Четверг, марта 28, 2024
Важное

Эрзянь содавикс сёрмадеенть чачома  чистэнзэ саезь 115 иетненень

 

«Лажныця Сура» (рузонь кельс ютавтозь «Валдаевы»), «Покш ки лангсо умарина», «Ламзурь» – Андрей Дмитриевич Куторкинэнь неть книгатне ютазь пингень 70-це, 80-це иетнестэ эзть пулиякшно библиотекатнень лавцятнень лангсо (аволь кода ней). Сынь якасть кедьстэ кедьс, эйсэст ловность семиянек. А весе эрзянь сермадейтненень прась истямо уцяска: Куторкинэнь книганзо алкукс ульнесть вечкевиксэкс ды сынст коряс, арсетяно, снимавольть бу пек паро фильмат эли сериалт. «Лажныця Сура» трилогиясь кармась МАССР-нь Государственной премиянь Луреатокс (1987 ие), 1976 иестэ те книгань кавто томтне ютавтозельть рузонь кельс Московсо «Современник» издательствасо ды лиссть «Валдаевы» лементь ало. Трилогиянть Андрей Дмитриевич сермадсь малав 30 иень перть. Сон ёвтни эрзянь ломантнень эрямодо 19-це пингенть прядовомсто ды 20-це пингенть ушодовомсто. «Ламзуресь» кармась поэмакс, конань коряс композиторось Л.М. Кирюков сермадызе «Несмеяна ды Ламзурь» Мордовиянь васенце операнть, кортамось тосо мольсь 1743-45 иетнестэ Нижней Новгородонь ёнксонь Терюшевань волостень эрзятнень прявттнэнь каршо стямодонть-каявомадонть. Авторось совавтсь эйзэнзэ алкуксонь исторической ламо документтнэстэ саевкст, сынст кисэ сон ютынзе ламо архивтнень. Эрзя-мокшонь литературасо сон васенце, кие эсь произведениянтень совавтсь алкукс эриця геройть: Несмеян, Пумрас, Баратаев князесь, Дмитрий Сеченов епископось.

«Покш ки лангсо умарина» стихсэ романось ёвтни васенце мировой войнань, революциянтень анокстамонь иетнеде, ды кода сынст печтизь вишка раськетне, васняяк, эрзятне. Куторкин келейстэ невти эрзятнень эрямо лувост, кудонь тевест ды раськень коест-кирдаст. Романсонть вастневить ламо валмеревкст, морот, евкст, евтамот, сынь мазылгавтыть сонзэ, сюпалгавтыть келенть ды шождалгавтыть ловноманть. 1961 иестэ, «Советский писатель» издательствасо П. Железнов ды П. Панченко ютавтызь «Покш ки лангсо умаринанть» рузонь кельс.

Неть колмо произведениятне Куторкинэнь шкинемасо лововить сехте содавиксэкс ды виевекс, ансяк сёрмадомань тевенть сон ушодызе 1924 иестэ вишка ёвтнемасто: «Деревенское», «Чопудасо», «Чондат», «Варма-крандаз», «Кереметь». Сынь весе сёрмадозельть алкуксонь историятнень коряс ды тень кувалма седеяк педясть ловныцятнень седейтнес. Докачинь кастозь, сермадеесь нолды «Раужо палмань» прозасо историко-революционной роман, мейле – кото пельксэс «Вейсэ» поэма.

Эрзянь литературасо Андрей Куторкин содавикс Андрей Ёндол омбоце лементь ало. Те лемесь пек ладясь сонзэ оймамонь а содавикс обуцянтень ды теке ёндол, сермадеесь 85 иень перть кивчкаесь Мордовиянь литературань менельсэнть. Теке марто, сон ульнесь аволь ансяк сермадеекс, истя жо журналистэкс ды публицистэкс.

 

Эрямонь

китне-янтнэ

 

Андрей Дмитриевич Куторкин вейке источникенть коряс чачсь 1906 иень умарьковонь 12-це чистэ, лиятнень коряс – 25-це чистэ, Чувашиянь Порецкой райононь Алвеле (Напольное-Студенец) эрзянь велесэнть, кода кортыть, сокицянь-видицянь семиясо. Прядызе Порецкоень средней школанть, косо тонавтыцятне редизь церыненть превензэ ды содамочитнес правтоманзо. 1924 иестэ ильтязель Ульяновскоень совпартшколав, прядомадонзо мейле 21 иесэ од церась кучозель Мордовияв, косо тердсь-тонавтсь эрицятнень ловномо-сермадомо ды путсь виензэ совавтомс сынст колхозс. Ульнесь Дубенкань райононь библиотекань прявтокс, Орданьбуень Жабина велень «Рассвет» колхозонь председателекс. 1932 иестэ саезь васенце таркас сон путызе журналистэнь-литераторонь тевенть.

1934 иес А.Д. Куторкин роботакшнось минек «Эрзянь правда» (сестэ эште «Эрзянь коммуна») газетасонть, мейле кавто иеть ульнесь «Сятко» журналсо прявт редакторокс. Войнадо икелень 1935-39 иетнестэ ды войнань шкань 1943-45 иетнестэ сон – Мордовиянь книгань издательствань кепедиця, 1944 иестэ саезь 1951 иес Андрей Куторкин ладязель Мордовиянь Сёрмадеень союзонь прявтокс. Мейле весе эрямонзо сюлмизе ансяк сермадоманть ды журналистиканть марто. 1952 иестэ саезь 1958 иес Андрей Ёндол ульнесь ответсекретарекс, отделэнь прявтокс «Советская Мордовия», «Эрзянь правда» газетатнесэ, 1958-59 иетнестэ – «Сурань толт» журналсо ответсекретарекс. Кода уш вере сермадозель, шкинемасонть сон пачкодекшнесь покш текшос. 1966 иестэ тензэ максозель МАССР-нь Заслуженной писатель лем, 1984 иестэ – Народноень лемесь. А весть казезель Трудонь Якстере Знаменень орденсэ, кавксть Почетонь Знаксо ды зярыя медальсэ. Кулось Андрей Дмитриевич 1991 иень панжиковонь 12-це чистэ.

 

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».