Четверг, ноября 30, 2023
Важное

Надежда Владимировна Бочкановань (тейтерькс – Мартынова) содаса пек умок. Ледстневи, советской шкатнестэ, кавксоньгеменце иетнестэ, савсь тень улемс Кочкуровань райононь Кацялай велесэ. Те шкас эзь стувтово сынст покш, од ды мазый кудост, косо ояксчисэ эрясь ламо эйкакшонь триця Мартыновтнень семиясь.

Ледстнематнес кадовсь, кода лембестэ ды седейшкава вастымизь кудазортнэ. Покш семиянть лангс апак вано, кудопотмост цивтёрдсь ваньксчисэ. Эрьва кедьёнксось эсь таркасонзо. Сехте пек жо ледстневицякс кадовсь, кодамо ояксчисэ ды вейке-вейкень чарькодемасо эрясь те семиясь. Ламо шка а эряви, штобу редямс эрьва семиянть лувонзо, сеске неяви ды маряви, кода бу ломантне авольть кекше оймеёжост.

Владимир Тимофеевич ды Елена Епифановна трясть-кастсть кавксо эйкакшт. Колмонест тейтерест – Таисия, Любовь ды Надежда – тонавтнесть Н. П. Огарёв лемсэ Мордовской госуниверситетсэ, цёратне истя жо муизь эрямо кист ды уцяскаст.

Те семиясь важодемань вечкиця, ламо тевс бажиця. Кардазпотмост свал пешксель ракшадо, мезест ансяк арасель… Виде, тетяст-аваст пинге важодсть Кацялай тиринь велень хозяйствасонть, кудоютконь тевтнень савсь топавтомс эйкакштненень, вейке-вейкень лангс апак невтне, сынь тейсть весементь, мезе кармавтсть тетяст-аваст. Ков аволизь кучо: садпирев, кардазов эли вишкинетнень ваномо, кияк каршо вал эзь ёвта.

Кода уш вере тешкстынек, весе тейтертне тонавтнесть вузсо. Надежда школань прядомадо мейле кочкизе Н. П. Огарёв лемсэ МГУ-нь филологиянь факультетэнть. 1997 иестэ, сонзэ парсте прядомадо мейле, ушодсь важодеме А. С. Пушкин лемсэ Раськень библиотекасонть, васня финно-угрань литературань секторонь прявтокс, 2009 иестэ саезь – раськень ды краеведениянь литературань отделэнь прявтокс.

Надежда Владимировна свал бажи одонтень, сон покш путовкс тейсь «Литературный фестиваль «Молодые голоса» проектэнть топавтомасо. Сон ульнесь алтазь од сёрмадыцятненень, конатне варчнить эсест виест сёрмадомасонть.  Те иестэнть библиотекасо ютась «Марафон наставничества» проектэсь, конасонть ламо тевть топавтсть Надежда Владимировна ды сонзэ марто важодиця ялганзо.

Содазь, неень шкане ламот документтнэ конёв лангсто ютавтовить электронной лувс. Н. В. Бочкановань бажамонзо вельде ванкшнозель ды тевс нолдазель «Электронная коллекция произведений мордовских писателей из фондов Национальной библиотеки им. А. С. Пушкина РМ, опубликованных в 1920–1930-е годы» проектэсь. Истя жо сон участвовась тиринь кельтнень медиа-проектсэнть, сонзэ вельде вейке порталс пурнавсть Российской Федерациянь территориясо электронной библиотекатнесэ уликс весе финно-угорской материалтнэ. 2014 иестэ Надежда Владимировнанень прась уцяска улемс Российско-Финляндской культурной форумсонть, Финляндиянь Оулу ошсо сон кортась Мордовия Республикань А. С. Пушкин лемсэ Раськень библиотекасо важодицятнень пельде. Теке жо иестэнть сон кочказель эрзя-мокшонь VI инекужонь делегатокс, сонзэ ютавтомадо мейле мелензэ-арсеманзо печатазельть республикань изданиятнесэ.

