Ромодановань центральной районной библиотекасо https://vk.com/bibliorom ютасть Никул Эркай лемсэ республикань 7-це ловномат. Сынь алтавсть сёрмадыцянть чачома чистэнзэ саезь 115 иетненень.
Библиотекась кандтни Н. Эркаень лементь, сонзэ вальмало ашти поэтэнть ледстнемга кеврунго, библиотекасонть явозь башка тарка, кона алтазь сёрмадыцянтень. Те вастовоманть пурнызь А.С. Пушкин лемсэ Национальной библиотекань раськень ды краеведениянь отделэсь ды Ромодановань ловнома кудось (прявтось К.В. Рябова).
Вастовомантень сакшность школань тонавтницятне ды сынст тонавтыцяст. Сынст туртов панжозель сёрмадыцянтень алтазь выставка, косо невтевсть книганзо, фотографиянзо, кедьсэ сёрмадовксонзо. Эйкакштне мельспаросо ловность поэтэнть валморонзо. Неяви, кода парсте сынь анокстасть неть ловноматнес.
Саранскойстэ сакшность А.С. Пушкин лемсэ ловнома кудонь важодицятне Н.В. Бочканова, В.Б. Бояркина, МР-нь заслуженной поэтэсь Г.С. Гребенцов, «Сятко» журналонь ответственной секретаресь Мария Левщанова.
Никул Эркай (алкуксонь лемезэ Николай Лазаревич Иркаев) чачсь 1906 иень маень 22-це чистэ Ромодановань райононь Курилова эрзянь велесэ. Семиясост сон ульнесь сисемеце эйкакшокс. Революциядо икеле прядсь колмо классонь школа. Мейле кучозель тонавтнеме Пензань васенце юронь совпартшколав. Седе тов прядызе омбоце юронь совпартшколанть. Тонавтнесь журналистикань Весесоюзонь коммунистической институтсо. Самай те шкастонть сон явсь покш мель сёрмадомантень.
1932 иестэ лиссь «Модась одкстомсь» поэзиянь васенце пусмозо.
Никул Эркай важодсь мокшэрзянь культурань НИИ-сэ, «Якстере теште», «Эрзянь коммуна», «Советский артист», «Полярная кочегарка» газетатнесэ, «Сурань толт» журналсо.
1934 иестэ ульнесь СССР-нь сёрмадыцятнень васенце съездсэ. Теке жо иестэнть сонзэ совавтызь те союзонь членэкс. Билетэнть тензэ сёрмадстызе сонсь Максим Горький.
Ине Отечественной войнанть ушодовомсто Н. Эркай эсь мельсэ тусь фронтов. Ансяк шумбрачинзэ кувалма мекев савсь велявтомс. Кармась важодеме «Эрзянь коммуна» газетань редакторокс. Те шкане ды войнадо мейле сон нолдась произведениянь зярыя пусмот.
Кодат книгат нолдась поэтэсь ды косо сынь лиссть, теде вастовомасонть домкасто пачтясь А.С. Пушкин лемсэ библиотекань важодицясь В.Б. Бояркина. Эряви меремс, ламо книганзо авторонть лиссть Московонь издательстватнесэ. Валморонзо – центральной газетатнесэ ды журналтнэсэ. Произведениянзо ютавтовсть эрьва кодамо кельтнес.
1962 иестэ Детгизсэ покш тиражсо лиссь «Алёшка» повестезэ. Ловныцятне сонзэ вастызь пек лембестэ! Те сёрмадовксонть кисэ Никул Эркайнень максозель Мордовиянь ленинской комсомолонь премия. Лия содавикс произведениянзо – «Килей ведь», «Од родня», «Митяевы мечтания» – нолдазельть тагояк Московсо.
Сон ульнесь васенце, кинень максозель «Мордовиянь заслуженной поэт» лемесь.
Весе мельспаросо ванызь Никул Эркайде умонь фильманть. Сон снимазь 1971 иестэ.
