Неть читнестэ Саранскойсэ ютавтовсь пресс-конференция, конась алтавсь килангонь зыянтнэнь а нолдамонь кевкстематненень. Ютазь иень невтематне пачтить, Мордовиянь китнень лангсо тевтне берякадсть. Ламолгадсть транспортонь зыянтнэ, кассь томбавозтнень ды чавовозтнень ламочись.
«Килангонь зыянтнэнь касомань тувталокс васняяк ашти республикань китнень лангсо транспортонть ламолгадомась ды эрязасто ардомась. Трафикень истямо касомась тешкставсь ковидэнь весе киртямотнень каямонть ды истя жо социально-экономической зярыя полавтоматнень коряс. Килангсо малав эрьва колмоце участникенть чавовомань тувталокс кармась покш скоростьсэ ардомась эли ардомань вешематнень атопавтомась», – пачтясь МР-ва МВД-нь Госавтоинспекциянь Управлениянь прявтонь тевтнень нурька шкас топавтыцясь Алексей Крайнов.
Сон истя жо башка мель явсь китнень лангсо авариятнесэ эйкакштнень томбавомань тевтнень стакалгадомантень. 2022 иестэ эйкакштнень марто ДТП-нь ламочись кассь 21,7 %. Тедеде килангонь зыянтнэ, конатнень участникекс кармасть кемгавксово иеде седе вишкинетне, истя жо аштить покш мелявксокс республиканть туртов.
«Тешкстаса, весе тевтнесэ васняяк ответственность канды водителесь. Самай сонензэ ардомсто мельс саемат весе ризкстнэнь, куш кодамо зыянонь лисемстэ эрязасто валгстома скоростенть ды лоткама», – мерсь Алексей Крайнов.
Теке шкасто, МР-ва Транспортонь коряс государственной комитетэнь председателесь Валерий Кандрин ёвтнесь Мордовиясо «Безопасные качественные дороги» национальной проектэнть тевс нолдамодо.
«Те проектэнть юрсо ваннови ДТП-нь аламолгадомаськак. 2023 иестэ арсеви витнемс 346 вайгельбеть автомобилень кить. Теке марто подрядной организациятне эрьва чистэ ванкшныть китнень вадрячист, редить вельтявксонь коламотнень, конатне зыянтомо ардомасонть саить покш тарка», – мерсь Валерий Кандрин.
Пурнавозтне истя жо кортасть седе, кодамо робота ветяви республикасонть эйкакштнень килангсо томбавоматнеде ванстомга.
«2014 иестэ Мордовиясо панжозель «Республиканский Центр по профилактике детского дорожно-транспортного травматизма» учреждениясь. Сонзэ важодемань прявт тевекс ашти килангонь весе участниктнень прянь ветямонь культуранть виевгавтомась. Центрань материально-технической базась лезды аволь ансяк невтнемс тонавтомань фильмат ды ютавтомс теоретической занятият, истя жо совавтомс эйкакштнень практической важодемантень. Школьниктне водителень таркасо кемекстыть эсь содамочитнень автотренажёртнэсэ, электромобильтнесэ ды велосипедтнэсэ. Налксемань комплекстнэ жо, конат лездыть теемс китнень ды сынст малава таркатнесэ эрьва кодамо ситуацият, ванныть эйкакштнень содамочист ялго ютыцякс улемстэ. 2022-2023 иетнестэ ютавтозь 62 занятият 1019 тонавтницятнень туртов. Эрьванть коряс сёрмадови тест», – тешкстась Центрань прявтось Ольга Уткина.
Пресс-конференциясонть истя жо кортавсь ДТП-сэ томбавоматнеде ды зыянс понгозентень медицинань васенце лезксэнь максомадонть. Теде ёвтнесь Медицинань лезксэнь эрязасто максомань станциянь прявт врачось Андрей Мотякин. Седе жо, мезесь сеедьстэ пачти килангонь зыянтнэс, ледстизе Россиянь ДОСААФ-нь региональной отделениянь председателесь Алексей Тюркин.
Юлия Еремина