Саранск ошонь округонь Социальной обслуживаниянь комплексной центрань социальной роботникентень Светлана Аверьянованень максозь «Заслуженный работник социальной защиты населения Российской Федерации» почётонь лемесь. Тень коряс Указонть Россиянь Президентэсь Владимир Путин сёрмадстызе 2022 иень ноябрянь 28-це чистэ.
Светлана Аверьянова эсь эрямостонзо малав колоньгемень иетнень алтынзе «социальной роботник» тевентень – лездамс ломантненень. Саранск ошонь округонь Социальной обслуживаниянь комплексной центрасонть сон важоди 2009 иестэ саезь. Кода тешкстыть тосонь прявттнэ, Аверьянова пек парсте топавты эсь тевензэ, весе седейлембензэ максы сетненень, кинь мельга яки. Ашти невтемакс лиятнень туртов. Важодеме эзь лоткакшно мик коронавирусонь коряс пандемиянь шкастонтькак.
Светлана Аверьянова лезды кемгавтово ломаннень. Неть: пенсионерт, инвалидт, Ине Отечественной войнань ветерант ды участникть, те войнасонть маштовозтнень малавиксэст, конатне понгсть эрямонь стакачис ды сынсь а якавить эсест мельга.
Эрицятнень социальной ванстомань ёнкссонть парсте важодеманть кис Аверьянова тешкстазь
МР-нь Эрицятнень социальной защитань министерствань Почётной грамотасо ды Благодарностьсэ, МР-нь Госсобраниянь Почётонь грамотасо. Сон участвови «Старшее поколение», «Доступная среда» государственной программатнень тевс совавтомасонть.
«Пек тень мельспаро, истямо покш питне путсть важодемазон. Ансяк ули мелем меремс, тевем топавтан аволь казнень ды лемень кис. Монень вечкеви лездамс ломантненень, кандомс тенст кеняркст. Эдь лиясто лембе валось седеяк пек леци ормаменькстнэнь коряс», – мерсь Светлана Аверьянова.