Мордовиясто СВО-нь зонав таго кучозь гуманитарной лезкс. Минек цёратнень туртов весе эрявиксэнть рамси «Российский фонд мира» региононь отделениясь. Иенть перть республикань эрицятнень пельде весемезэ пурназь 130 млн целковойть. Ярмактнень лангс рамазь се, мезесь васняяк пек эряви.

Лезкс максыть предприятиятне, индивидуальной предпринимательтне, бизнесэсь, эрицятнень пельдеяк сыть ярмакт. Ней кучозь строительной материалт ды инструментт, обмундирования, генераторт, технической средстват, кекшемань алтымат, ярсамопельть ды натой тиринь ёнкссто куляткак – республикань ды райононь газетат.
– Минек эрицятнень лезксэст вельде рамсетяно сехте эрявиксэнть, – пачтясь «Российский фонд мира» раськеютконь общественной фондонь республикань отделениянь правлениянь прявтось Ольга Филёткина. – Мордовиянь цёратне тюрить передовойсэ, ды минь свал аноктано тенст лездамс.

Военнослужащейтненень гуманитарной лезксэнь пурнамонть коряс важоди группа, конась теезь МР-нь Прявтонть Артём Здуновонь кармавтоманзо коряс. Лезксэнть кучомс лездасть Од ломанень центрань цёратне.

– Сюкпря ёвтан ломантненень ды предпринимательтненень, конат кучить ярмакт пурнамс гуманитарной лезкс передовойс, – мерсь Ольга Филёткина.

Сентябрянь 11-це чистэ саезь 18-це чис яволявтозь правовой лезксэнь максомань недля. «Единая Россия» партиянь региононь отделениясо ютыть вастовомат боецтнэнь ды сынст семияст марто, кармить кортавомо талновтыця кевкстематне. Правовой лезкс максыть юристтнэ ды профильной специалисттнэ.