Ютазь недлячистэ Сабанцеле велесь, Отяжелень районось, весе республикась ильтизь меельце килангов эсь тиринь ёнксонь ды Россиянь алкуксонь Патриотонть – «Сабанчеевское» велень хозяйствань предприятиянь прявтонть Дмитрий Николаевич Игушкинэнь. Сонзэ седеезэ лоткась чавомодо январень 31-це чистэ. Сонензэ ульнесть 68 иеть.
Те ломанесь тейсь пек ламо паро тевть аволь ансяк тиринь Сабанцеле велензэ ды предприятиясонть важодицятнень туртов, сон мелявтсь целанек велень хозяйстванть кисэ. Кода виев аграрник, содыця ломань, наставник, макссь превс путомат ды содамочить одтнэнь туртов, лездась ярмаксо, транспортсо, стройматериалсо, зяро ульнесь виезэ... Истят ломанть пек аламо мирсэнть-масторсонть!
Дмитрий Николаевич пек вечкилизе тиринь велензэ, тиринь эрзянь келензэ, ульнесь минек газетань паро ялгакс, зярдояк а отказыль тенек, бути арсилинек самс интервьюс, ламо иень перть сёрмадстсь «Эрзянь правда» ды свал бажась сонзэ лопатнестэ неемс аволь эсь прянзо – велень хозяйствань предприятиясонть роботыцятнень, пштистэ вансь, штобу а стувтовлинек эрьванть лемензэ ды фамилиянзо... «Сабанчеевское» СХПК-нь прявтокс сон важодсь 20 иеть.
«Эрзянь правда» газетань лопатнестэ минь муинек ансяк вейке очерк, конась алтазель Дмитрий Николаевич Игушкиннэнь, сон эзь мерне сёрмалемс эсензэ ланга. Ансяк весть, 2020 иень апрельстэ, сон аламодо панжизе седеензэ минек корреспондентэнтень Пётр Васильевич Зиновьевнень, конась истя жо тусь юткстонок секе иестэнть кажокс каявозь коронавирусонть эйстэ.
Макстано се кортамонть.
* * *
Дмитрий Николаевич Игушкин чачсь 1956 иень сентябрянь 3-це чистэ Отяжелень райононь Ульяновка велесэ колхозникень семиясо. Тонавтнесь Поляна велень начальной школасо, мейле тонавтнеманзо поладызе Дубёнкань райононь Антоновка велень кавксо иень школасо. Парсте прядызе Поводелень средней школанть. Средней образованиядо аттестатсонть ульнесть ансяк «нилеть» ды «вететь».
Дмитрий Игушкин эйкакш порасто кармась содамо кшисускомонть питнензэ. Тетязо, Николай Филиппович, важодсь «Поляна» колхозсо, косо кирдевсть колоньгеменде ламо лишметь. Сон пингензэ перть важодсь лишмень ваныцякс. Дмитрий тетянзо вакссто эзь тукшнояк. Пек вечксь лишметнень, якась мельгаст, ды, нама, ардтнесь ласте…
Авазо, Екатерина Яковлевна, пенсияс туемазонзо важодсь колхозсо. Сестэ весе тевтне топавтовсть кедьвийсэ. Екатерина Яковлевна нейгак ледстни сеть стака иетнень, зярдо мольсь сюпав урожаень кис бороцямось. Сестэ Полянасо кирдевсть 4 тёжат реветь. Сынст эрявсь андомс.
Дмитрий Игушкинэнь икеле, зярдо сон прядызе Поводелень средней школанть, эзь ара кевкстемась: кодамо тев кочкамс, косо поладомс тонавтнеманть. 1973 иестэ документэнзэ максынзе Кемлянь велень хозяйствань совхозонь-техникумонь «Агрохимия» отделенияв. Тонавтнеме кенерсь ансяк вейке ие. 1974 иень ноябрясто Дмитриень саизь советской армияв. Служась стратегической назначениянь ракетной войскатнесэ. Аволь весть ульнесь боевой ды политической анокстамонь отличникекс. Служамонь кавто иетне эзть марявояк, кода ютасть. 1976 иень ноябрясто сон велявтсь тиринь ёнксов ды поладызе техникумсо тонавтнеманть.
