«Эрявикстэнть кортамо» проектэсь тевс нолдави весе Мордовиянть келес. Сонзэ лувсо ютавтовить вастовомат школасо тонавтницятнень марто. Неть читнестэ спецоперациянь ветеранось Дмитрий Демидов вастовкшнось Саранск ошонь 24 № школань 4-це «Б» классонь тонавтницятнень марто. Вастовомась пурназель К. Чуковский лемсэ ошонь 6-це № библиотекасонть. Мероприятиянть арсицякс-пурныцякс кармась «Защитники Отечества» государственной фондонь Мордовия Республикава филиалось.

Специальной военной операциядонть икеле Дмитрий Демидовонь эрямозо ульнесь сюлмавозь Тиринь масторонтень служамонть марто. Сон важодсь прокуратурасо, Следственной комитетсэ ды судсо. 2017 иестэ Дмитрий кадызе службанть ды седе ламо шка алтась эсь семиянтень. 2024 иень майстэ эсь мелень коряс тусь фронтов. Топавтсь боевой кармавтоматнень Запорожской ёнкссонть «Барс-1» добровольческой отрядонть юрсо. Вадря службанть кисэ тешкстазь «Доброволец СВО» ведомственной наградасонть. Ютазь иень ноябрясто велявтсь кудов.

«Истя уш лиссь, армиясо мон эзинь служа – прядынь военной кафедра, – ёвтнесь Демидов эйкакштненень. – Васенцеде оршинь бронежилет ды кедезэнь саинь автомат уш «ленточканть» томбале. Мон кодаяк эзинь кадово ве ёнов течинь тевтнень эйстэ – покш мелем, штобу эйкакшон эрявольть сэтьме масторсо. Эйкакшт, тынк сёрматне пек лездыть фронтсо. Зярдо кедезэть сайсак истямо сёрманть, седейс токиця валтнэде соракады рунгот. Вейке стака чистэ монь кедьс понгсь кучовкс, косо эйкакшонь ачарькодевикс сёрмадовкссо ливтезельть валтнэ: «Кирдть, тонь весемесь лиси!» Неть валтнэ истя совасть монь оймес, чарькодинь сынст верде тешксэкс, ды сынь макссть тень вийть».

Тиринь масторонь ванстыцясь ёвтнесь эйкакштненень, мезе те блиндажось, кода пек эрявить географиянь содамочитне фронтсо, кодамокс эряви улемс алкуксонь ванстыцянтень, ды невтнесь фотографият фронтсто.

Эйкакштне кунсолость героенть оймень апак тарга. «Покш мельспаро неемс героенть ды марямс сонзэ историянть эсензэ пельде», – тешкстызь тонавтницятне.