Эсь проекттнэде республикань руководителентень евтнесть Саранск ошонь 26№ лицеень эрзянь ды мокшонь кельтнень тонавтыцясь Александр Данильчев, Саранск ошонь 13№ школань прявтось Александр Учеваткин, этноблогерэсь Оксана Белкина. Вастовомасонть истя жо ульнесть республикань спортонь ды од ломантнень политикань министрань васенце полавтыцясь Анастасия Гришнева ды Мордовия Республикань Прявтонь старшей советникесь Виктор Степанцов. 

Од ломантне эсь мелест коряс совавтыть раськень кельтнень цифровой средантень, истя жо теить фильмат. 2018 иестэнть теезель эрзянь кельсэ художественной васенце фильмась «Азор», сонензэ максозель РФ-нь Минкультурань прокатонь удостоверениясь. Картинась невтезель Мордовиянь, Ульяновскоень ды Пензань областтнень кинотеатратнесэ, истя жо Финляндиясо ды Эстониясо. 
Од ломантнень улить ламо арсемаст креативной индустриянть коряс. Покш проекттнэстэ вейкесь, конань лангсо ней важодить од ломантне, - те «Иван Гусев. Подвиг на Курской дуге» документальной фильманть теемась. 
"Фильмасонть евтневи монь тиринь велесэ - Отяжбуень Сабанцелесэ - чачозенть коряс, - мерсь Александр Учеваткин. - 1943 иестэнть Курской дугасонть Прохоровской тюремасонть танконь экипажось, косо ульнесь Гусев лейтенантось, эсь ялгатнень ды батальононь командирэнть идемга каявсь ятонть лангс ды изнизе. Ней анокстави фильманть меельце версиясь, минь пурнатано документнэнь, штобу эйзюрковсто получамс Россиянь Минкультурань прокатонь удостоверениянть". 
Мордовиянь Прявтонтень невтизь фильмань предпремьерной версиянть, республикасонть документальной картинань премьерась ютавтови Изнямонь Чинть каршо.