А. С. Пушкин лемсэ библиотекань раськень ды краеведениянь литературань отделсэ ютась Светлана Фадейкинань «Байгинеть» книгань презентациясь. Тей совасть эйкакштнень туртов стихть, морот ды евкст. Сынь тонавтыть парос, токить седей, лиясто пейдевтить. Книганть нолдызе Мордовиянь книгань издательствась МР-нь Цифровой развитиянь ды массовой коммуникациятнень министерстванть лезксэнзэ вельде.
Мезть сепомс, меельце иетнестэ чуросто нолдавить эйдетнень туртов книгат. Ды те пусмось алкуксонь казне вишкинетненень. Сон пешксе мазыйдеяк мазый артовксто, сынь аштить эрьва стихотворениянть вакссо (сындест сядодо ламо). Сынст теинзе художникесь Татьяна Панова. Шрифтэсь ды букватне покшт, парсте ловновицят, книганть мельспаро кирдемс кедьсэ.
– Светланань стихензэ шождасто ловновицят, эрьвантень путозь ойме. Эйкакшонь книгат пек а сатныть, аламо истят авторонок. Тешкстаса, поэтессась свал сакшны минек вастовоматнес ды кенярксчитнес, – кортась Эрзянь ды мокшонь раськень регионъютконь общественной вейсэндявксонь Исполкомонь прявтось Татьяна Ларина.
Сонзэ валонзо поладынзе МР-нь Писателень союзонь прявтось Татьяна Швецова:
– Светлана Фадейкинань творческой маштомачинзэ васенцеде рединзе «Чилисема» журналонь икелень редакторось Н.И. Ишуткин. Сон лездась тензэ нолдамс 2018 иестэ «Полет души» васенце книганзо. Сонзэ вельде тейтерьавась совась РФ-нь Писателень союзонь члентнэнь юткс. Теде мейле нолдась эштеяк книгат.
Истя жо паро валт евтась Мордовиянь книгань издательствань ведущей редакторось Нина Казаева. Самай сон важодсь книганть лангсо. Сон пачтясь, С. Фадейкинань произведениянзо совавтовить школань тонавтницятнень туртов литературань хрестоматияв.
Паро казнекс кармась Саранскоень 12 № гимназиянь тонавтницятнень пельде Светланань валморотнень ловномась.
Светлана Фадейкина чачсь Дубенкань райононь Поводелесэ. Школань прядомадо мейле тонавтнесь Саранскоень культурань училищасо библиотечной тевень специальностень коряс. Седе тов 32 иеть роботась Дубенкань райононь библиотекасо. Ней важоди «Границы добра» АНО-со социальной роботникекс.
Стихень сермадомо кармась студентэнь иетнестэ. Пек вечксь литературанть. Сонзэ кармасть тердтнеме од автортнэнь республикань семинартнэс. Авторось нолдась зярыя книгат: «Полет души», «Капельки счастья», «Эрямонь ки», «Навстречу радуге», «Нурсемань морынеть», «Сквозь века». Од книгась – сисемеце. Истя жо произведениянзо совавтозь стихень зярыя вейсэнь пусмотнес. Саемга, «Мы с вами, братья!» раськень поэзиянь антологияв (сон алтазь СВО-нь участниктненень), РФ-нь Писателень союзонь «За други своя» патриотической поэзиянь неень шкань антологияв ды лиятнес.
Светлана Фадейкина ламо сермады тиринь енксонтень вечкемадо, ризны цератнень кисэ, конат чавовсть масторонок ванстомсто. Стихензэ пешксеть эрьва кодамо ежомарямодо. Писателенть произведениянзо сеедьстэ лиснить «Сятко» журналсо, сон кармась свалшкань авторокс. Поэзиядо башка, улить мазый евксонзо ды «Сэме» рубрикасо пейдевтиця евтнеманзо.
– «Байгинеть» книгась – минек литературасо покш изнявкс. Арсетяно Светлананень икелев молемань тевть, сермадомань тевсэнть сэрей текшт! – кортась «Сятко» журналонь прявт редакторось Людмила Ломшина.
Татьяна Маторкина