Эрзянь тейтерь-авась весе седейсэ ризны раськень ды краеведениянь литературанть ванстоманзо ды нолдамонзо кисэ, аноксты статьят республикань общественной деятельтнень ды писательтнень юбилеень дататнес. Сеедьстэ эрси ветицякс сыненст алтазь покш читнесэ. Мордовиянь содавикс ломантненень ды исторической событиятненень Надежда Владимировна аноксты теле-радиоинформацият эрзянь кельсэ. Сон ламо шка ютавты писательтнень, учёнойтнень, Мордовиянь краеведтнэнь автографост марто изданиятнень фондонь анокстамонтень, ков истя жо совить минек ёнксонь содавикс ломантнень произведенияст, кедьсэ сёрмадовкстнэ, фотодокументтнэ ды казезь книгатне. Н. В. Бочканова, кода тевензэ парсте содыця ломань, кинь домкат содамочинзэ, практикань ды методикань лезкс максы аволь ансяк эсенек республикань библиотекатненень, истя жо Мордовиянь томбале улезтненень, косо эрить минек раськень ломанть. Тешкстасынек, сон сеедьстэ эрси республикань томбале эриця эрзятнень ды мокшотнень кедьсэ. Истя, Эрзя-мокшонь литературань ды Эрзя-мокшонь культурань ютавтомань читнестэ сон якась Чувашиянь – Порецкой, Ульяновскоень – Инзань, Пензань – Шемышейкань ёнкстнэс. Ков бу аволь моле Надежда Владимировна, эрьва косо бажи тонавтнемс одонть ды тосто самсто весе лезэвенть бажи нолдамс тевс.

2015 иестэ Н. В. Бочкановань кочкизь Эрзя-мокшонь регионъютконь общественной организациянь Пролетарской местной отделениянь прявтокс. Сон сеске седейшкава кундась те общественной тевенть эрязасто топавтомо. Васняяк ояксчинь сюлмот ладясь Саранск ошонь Пролетарской муниципальной администрациянть, Светотехстроень «Луч» Культурань кудонть, «Ламзурь» народной фольклорно-этнографической ансамблянть марто, ков сонськак сеедьстэ якси морсеме. Вейсэ ютавтозь пек ламо эрьва кодат мероприятият тиринь келенть ды культуранть ванстомга ды седе домкасто содамга.

Надежда Владимировна ламо иень перть вейке таркасо парсте важодемань кисэ тешкстазь ламо казнесэ, конатнень ютксо: «МР-нь культурань заслуженной важодиця» лемесь, МР-нь Правительствань Почетонь грамотась, Мордовия Республикань Почетонь грамотась, «РФ-со литературань иесь» медалесь, «За вклад в развитие библиотечного краеведения России» раськень библиотекань ассоциациянть пельде (РБА) Почетонь грамотась ды истя седе тов. Текенень поладсынек, сон уцяскав ава, вечкиця ни ды мелявтыця сырькай. Мирдензэ Андрей Николаевич марто трясть-кастсть кавто превей эйкакшт. Цёраст, Александр, тонавтнесь «Московский государственный университет путей сообщения – Программная инженерия» специальностенть коряс, прядызе Н. П. Огарёв лемсэ МГУ-нь «Бизнес-информатика» магистратуранть. Анастасия тейтерест тонавтнесь Н. П. Огарёв лемсэ МГУ-нь кавто факультетсэ, вейкенть прядызе якстере диплом марто. Бочкановтнень покш мельспарост – Роман нуцькинест, кона те иестэ тусь васенце классос.

Ноябрянь 6-це чистэ Надежда Владимировна тешкстызе юбилеензэ. Сонзэ лемс ёвтазь ламо поздоровт. «Эрзянь правда» газетань важодицятне вейсэндявить неть паро валтнэс ды арсить тензэ кеме шумбрачи, эрямосо уцяска, важодема таркасо од изнявкст!

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».