Н. Эркай ульнесь СССР-нь Верховной Советэнь ды Саранскоень ошонь советэнь депутатокс, ветясь общественной тевть. Сон тусь эрямосто 1978 иень июнень 15-це чистэ.
Кода мерсь МР-нь заслуженной поэтэсь Г.С. Гребенцов, Ромодановань райононь эрицятненень эряви аштемс каштанчисэ истямо ломанест кувалма. «Алёшка» повестесь теевсь ламонь туртов вечкевикс произведениякс. Н. Эркай тонавтсь ансяк парос, улемс чевте седеекс, вадря ломанекс.
Н.В. Бочканова Эрзянь ды мокшонь раськень Регионъютконь общественной вейсэндявксонть пельде Благодарностьсэ казинзе Ромодановань 1 № ды 2 № средней школань эрзянь келень тонавтыцятнень Т.Н. Луконинань ды А.А. Вадиченковань.
Меельцекс весе пурнавозтне путсть Никул Эркайнень кеврунгонтень цецят.
Н. Эркай лемсэ ловноматнес эйкакшонзо марто сакшнось Альбина Александровна Вадиченкова. Сон важоди Ромодановань 2 № средней школасо. Кеменде ламо иеть начальной классо тонавты эрзянь кель.
Чачсь Ицялбуень Полдаська велесэ. Тонавтнесь Ицялонь педагогической колледжсэ черчениянь ды рисованиянь тонавтыцякс. Мейле заочна – психологокс.
– Пек вечкан ветямо эрзянь келень уроктнень. Ней мезе берянесь – оценкат а путнетяно, кудов заданият а макснетяно. Недлязонзо ансяк вейке час... Те аламо, те а тев. Эйдетненень эряви максомс питне. Улевель мелест тонавтнемс, невтемс пряст. Мезть тейнетяно уроктнесэ? Саемга, ваннотано идем ракшат, нармунть – арттано сынст. Малав весе эйкакштне рузт. Тейтяно проектт. Тедеде школасонок тешкстынек тиринь келень недля. Эйкакштне ловность эрзянь кельсэ валморот, тейсть стенгазета, – ёвтни тонавтыцясь.
Школадо башка, 1994 иестэ саезь Альбина Александровна важоди Ромодановань Эйкакшонь творчествань кудосо. Вети краеведениянь ды кедьчелькев тевень (рукоделиянь) кружок.
– Тонавтнетяно минек райононь историянть, Сахаронь заводонть, Таня Бибинань подвигензэ. Маень 20-це чистэ сонзэ чавовома чизэ, свал ледстнетяно сонзэ. Кеврунгонтень путнетяно цецят. Яксетяно войнань участниктненень кеврунгонть перька тарканть ванськавтомо. Ней минек ансяк вейке ветеран кадовсь. Сонензэяк лездатано. Маень 9-це чинтень анокстынек геройтнеде материалт, кить сынст семиясо ульнесть войнасо. Эйкакштне мельспаросо теить тень, кевкстнить малавиксэст. Тейтяно раськень чувто (родословной).
Тонавтнетяно-ваннотано ульцятнень лемест. Эрьва ие эйкакштне невтить пряст краеведениянь олимпиадасо ды саить изнямонь таркат. Вишка эйдетнень марто кружоксо тонавтнетяно човалясто кодамо, конёвсто, пластилинстэ ды лия материалсто эрьва мезень тейнеме. Весе теевкстнэнь, налкшкетнень марто тонавтницятне пелькстыть, кинь лиссь седе паро ды мазый, – пачтясь А.А. Вадиченкова.
Арсетяно, Ромодановань районсо тевесь эрзянь келенть ды культуранть ванстомасо седеяк кемексты, эдь сонсь райононь прявтось С.В. Ведяшкин яви те ёнксонтень покш мель.
Татьяна Маторкина