Июнень 8-це чистэ республикасонок, кода масторонь келескак, тешкставсь Социальной роботникень чись. Сонензэ алтавсть ламо эрьва кодат промкст, вастовомат. Тешкстасынек, васов аволь эрьва ломаненть сатыть виензэ якамс стакасто сэредицянть, ськамонзо эриця сыре ломаненть мельга, каземс седейлембензэ кажос понгозь эйкакштненень. Самай истят тевть топавтыть социальной роботниктне, кить васень таркас путыть лездамс сетненень, кить учить тень сынст пельде.
«Эрзянь правда» газетань лопатнесэ минь аволь весть сермалинек «Республиканский социальный приют для детей и подростков «Надежда» Мордовиянь социальной обслуживаниянь государственной казенной учреждениясо эрицятнеде. Тешкстасынек, неень шкане, кода икелеяк, тосо важодить седеймариця, эйкакшонь алкукс вечкиця ломанть. Вейкесь юткстост – те учреждениянть прявтонь полавтыцясь, эрзянь церась Николай Варламов. Социальной роботникень кенярксчиденть икеле минь вастовинек Николай Александрович марто ды кортнинек сынст а шожда, теке шкасто, пек эрявикс тевдест.
Эйкакш пингезэ ютась ламо эйкакшонь триця семиясо
Орданьбуень райононь Пиксяси велесэ эриця Варламовтнень раськесь пингень перть важодсь велень хозяйствасо. Тетязо, Александр Варламов, кинень Ине Отечественной войнанть шкасто ульнесть 17 иеть, туекшнесь Чувашиянь Алатырь ошов.
Войнанть прядовомадо мейле Александр Михайлович ламо иень перть важодсь «Путь к коммунизму» колхозонь фермань прявтокс. Сестэ хозяйстватнесэ кирдсть ламо эрьва кодат ракшат: тувот, скалт, реветь…
Вейсэ Антонина Михайловна нинзэ марто трясть-кастсть сисем эйкакшт. Эсь шкасто путсть паро кудо, перьканзо озавтсть покш садпире. Сисемнест эйкакшост кастызь важодеме вечкицякс, лиятненень лездамо бажицякс. Эрьвась юткстост муизе эрямо кинзэ. Тешкстасынек, Антонина Михайловна истя жо ульнесь ламо эйкакшонь триця семиясто, эйстэдест ульнесть сисем эйкакшт. Ризксэнтень, колмонест лелянзо маштовсть Ине Отечественной войнасо.
Николай Александровичень ледстнеманзо коряс, сынст семиясо нузякст арасельть. Невтемакс, сонензэ савсь аволь ансяк вишкинетнень мельга ваномс, эште ламо кудоютконь тевть топавтомс. Касозь, церыненть кармасть сайнеме паксянь тевень топавтомо, тосо сон ушодсь велень хозяйствань техниканть тонавтнеме. Шкань ютазь кармась трактористэнь лездыцякс. Нать, а стяко Пиксясинь средней школанть прядомадо мейле сеске ушодсь важодеме «Путь к коммунизму» колхозсо трактористэкс. Секе иень сексня Николай Варламовонь саизь армияв, масторонть икеле воинской долгонть топавтомо. Служамодо мейле велявтсь тиринь Мордовияв. Эсь шкастонзо урьвакстсь, никс саизе эсест велень од тейтеренть Татьяна Богдановань. Одтнэ кармасть эрямо Саранскойсэ.
