МР-нь Юстициянь министерстванть юрсо 2023 иень июнень 1-це чистэ саезь ушодызе важодеманзо Государственной юридической бюрось. Тесэ максыть лезкс нужачисэ эриця ломантненень; сетненень, кить бажить саемс семияв трямо-кастомо уроз эйкакш; васенце ды омбоце группань инвалидтнэнень; эйкакштненень, конат кадовсть тетявтомо-ававтомо; истя жо СВО-нь участниктненень ды сынст семиятненень.
2025 иестэ Государственной Думась кемекстась законопроект, конань вельде ламо эйкакшонь триця семиятненень максови юридической лезкс ды тень кисэ ярмакт пельдест а саеви. Тень коряс минь вастовинек Государственной юридической бюронь прявтонть Наталья Киреевань марто.
– Наталья Владимировна, кодамо кевкстема марто тыненк пшкалить ламо эйкакшонь триця семиятне?
– Васняяк тешкстаса, ламо эйкакшонь триця семиятне – те тетятне-аватне, конат трить-кастыть колмо ды седе ламо эйкакшт, сехте покшонтень улезэ 18 иеде а седе ламо эли 23 иеть, бути сон тонавтни вузсо очной формасо. Сынь пшкалить тенек государственной лезксэнь максомань коряс. Саемга, бути ламо эйкакшонь триця семиясь бажи стямс учетс сетнень юткс, кинень эряви покшолгавтомс эрямо тарканть. Эрси истя, мирдентень эли нинтень уш топодсть 36 иеть, эли кодамояк лия тувталонь коряс эйсэст а путыть учетс. Пшкалить модань участкань саемань эли амаксомань коряс. Сеедьстэ пшкалить тетяксчинь (аваксчинь) кемекстамонь, алиментэнь коряс. Истя жо кевкстнить ипотекань кредитэнь пандомадонть: зярдо сон пандови сеске, зярдо жо пельксэнь-пелькс.
2024 иестэ тенек пшкалесть ламо эйкакшонь триця 10 семият, 2025 иестэ – 31. Кой-конатне натой аволь весть, весенень лездынек. Уроз эйкакштне ды кить кадовсть тетявтомо-ававтомо пшкалить эрямо таркань максомань коряс.
Нама, башка мель явтано эрицятнень правовой информированиянтень ды просвещениянтень. Мелят ютавтынек зярыя вастовомат, ков тердтнинек ламо эйкакшонь триця семият. Пачтинек социальной лезксэнь максомадо, кодат пандомат улить эйкакшонь чачтомадо мейле ды сынст трямсто-кастомсто, кода саемс ды нолдамс тевс авань капиталонть, зярдо лисемс пенсияв ламо эйкакшонь триця аватненень. Спикерэкс тердтнинек Социальной фондонь важодицятнень. Эдь эрьва иестэ лисить од законт, конатнеде содыть аволь весе. Минек бюросонть важодить сисем юристт. Сынь снартнить лездамс эрьвантень.
Государственной юридической бюрось максы лезкс СВО-нь участниктненень ды сынст семияст туртов. Кавто юристтнэ важодить «Защитники Отечества» Госфондонь филиалсонть. Ломантне пшкалить военнослужащейтненень пандоматнень, льготатнень, компенсациятнень ды социальной гарантиятнень коряс. Сеедьстэ СВО-со чавовозенть малавикстнэ пшкалить пурнамс судс документтнэнь, зярдо эряви яволявтомс ломаненть кулозекс. Куломадо свидетельстванть марто семиянтень ушодыть максомо пандомат.
Эряви меремс, Госюрбюронь важодицятне ковозонзо кавксть ардтнить республикань районтнэва. Тосо ютавтыть эрицятнень марто вастовомат, ветить прием. Сынст натой ули мобильной офисэст, конань лемдить «госюрмобилекс». Газельсэнть ули столь ды озамо таркат, нама, истямо прием ветить ансяк лембе шкасто. Истя жо паро ендо невтизе прянзо онлайн-консультированиясь. Ламот мезеяк а содыть правовой тевтнеде ды социальной лезксэнь максомань енкстнэде.
Седе тов арсить эрьва кварталсто ютавтомс ламо эйкакшонь триця семиятнень марто вастовомат. Кодамо чистэ ды кодамо шкане, теде пачтить Госюрбюронь «ВКонтакте» социальной сетень официальной куросонть.
Татьяна Маторкина