Видькстан: вечкан сакшномо П.С. Кириллов лемсэ библиотекав. Тосо важодить пек паро ломанть, конат содасызь тевест. Свал ютавтнить седейшкавань вастовомат. Вана августонь 11-це чистэяк тосо ульнесь истямо вастовома. Кортамось мольсь иневанькс Феодор Ушаковдо – те ине флотоводецтэнть, кона калмазь минек республикасо, Санаксаронь монастырьсэ.
Библиотекав састь Ушаковдо од книгат, ды тесэнь важодицятне арсизь содавтомс эсест ловныцятнень сынст марто. Тердизь те вастовомантень Никольской церьковань иереенть Владислав Анатольевич Карякинэнь. Чарькодеви – мекс. Те озатянть ломантне вечксызь чарькодьксчинть ды чевте обуцянть кис. Весень туртов сон теке алкуксонь тетя, киньгак а сёвны, киньгак икеле а покшкавтни, ды теке марто свал муи паро вал эрьва ломанентень. О. Владислав свал эрси од ломантнень марто вастовоматнесэ, церьковасояк педязь-педить сонензэ ломантне. Вана библиотекавгак састь сетне, кить парсте сонзэ содасызь.
Пек мельспаросо ломантне кунсолость о. Владиславонь ёвтнеманзо иневанькс Феодор Ушаковдо: сон педе-пев кемсь Инешкипазонтень, ды те лездакшнось тензэ эрьва тюремастонть лисемс изницякс. Сон седеймарицяль эсензэ ушмантнэнень, кинь кутмордыль, кинень лембе вал ёвтыль. Кода ине флотоводецэнть кинзэ-янонзо пачкодсть Темниковав – тень уш ламот истякак содасызь: Феодор Ушаков сонсь чачсь Ярославской губерниясо, а вана покш лелязо – Иван Ушаков – ульнесь Санаксаронь монастыренть настоятелекс. Секс эрямонь меельце иетнень Феодор Ушаковгак арсинзе ютавтомс тосо, косо важодсь покш лелязо. Сон кадынзе сюпавчинзэ, Петербургонть, сась эрямо васоло велев – Алексеевкав, кона аштесь кавто вайгельбень тарка монастыренть эйстэ. Ды а лисниль келиястонзо. Педе-пев содылизе Пазонь валонть, свал кортыль истя: эрьва тевенть ушодомадо икеле эряви ловномс Псалтирь. Ды васняяк 26, 50 ды 90 псалматнень.
Феодор Ушаков ладясь эрямонзо Инешкипазонть валонзо коряс, тейсь ламо паро ломантнень туртов. Весе сюпавчинзэ, ули-паронзо явшинзе эсензэ маштовозь ушмантнэнь нист ланга, стявтсь эсензэ ярмак лангс госпиталь.
2001 иестэ саезь сон ловозь Рузонь церьковань иневанькс ломанекс. Сонзэ лемензэ ледстнить-тешкстыть октябрянь 2-15-це читнестэ.
Библиотекань важодицятне вастовома чистэнть невтизь весе книгатнень, конатнесэ ёвтневи адмиралдонть. Те выставканть лемезэ – «А изнявиця адмирал».
Меельцекс те вастовомасонть макссть вал моненьгак. Минь умок уш арсекшнинек ютавтомс вастовома Пазонь валонть – Библиянть эрзянь ды мокшонь кельс ютавтомадо. Мон натой пачтякшнынь библиотекав книгаткак. Ансяк вана пандемиясь колынзе весе арсевкстнэнь – кувать савсь учомс те вастовоманть. Ды вана те чистэнть вейс валовсть кавто паро мельтне-арсематне. Эдь Инешкипазось вейсэнди весень минек: адмиралонтькак, кона эрясь седикеле, минекак, конат течи сакшныть библиотекав. Инешкипазось – минек вейсэнь Тетянок. Ды Сонзэ валозо, кодамо кельсэ илязо уле ёвтазь-сёрмадозь, свал – виде. Сюкпря Пазонтень! Вастовомасонть ульнесть эрзянь ды мокшонь ломанть. Сыненст казезельть «Од соткс» мокшонь кельсэ ды «Од вейсэньлув» эрзянь кельсэ книгатне.
Тамара Баргова