Эрямонзо сюлмизе одтнэнень лезксэнь максоманть марто
Армиясто самодо мейле Николай Варламов сайсь мель тонавтнемс вузсо. А мезть сепомс, се шкантень ламось стувтовкшнось школань программастонть. Сень ловозь, максынзе документэнзэ Н.П. Огарев лемсэ Мордовской государственной университетэнь подготовительной отделенияс ды ушодсь тосо тонавтнеме. Иень ютазь сон кармась улеме те вузонь велень хозяйствань ды электрификациянь факультетэнь студентэкс. Эрямонь тувталтнэнь кувалма савсь тензэ ютамс заочной лувсо тонавтнемас. Теке шкасто ушодсь важодеме Н.П. Огарев лемсэ МГУ-нь велень хозяйствань машинань кафедрань учебной мастерэкс. Теде мейле сон роботась Саранскоень средней профессиональной 29-це № училищасо хозяйственной тевтнень коряс прявтонь полавтыцякс. Профессионально-технической училищасо тонавтницятнень ютксто сехте ламотне ульнесть велень эйкакшт, кить парсте эзть сода ошонь эрямонть. Сынст пек ламо кевкстемаст ды энялдомаст ульнесть Николай Александровичнень, сон жо эсь ендо, ков сатотсть виензэ, лездась тенст. Сехте эрявиксэнть кудостояк кандсь, лавкастояк рамась седеймариця эрзянь церась. Касозь, неть церынетне сонзэ паро тевензэ эзизь стувто, кить од важодема таркасто муилизь, кить телефонсо тензэ сеедьстэ гайневтсть…
2003 иестэ саезь Николай Александрович ушодсь важодеме республикань «Надежда» социальной приютсо хозяйственной тевтнень коряс прявтонь полавтыцякс. Сонзэ ледстнематнень коряс, васень иетнестэ тосо пек стакаль важодемс, перестройкань шкась сестэ ламотнень варчнесь нардевчи лангс. Сеть шкатнестэ приютсо эйкакштнеде ламольть, сынст эрявсь аволь ансяк андомс-симдемс, эште арсемс, косто саемс ярмакт оршамопелень рамамс, эрямо тарканть мазылгавтомс. Эрявсь вешнемс лездыцят эйкакшонь учреждениянть паролгавтомга, витнемань тевтнень топавтомга. Нурькинестэ, ламо мелявкст савсь топавтомс хозяйственной тевтнень коряс прявтонь полавтыцянтень.
2016 иестэ теезель реорганизация «Социально-реабилитационный центр для несовершеннолетних «Радуга» МР-нь социальной обслуживаниянь государственной казенной учреждениясонть, сонзэ вейсэндизь «Надежда» республиканской социальной приютонтень. Самай се шкастонть пек покш робота ульнесь кавонест неть учреждениятнесэ, конат аштить пек васоло вейкест-вейкест эйстэ. Вейкесь – «Светотехстрой» эрямонь районсонть, омбоцесь – Химмашсо. Кавонест неть учреждениятнень территорияст эрявсь кирдемс ваньксстэ ды эрямо таркань зданиятненьгак свал эрявсь витнемс. Тень туртов эрявсь рамамс сатышка стройматериалт ды муемс витницят. А мезть сепомс, эстензэ Николай Александровичненьгак савсь важодемс строительтнень марто, лездамс тенст седе курок топавтомс те эли тона тевенть.
Неень шкане учреждениясонть теезь весемесь эйкакштнень туртов парсте эрямга. Территориясь вадрясто витнезь, мазылгавтозь, улить нурямот, мазый налксема таркат, спортонь коряс пелькстамонь площадкат, концертэнь ютавтомань од сцена.
Николай Варламовонь лавтовонзо лангс путозь ламо тевтнень ютксо зданиятнень педе-пес витнемань тевтнень ютавтомась, электричестванть мельга ваномась, веденть улемась, уштомапеленть ладямось ды истя седе тов. Сонзэ бажамонзо вельде пек седе кемекставсь приютонть материально-технической базаськак.
Зданиясонть ули паро бассейна, косо эйкакштне юткошкасто укшныть. Теньсэ, меельце шкане сынст а чумондыть мельгаст ваныця истят организациятне, кода Трудонь ды занятостень коряс Федеральной службась, Мордовия Республикава Россиянь МЧС-нь Главной управлениясь, Мордовия Республикасо Роспотребнадзоронь Управлениясь, покш путовксозо, нама, Николай Александровиченьгак. Эдь сон ламо теи те учреждениясонть асатыкстнэнь а нолдамга, эйкакштненень паро ды сэтьме эрямонь максомга.
Валентина Юдина
«Республиканский социальный приют для детей и подростков «Надежда» минек учреждениясонть Николай Варламов важоди комсте ламо иеть. Сон тевензэ парсте содыця, лезэв превс путомань евтыця, пек ответственной ломань. Николай Александрович свал муи кель-вал приютсо важодицятнень марто минек вейсэнь тевтнень топавтомсто. Мезесь пек питней минек туртов – сонзэ вечксызь учреждениясонок эриця эйкакштне, ловить сонзэ прявтокс! Тень коряс мон а покордаван, мекевлангт, покш мельспаросан эйкакштнень ютксо сонзэ авторитетэнть улеманзо кувалма.
Минек профессиональной кенярксчинть кувалма евтан поздоровт весенень, кить алтызь эрямост социальной роботникень а шожда тевентень! Арсян кеме шумбрачи, эрямосо уцяска, весе арсезенть топавтома!
Татьяна Барашихина,
«Республиканский социальный приют для детей и подростков «Надежда» МР-нь ГКУСО-нь прявтось.