Ванодо, манчицят!

Мордовиясо судизь манчемасо чумотнень, конатне сюлмавозельть авань капитал лангс сертификаттнэнь аволь закононь коряс тевс нолдамонть марто.

МР-ва МВД-нь Следственной управлениянь Следственной частень пурнавт материалтнэ сатотсть сень туртов, штобу ливтемс приговоронть зярыя ломантнень коряс, конатне чумондовсть закононь коламонь тевсэ «Мошенничество при получении выплат» статьянть коряс.

Ванноматнень лувсо кемекставсь, 2016 иень февральстэ саезь 2017 иень августс кредитной кооперативтнень участникесь, ниле риелтортнэ ды 26 тетятне-аватне, конатненень максовсь авань капитал лангс сертификатось, саласть государственной ярмакт МР-ва Россиянь Пенсионной фондс ды республикань Эрицятнень, социальной ванстомань, трудонь ды занятостень министерствас аволь виде максоматнень пачтямонть вельде.

Кемекстазь схеманть коряс закононь колыцятне вешнесть авань капитал лангс сертификатонь азортнэнь ды Мордовиянь районтнэсэ аволь питней кудот. Седе покш ярмаконь саемга рамамонь-миемань договортнэнь кемекстамсто сёрмадовиль эрямо таркань ков седе покш питнесь – малав 500 тёжат целковойть, зярдо алкуксонь питнезэ ульнесь 45 тёжасто саезь 100 тёжат целковойс. Ярмактнень кадовозь пельксэсь явовиль группань участниктнень юткова. Теке шкастонть, рамазь кудось эрямонть туртов овсе а маштовиль. Истя, салазь ярмактнень покшолмась лиссь 10 млн ламо целковойть.

Те тевенть коряс эрьва участникентень судось ёвтызе чумочинзэ – кинь-бути чумондызь условна вейке пель марто иес, кинень-бути жо сави аштемс исправительной колониясо 5 иеть 6 ковт.