Од иень перька кенярксчитнестэ, коень коряс, «Надежда» республикань эйкакшонь приютонть свал содавтнить ламо инжеть. Неть читнестэ сетненень, кить кадовсть тетянь-авань мельтеме-вановттомо, кандсть ламо казнеть.
Инжетнень ютксо ульнесть: Саранск ошонь округонь Администрациянь прявтось Игорь Асабин, Мордовия Республикасо Эйкакштнень праваст коряс уполномоченноесь Наталья Юткина, Пролетарской райононь администрациянь прявтось Александр Кузьмин, «София» седеймарямонь фондонь прявтось Мария Лушенкова, Саранскоень епархиянь священнослужительтне.
Васняяк пурнавозтненень лембе вал марто пшкадсь Саранскоень епархиянь секретаресь протоиереесь Виктор Хохлов. Сонзэ паро арсематнес вейсэндявкшность лия священнослужительтнеяк.
Седе тов ушодовсь казнетнень явшемась ды паронь арсематнень ёвтамось. Саранскоень духовной семинариянь проректорось, Успенской храмонь настоятелесь протоиереесь Павел Горбунов ёвтынзе изницятнень лемест «Монь Роштовам» артовксонь пелькстамонть коряс, конась яволявтневи эрьва иестэ.
Эйкакштне пек кенярдсть казнетненень ды инжетненень ёвтасть сюкпря эсь морост ды стихотворенияст вельде.
Тешкстама, истят кенярксчитне максыть од ломантненень кемема вандынь чинтень, витить мелест ды паролгавтыть ёжомарямост.