Четверг, марта 28, 2024
Важное

Топодсть кавто иеть, кода Россиянь ёнкстнэсэ РФ-нь Президентэнть кармавтоманзо коряс панжовсть региононь управлениянь центрат (ЦУР-т). Истямо центра ули Мордовиясояк. Региононь управлениянь центрась пштистэ ванкшны Интернетсэ ломантнень пшкадемаст, энялдомаст, те эли тона кевкстеманть коряс мелявксост. Лиякс меремс, сынь аштить ломантнень ды государственной властенть ютксо, лездыть стакачитнень витнемасо.


– Кавто иетнень перть эрицятнень пельде ульнесть малав 55 тёжат пшкадемат. 2022 иенть перть уш састь 27,5 тёжат пшкадемат. Государственной властенть пельде каршо валонь максомась учови 3 часонь 45 минутань перть (те средней саевксэсь). «Инцидент Менеджмент» системанть вельде чинек-венек ванновить социальной сеттне, косо ломантне сёрмадыть кодамояк тевень, зыянонь эли мелявксонь коряс. Башка таркасо аштить школасо андомань коряс пшкадематне, – пачтясь Мордовиясо региононь управлениянь центрань прявтось Андрей Барашихин.

Тешкстазель, парсте важодемась ладязь судебной приставонь, здравоохранениянь мельга ваномань федеральной службатнень марто. Меельцентень пшкалить надобиянь максомань коряс. Мелят ламо пшкадемат ульнесть бесконтактной глюкометрань рамамонь коряс (сынь эрявить сахаронь диабетсэ сэредиця эйкакштненень).
Кавто иень перть ютавтозельть социологической 47 исследованият. Те: вакцинациянь, школасо андомань, ошонь паролгавтомань, общественной транспортонь, шукшонь пурнамонь коряс.

Региононь управлениянь центрасо теевсь паро коекс ютавтомс виде эфирт. Неть вастовоматнес тердевить министратне, райононь прявттнэ. Кавксть виде эфирс сакшнось МР-нь Прявтось А. А. Здунов. Ломантненень мереви пшкадемс кевкстема марто виде эфирэнть ютавтомсто. Каршо валтомо а кадови вейкеяк пшкадема.
Эряви меремс, социальной сеттнесэ эсь лопинест (страничкаст) панжизь весе министратне, райононь прявттнэ. Мереви сёрмадомс тенст видьстэ. Парсте эсь пряст невтить Рузаевкань, Инсаронь, Ковылкинань районтнэ. Сынь бажить куроксто максомс каршо вал, лездамс эрицятненень мелявксост коряс.
Чарькодеви, сехте ламо пшкадемат сакшныть Саранск ошонь округсто. Тесэ мелявкстнэдеяк, стакачитнедеяк сехте ламо. Ломантнень талновты ды улить кевкстемаст китнень, ЖКХ-нь сферанть, здравоохранениянть коряс.

Татьяна МАТОРКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».