Эрзятнень ды мокшотнень эрямост пек ламодо аштесь виренть эйстэ. Тестэ чавность-кундсесть идем ракшат ды нармунть, тесэ ульнесть нешке пирест, вирьстэ кочкасть мастумарть, пештть, пангт, надобиякс тикшеть, керясть пенгть, ускозь чочкотнестэ чапсть кудот, кардазт, банят ды тейнесть эрямонь ды важодемань туртов весе лия эрявиксэнть. Виресь ульнесь пек паро ояст, трицяст-андыцяст, ванстыцяст.
Теке марто вейсэ вирьсэ сеедьстэ лиснесть зыянов тевтькак: эли кежей идем ракша каявиль ломаненть лангс, зярдо тона тень овсе а учниль, эли сявордозь чувто прыль лангозонзо вирень керямсто ды лепштилизе, эли эйкакш пангонь-мастумарень кочкамсто кадовиль ялганзо эйстэ ды ёмиль вирьс.
Кемсть, весе неть апаро тевтнень кучни Вирявась. Секс истямо покш мель явсть вирень азоравантень. Сонзэ лемс ютавтнесть покш озкст, кандтнесть вирев ды поволесть тарад пева эрьва кодат казнеть: пилекст, сурсеметь, коцтт, викшнема суреть – мазылгавтневель эсь прянзо ды вирензэ.
Виряванть ловсть тейтертнень ды аватнень лездыцякскак. Бути кинь ульнесь мелезэ тонадомс човинестэ сурень штердеме, кеме коцтонь кодамо, мазыйстэ викшнеме, човалясто кедьксэнь ды кирьгаксонь колсто пурнамо, сетне кандыльть Вирявантень питней казнеть ды энялдсть максомс сынст кедтненень ёрокчи.
Эрьва вирьсэнть эрясь эсензэ Вирявазо.
Виряванть ульнесть лездыцянзо – тиринеть.
Те – пелькашка ломаннеть, гномикть. Сынь вечкильть налксеме пангонь эли мастумарень кочкицятнень, сехте пек – эйкакштнень марто. Ансяк кочкицясь несы пангонть – вант, сон уш арась. Тиринесь кекшизе. Теи эскелькс – кавто ды апак учне несы те пангонть лия таркасто, косо ансяк вана мезеяк арасель. Тиринесь кандызе тов. Те истя сынь налксить.
Бути парсте энялгадомс, тиринетне сельгень прамс пештьсызь кептереть сехте паро пангодо, мастумарде эли пештте.
Бути жо мекскак кежиявтыть, сестэ вейкень пес кекшсызь весе пангтнень ды мастумартнень. Сави мурдамс кудов чаво кептерь марто.
Содыка, мезе те истямось.
1. Кизна шубасо, тельня штапо.
2. Лембене – оршить, якшамоне – кайсить.
Саезь Михаил Брыжинскоень
«Эрзянь пазтнэ ды масторонь
кирдицятне» книгастонть
Артовксось саезь интернетстэ