Омбоце чистэнть библиотекасонть тагояк пурнавкшность литературань вечкицятне. Тувталось тенень – МР-нь заслуженной поэтэнть Геннадий Гребенцовонь книгань презентациясь. Мордовиянь книгань издательствась нолдызе «Кочказь произведениянь» омбоце томонзо.
Тей совасть стихсэ азбука, пьеса ды эрьва кодат евтнемат. Авторось лембестэ сермады ломантнеде – вишкинетнеде ды покштнеде, велень ды ошонь эрицятнеде. Вечкезь тешксты тиринь мастордонть, евтни мазычидензэ, терди сонзэ ды эрицятнень ванстомо. Писателенть кель-валозо чарькодевикс, мазый, эйсэнзэ ламо муевкст.
Библиотекань важодицятне невтсть Гребенцовонь творчествадонзо мазый видеопрезентация, анокстасть книганзо ды публикациянзо коряс выставка, косо ульнесть ютазь пингестэ нолдазь изданиятне ды журналтнэ.
Педагогической наукань докторось, профессорось М.И. Ломшин ловнось мельстуиця доклад писателенть эрямо кидензэ ды творчествань башкачидензэ.
Г. С. Гребенцов сермады эйкакштнень ды од ломантнень туртов поэзиянь ды прозань произведеният. Нолдась евтнемань, евксонь, стихень ды пьесань зярыя пусмот. «Ежов ур» васенце книгась лиссь 1981 иестэ. Сон се шкане эште студентэль.
Геннадий Сергеевич – оймамонь а содыця ломань. Течи тесэ, ванды – тосо, свал ломань ютксо. Сон теевсь паро инжекс ошонь школатнесэ. Сеедьстэ вастовкшны тонавтницятнень марто. Книгань презентациянтень сакшность эрзянь келень тонавтыцятне ды евтасть покш сюкпря писателентень. Поэтэсь аволь ансяк ловнокшны стихензэ, сон ютавты эйкакштнень марто пелькстамот ды налксемат. Муи косо пейдевтемс, косо шнамс эйденть.
Г. С. Гребенцовонь произведениянзо совасть минек литературань сырнень фондс. Эйкакштнень туртов сермадомсто эряви парсте чарькодемс эйдень психологиянть. Сонзэ сермадовксонзо ютавтозь лия кельс ды нолдазь Московсо, Йошкар-Оласо, Казаньсэ.
Те вастовомасонть гайгсть ламо лембе валт. Вал сайнесь 1941–1945 иетнень войнань ды трудонь подвигень Мемориальной музеень прявтонь полавтыцясь Лилия Наркаева. Те музеентень кандови А.И. Полежаев лемсэ музееськак, косо научной сотрудникекс важоди Г.С. Гребенцов. Сон сеедьстэ ютавтни литературань чокшнеть, экскурсият. Паронь арсемат евтасть «Сятко», «Чилисема», «Якстерь Тяштеня» журналонь редактортнэ, кинь кедьсэ нолдавить поэтэнть произведениятне.
Паро казнекс кармасть музыкальной номертнэ. Морот казсть Елена Тувина ды «Ламзурь» фольклорной ансамблясь.
Татьяна Маторкина