СВО-нь ветеранось Сергей Пронькин туекшнесь спецоперацияс эсь олясо. Топавтсь мотострелковой ротань командирэнь тевть, ульнесь Мариуполень, Волновахань, Кременная территориятнесэ молиця тюрематнесэ. Понгокшнось виев артиллерийской леднема алов, стакасто ранязель. Мобилизациядо мейле ветеранось ушодсь эрязасто важодеме од ломантнень марто, тонавты эйсэст патриотизмантень. Сон сеедьстэ якси республикань тонавтнема учреждениятнева, косо евтни Россиянь солдаттнэнь патриотизмадо, рузонь мирэнть алкуксонь питнейчитнеде.

Мария нинзэ марто вейсэ прасть вемельс теемс тематической пространства, косо сынь кармавольть вастневеме ды кортнеме од ломантнень марто.

«Минь арсетяно пурнамс кудоютконь курмот-кармот, конатне ульнесть минек геройтнень перька эйкакш порасто. Тень марто невтевлинек, мезесь кармавтынзе сынст улеме истямокс, кодат сынь неень шкасто, мекс сынь эсь мельсэ тусть спецоперацияв», – кортась Мария Пронькина.

Неть мельтнень-арсематнень топавтомга, мирдть-нить пшкадсть лезкс мельга Культурань инициативатнень Президентэнь фондонтень. Грантовой пелькстамонтень «Довести до ума» яволявтоманть сыненст лездыть анокстамс-сермадомс башка онлайн-марафононь специалисттнэ. Пронькинтнэ вете семиятнень ютксо, конатненень удалась ютамс тонавтнема программанть.

Кода евтнесь Культурань инициативатнень Президентэнь фондонь проектной офисэнь прявтось Ксения Вотякова, участниктне кортнить эксперттнэнь марто, тень пингстэ аламонь-аламонь сермадыть анкетанть. Грантонть кис пелькстыцятнень туртов максовить видеоурокт, косо чарькодевиксстэ евтневи, кода эряви сермадомс анкетанть, кодат вешемат максы Фондось. СВО-нь боецтнэнень ды сынст семиятненень те алкуксонь эскелькс грантовой конкурссонть изнямонть туртов.

Июлень 10-це чистэ прядови 15-це грантовой конкурсонтень яволявтомань максомась. Эйсэнзэ мереви невтемс прянть коммерческой ды аволь коммерческой организациятненень, индивидуальной предпринимательтненень ды муниципальной учреждениятненень.

Од конкурссонть яволявтоматнень мереви максомс 12 тематической енкска: «Единство с судьбой России», «Мы вместе», «Нация созидателей», «Многонациональный народ», «Нравственные ориентиры», «Крепкая семья», «Наша сила в правде», «На страже Отечества», «Молодые лидеры», «Страна возможностей», «Культурный код», «Место силы».

Эрьва специалистэнть туртов лездамга арсезельть методической рекомендацият социокультурной проектэнть анокстамонзо коряс, чек-лист. Весементь мереви муемс сайтсто «Документы» пелькссэнть.