Тесэ, Кемлянь совхозсонть-техникумсонть, Дмитрий Игушкин вастызе вечкевиксэнзэ, эрзянь тейтеренть Любовь Васильевнань. Сон истя жо Отяжелень райононь, Аловелестэ, тонавтнесь зоотехникекс-селекционерэкс.
1978 иестэ, совхозонть-техникумонть прядомадо мейле, сынь кавонест састь важодеме Отяжелень райононь «Путь Ильича» колхозов. Сестэ колхозонь прявтонь тевтнень топавтсь Н. М. Баринов.
– Николай Михайлович вастымим лембестэ, – ледстни Д. Н. Игушкин. – Сон аравтымим 1-це тракторно-полеводческой бригадань прявтокс. Тевтнеде ульнесть ламо. Седеяк пек сюронь ды ламбамо якстерькаень урядамонь шкасто.
Д. Н. Игушкин оймамо эзь сода. Чинек-венек паксясоль. Бригадазо парсте топавтсь весе максозь тевтнень. Виевстэ важодемась стяко эзь юта. Се шкасто бригадась эрьва гектарсто сайсь 30 центнерт сюро. Удалакшнось ламбамо якстерькаеськак ды кормовой культуратнеяк. Сюронь саемань коряс «Путь Ильича» колхозонть ланга паро славась мольсь аволь ансяк районсо, сонзэ томбалеяк. Юткошкасто ардыль тиринь велев. Мелявтсь тиринь кудонть кис, удалганзо таргавсь латко, иеде иес пирень модась лондадыль, секень вант, латкось малавгады кудонтень. Тень кувалма 1982 иестэ тетянзо-аванзо ютасть эрямо Сабанцелев.
Д. Н. Игушкин бригадирэнь тевенть топавтсь 1986 иес. Эрямось таркасонзо а ашти, велень хозяйствасо тевс нолдавить сюронь, ламбамо якстерькаень кастомасо од технологият. Эрявить содамочить. Ды Дмитрий Николаевич заочна тонавтнесь Н. П. Огарёв лемсэ МГУ-нь велень хозяйствань факультетсэ агрономокс.
Отяжелень КПСС-нь райкомонь сестэнь васенце секретаресь А. Т. Куняев редизе: од цёрась ёроков, кель-вал мукшны велень трудий ломантнень марто, ды, кувать апак арсе, саизе важодеме райкомов, аравтызе организационной отделс инструкторокс. Тесэ Дмитрий Николаевич важодсь аволь кувать, ансяк вейке ие.
1987 иень апрелень 6-це чистэ Отяжелень райононь Андрелень Культурань кудосо ютавтозель покш промкс, конась алтазель «Андреевский» колхозонь прявтонь кочкамонтень. Эйзэнзэ састь веленек. КПСС-нь райкомось ёвтызе колхозонь прявтокс Дмитрий Николаевич Игушкинэнь кандидатуранть. Те меленть шнызь весе пурнавозтне. Эдь сон эсь тевень алкуксонь специалист.
Зярыя шкань ютазь «Андреевский» колхозонть таркас теевсь «Андреевский» СХПК-сь. Сонзэ ульнесть 2 тёжадо ламо гектарт соксевиця моданзо. Андовсть-трявсть тёжадо ламо скалт. Эйстэст 350 – потявтовицят. Тувонь фермасо кирдсть кавтосядто ламо тувот. Колхозонь од прявтось, ламо ловсонь потявтомга, ламо сывелень саемга ды, нама, колхозонть виевгавтомга, од специалисттнэнь марто сеедьстэ ютавтнесь промкст, косо ванкшновсть-тонавтневсть велень хозяйствасо од технологиятне. Велень специалисттнэ – агрономтне, зоотехниктне, ветеринарной врачтне – эсь ёрокчист кастомо кучневсть тонавтнеме Саранскоев.
Андрелесэ Д. Н. Игушкин важодсь 1996 иес. Колхозонь од прявтось маштсь виевгавтомс велень хозяйствань предприятиянть. 1988 иень невтематнень коряс «Андреевский» колхозось животноводствань коряс казезель РСФСР-нь Министрань Советэнь Якстере Знамясо; 1989 иестэ хозяйствантень максозель КПСС-нь райкомонь переходящей Якстере Знамясь.
