо весе вейкень-вейкень парсте содасть ды лездасть. Самай тосо ушодсь ветямо эрзянь кель. Содасть, сон эрзянь ломань, секскак энялдсть кундамс эрзянь келень тонавтомантень.
– Се шкась ульнесь сехте стака. Эрзянь келень учебникть, методической пособият арасельть. Мейстэ ушодомс? Келенть карминь ветямо немецень келенть лувсо, теке методиканть коряс. Монсь теинь программат, тематнень сайнинь сетнень жо. Кедьсэнь ульнесь ансяк пор ды аштинь доска икеле. Эйкакштнень марто морыньгак, киштиньгак, валт тонавтнинек. Мейле кармась седе шожда. Эйкакштненень седе вечкевсь тонавтнемс эрзянь келенть, аволь немецень. Ды начальной класстнэсэ те шкас истя. Эрзянь келесь ламонень малавикс, кие корты, кие чарькоди. Нама, седе ламо рузт ды лия раськень. Тетятнень-аватнень тердтнян панжадо урокс, кадык ваныть, кода молить тиринь келень уроктне. Минек истят стакачить арасть, зярдо тетятне-аватне молить каршо. Сюкпря меревлинь тенст, косо бу аволинь васто – свал пшкадить, шумбракстнить, – ёвтни тонавтыцясь.
Галина Анатольевна ней уш кемень иень перть важоди Саранскоень 32 № школасо. Эрзянь кель вети 2-це классто саезь 7-це классос, немецень кель – 7-8-це класстнэсэ. Ули 7 «А» классозо, кона кецявты. Эряви меремс, 2016 иестэ сон ютась «Эрзянь ды мокшонь келень, литературань тонавтыця» программанть коряс профессиональной переподготовка.
– Галина Анатольевна, ней сатныть учебниктне?
– Ней весе, мезе эряви – ули. Нолдазь вадря учебникть, методической пособият, программат. Ансяк вейке мелявксось – пек аламо уроктне: недлязонзо вейке час. Эйкакштнеяк кевкстнить: мекс недлязонзо ансяк вейке эрзянь уроконок? Путнетяно оценкат. Аволь эрьва школасо истямо лувось. Уроксо тевс нолдан «Чилисема» журналонть. Эйкакштне вечксызь кроссвордтнэнь, пеедькшнематнень, валморотнень.
– Тонавтницятнень ютксо улить эрзят?
– Сындест иеде иес седе аламо. Улить, конат чарькодить. Кавто тонавтницян мокшот (тетяст-аваст), сынь бажить тонавтнемс эрзянь келенть.
– Галина Анатольевна, ламо тетятне-аватне ризныть-талныть кудонь заданиятнень коряс. Бути семиясо арасть келень содыцят, сынст те седеяк тандавтни. Заданият макснетядо?
– Кудонь заданият а макснян, весе кенертяно теемс уроксо. Ансяк кармавтан теемс творческой задания – артомс мезеяк ютазь теманть коряс. Кой-кить сынсь вешить теемс презентация, реферат эли кедьсэ теезь сувенирт. Саемга, ютынек «Мордовиянь ошт» теманть. Ламот тейсть презентацият. Сеедьстэ якатано экскурсияв И.Д. Воронин лемсэ краеведениянь музеев, эрзянь ды мокшонь раськень культурань музеев. Эйкакштне пек вечксызь Химмашсо Сущинскоень куросо аштиця покштянь-сырькаень чувтонь кеврунгонть. Эрьва классонть ветния тов.
32 № школасо тонавтнить тёжадо ламо эйкакшт. Ней вейке сменасо ды ансяк вете чить. Тесэ ютавтневи гуманитарной наукань ков. Сайнить эрзянь келенть, ветить панжадо урокт, вастовомат, ловныцянь пелькстамот, писательтнень марто вастовомат, КВН-т. Галина Анатольевна арси сценарийть, сёрмады стихтькак, конат лиснить «Чилисема» журналсо. Паро невтевксэкс тензэ кармась С.М. Люлякина сказительницась. Сон сеедьстэ сакшнось Шугуровань школав, сёрманзояк ванстовить. Авазо мартонзо кирдсь ялгаксчи.
2012 иестэ Галина Анатольевна пелькстась «Иень тонавтыця» республикань конкурссо, кода эрзянь келень тонавтыця. Сестэ сон пелькстась эрьва кодамо предметэнь коряс тонавтыцятнень марто. Ютась финалс, лиссь призёрокс. Казнекс кучнизь Марий Элсэ Таир эрьке чирев, тосо весе Россиясто сазь тонавтыцятне вастневсть форумсо. 2016 иестэ пелькстась «Педагог-исследователь» муниципальной конкурссо. Аволь весть изнякшнось «Лучшая методическая разработка урока, внеклассного мероприятия учителя мордовского (мокшанского, эрзянского) языка» ошонь конкурссо.
Тонавтницянзояк парсте невтить пряст эрзянь келень коряс регионъютконь олимпиадасо, шкинемань эрьва кодамо пелькстамосо. Сынст ютксо Мария Чекайкина сайсь «Билингва» эйкакшонь творчествань ошонь панжадо конкурссо Московсо 1-це тарка.
Г.А. Осипова вети Саранск ошонь округонь эрзянь ды мокшонь келень тонавтыцятнень методической вейсэндявкс. Тонавтыцятне пурнавкшныть вейс, кортыть тевдест-валдост, яволявтыть, кинень, кодамо школав молить панжадо урокс содамочинь пурнамо-таштамо, ютавтыть эрьва кодат вастовомат. Саемга, эрьва иестэ пурныть «Келесь – раськень ойме» вастовома. Тов сыть тонавтыцят, конат сынсь сёрмадыть стихть. Ловносызь весень икеле, тердить минек поэттнэньгак. Бажить кирдемс сюлмот эрзянь ды мокшонь ошонь весе тонавтыцятнень марто. Лездыть од тонавтыцятненень. Эрьвантень ушодомс стака. Сынст пельдеяк ули мезес тонавтнемс. Тонавтыцясь улезэ паро невтевксэкс весень туртов.
Учителенть чуросто эрси юткошказо. Галина Анатольевна икеле ламо мель явсь кодамонтень. Кодсесь цёрынензэ туртов шапкат, свитрат, штанат, комбинезон. Эстензэяк эрьва мезе. Ней пек вечки номерэнь коряс артомо. Артсь ламо картинат. Валонзо коряс, те шкане превтне ды оймесь оймсить. Истя жо ламо ловны. Сехте вечкевикс книганзо – Д. Дефонь «Приключения Робинзона Крузо» ды Н. Эркаень «Алёшка». Кадык эйкакшонь книгатне, ялатеке муи эстензэ мезеяк од, шкань ютазь – таго ловносынзе.
Кудосо вансты кезэрень шкань эрзянь оршамопель. Сонензэ сядодо ламо иеть. Те сырькаензэ ёндо малавиксэнзэ пельде сатотсь. Коцтось пек калгодо. Кода икеле эйсэнзэ якасть? Машинкасо муськемадо мейлеяк ве викшневкс эзь ёма ды эзь ола. Оршамс эйсэнзэ а оршни, вансты. Сайни урокс, невтни эйкакштненень.
Ушодовсь тонавтнема од иесь. Кадык сон весень туртов юты шождасто, лезэвстэ!
Татьяна Маторкина