Октябрянь 26–28-це читнестэ Челябинской областень Миасс ошсо ютась финнэнь-угрань культурань «Пантеон» фестиваль. Сонзэ анокстыцякс кармась «Иненармунь» эрзянь ды мокшонь раськень-культурань центрань прявтось Ольга Лысенко (фотосонть). Фестивалесь ютавтовсь Культурань инициативатнень Президентэнь фондонть лезксэнзэ вельде. Мордовиянть пельде Челябань ёнксов якасть «Мерема» этнографической фольклорной студиясь ды «Варма» этно-арт-театрась.

– Уралонь модатнесэ эрить финнэнь-угрань зярыя малавикс раськеть: эрзят, мокшот, марить, удмуртт, комить, хантыть ды мансить. Ризнэвти, неень шкань од ломантне а содыть покштяст-бабаст культурадонть ды историядонть. Секскак чачсь мель содавтомс минек региононь эрицятнень финнэнь-угрань раськень фольклоронть, художественной ремеслатнень марто. «Иненармунь» минек раськень культурань центрась важоди кавто иеть. Изнинек грант, конань вельде содавттано ломантнень лия раськень культуратнень марто фольклоронть вельде. Сакшность тенек педагогт Мордовиясто, Марий Элстэ, Коми-Пермяцкой округсто. Ютавтынек лекцият университетсэ, эйкакшонь искусствань школатнесэ, – пачтясь Ольга Лысенко.

Эряви меремс, Челябинской областьсэ парсте вастызь МР-нь Правительстванть юрсо Гуманитарной наукань НИИ-нь научной важодицянть Игорь Зубовонь. Зярыя вузонь студенттнэнень сон ёвтнесь финнэнь-угрань раськетнень этнической мифологиядост, кода кезэрень шкань образтнэ ды сюжеттнэ совасть неень шкань искусствантень ды культурантень.

Седе тов алкуксонь казнекс кармась «Мерема» этнографической фольклорной студиянь концертэсь, кона киньгак эзизе кадо мельтеме. Концерттнэ ютасть колмо ошка: Миасс, Сатка, Челябинск. Эрьва косо ульнесть ваныцятнень марто лембе кортамот.