– 1996 иестэ Дмитрий Николаевич Игушкин ютась важодеме Отяжелень райононь администрацияв – администрациянь прявтонь полавтыцякс, велень хозяйствань управлениянь прявтокс, – ёвтни «Путь Ильича» колхозонь икелень прявтось, велень хозяйствань ветеранось В. П. Бухаркин. – Тесэ сон невтизе прянзо кода пек паро руководитель. Сестэ районсонть ульнесть 27 колхозт ды 2 совхозт. Сон покш мель явсь ламо ловсонь, сюронь, сывелень саемантень, велень хозяйствань специалисттнэнь анокстамонтень.
Алкукскак, Д. Н. Игушкин мелявтсь, штобу райононь хозяйстватнесэ улевельть сатышка видьмекст, удобреният, касовкстнэнь ванстомань средстват. Тень кувалма кеме сюлмот тейсь МР-нь «Развитие села» ГУП-нть марто. Кеме оякс теевсь Самарань областень «КуйбышевАзот» заводонть марто.
Дмитрий Николаевичень покш таликазоль райононь велень хозяйствань весе предприятиятнень паксятнень видеме ды урядамо шкастонзо ливтемасо. Сон покш мель явсь машинно-тракторной парконть, коромонь базанть кемекстамонтень. Д. Н. Игушкинэнь те тевсэнть важодемань шкастонть Отяжелень районось эсь зонасо аволь весть лиснесь соцсоревнованиясо изницякс.
2005 иестэ Д. Н. Игушкин велявтсь Сабанцелев. Тесэ кармась «Сабанчеевское» СХПК-нь прявтокс, зярыя иень ютазь хозяйствась теевсь «Сабанчеевское» ООО-кс. Важодемань васенце шкастонть Дмитрий Николаевич кемекстызе трудонь дисциплинанть, покш мель явсь материально-технической базанть кемекстамонтень. МР-нь «Развитие села» ГУП-нть вельде рамазельть «Дон-1500» зярыя комбайнат, «МТЗ-1221» тракторт, сеялкат, «КамАЗ» машина, ламбамо якстерькаень урядамонь комбайна, тикшень ледемка ды велень хозяйствань лия инвентарь. Нурькинестэ меремс, сень, мезе эрявсь хозяйствантень пильге лангс стямга.
Ютась ие, омбоце… «Сабанчеевское» велень хозяйствань предприятиясь таштась изнявкст. Эрьва скалсто потявтыть ламо ловсо, эрьва гектарсто саить ламо сюро. 2009 иестэ «Сабанчеевское» велень хозяйствань предприятиясь совась Мордовской агропромышленной вейсэндявксос (МАПО).
– Минек хозяйствас совить Сабанцеле, Таразбуе, Дюрькина, Аловеле, Алашеевка велетне, – ёвтни Д. Н. Игушкин. – Тесэ ней строявить скалонь фермат, социальной объектт. Сабанцелесэ мелят парсте витнемадо мейле панжинек Культурань кудонть, Аловелесэ – ракшань комплексэнть, косо кирдевить тёжадо ламо скалт.
Д. Н. Игушкинэнь ламо государственной казнензэ. Сон – республикань Славань II ды III степентнень орденэнь кавалер, «За трудовую доблесть» медалень кандтниця, МР-нь Прявтонь премиянь лауреат, Россиянь АПК-нь Почётной роботник, МР-нь велень хозяйствань заслуженной роботник, Отяжелень райононь Почётной гражданин. Велень хозяйствань прявтонть коллективсэнть вечксызь, ловить паро азорокс, алкуксонь ломанекс.
* * *
Минь, «Эрзянь правда» газетань теицятне, ёвтатано седеймарямо Дмитрий Николаевичень нинзэ Любовь Васильевнань, тейтерензэ Ульянань ды Еленань туртов, нуцьканзо, роднянзо-раськензэ, малавиксэнзэ туртов. Сатост виест печтямс те покш ризксэнть. Сынь ёмавтызь тиринь ломанест, тетяст, вечкиця ды мелявтыця покштяст…
Минь ёмавтынек кеме неженек ды лездыцянок. Царствие Небесное! Свалшкань ледстнемат!