Четверг, мая 06, 2021
Важное
Лопанть лемезэль «Тейтерь-авань нупаль». Мекс истямо, аволь лия лем максозель те лопантень? «Нупаль» валось кезэрень. Ламо таркава сон стувтозь. Ледстямс сонзэ лездась эрзянь кезэрень вейке морось, косо морави: «Косо, косо, да, Утяша, сон нупальсэ…». Сонзэ коряс чарькодеви: «нупаль» валось – кудосо сехте валдо тарка, козонь чиямодо мейле тейтеренть кадылизь викшнема-кодамо тевензэ прядомо, лиякс мерезь, мирденень лисемантень оршамонзо анокстамо. Истямо лем ало лопасонть кортамоськак мольсь васняяк аватнеде, сынст уцяскадост.

Кода эри эрзянь авась неень шкастонть, кодат мелявкст пиштевтить сонзэ, мезесь тензэ лезды цидярдомс эрьва кодат стакачитнень, косто сон сайни вийть трямс-кастомс эйкакшт? Весе неть ды лия кевкстематнень лангс толковамот максовсть те лопасонть. Теде башка, одтнэнь эйсэ тонавтсть ды превс путсть седе сыретне, сеть, кинь, кода мерить, «пицизе-невельдизе» эрямось, кить содыть, кода савтомс атявтонтень-ававтонтень, кода кирдемс мирденть коронзо, мейсэ «солавтомс» цёратнень седеест, кода кадовомс свал мазыекс ды одокс, кода ветямс прянть ломань ютксо ды ламо лиядо. Нурькинестэ, «Тейтерь-авань нупальсэнть» эзть ютне кодамояк кевкстеманть вакска. Эзть чатьмоне седеяк, кода эрить аватне лия мастортнэсэ, мезесь сынст вейсэнди, мейсэ, паряк, сынь явовить.

«Тейтерь-авань нупалень» васенце лопась лиссь 1995 иень декабрянь 7-це чинь номерсэнть (108(12776) №). Сон алтазель кевкстемантень, кона седе а ков лади неень шкантеньгак, – «Кода ванстомс шумбрачинть?». Зярыя саевкст арсетяно максомс течинь номерсэнть.

✅Чить удомась канды лезэ

Ней студентэсь-медикеськак соды, сиземась «тоци» ломаненть нардензэ, ды сон лиятнеде седе сеедьстэ ормалгали эрьва кодамо ормасо. Бути арась шканк аламос сутямовомс чинь куншкат, мадеде куш вейке часос ужинамодо икеле. Вейке час ужинамодо икеле ды кото част веть – знярс удомась канды ков седе покш лезэ сень коряс, зярдо ломанесь апак сыргозе уды кавксошка част.

✅Мезде сизи ломанесь

Весемеде сеедьстэ ломанесь сизи амезень теемадо. Истямо шкасто ломаненть мельс сыть эрьва кодат апаро мельть-арсемат. Сонензэ маряви, буто сонзэ а ловить ломанекс, тевесь, конань сон топавты, маряви тензэ а эрявиксэкс. Ломанесь истямо шкасто нурьгами, маштыть виензэ. Тарка лангс мадемстэ рунгонзо мари, теке мерят, канаскадозь ды чувтомозь.

✅Кода ютавтомс сиземанть

Васняяк, эряви кепедемс рунгонть, озамс чевте таркас, нежедемс кутьмеренть, пекстамс сельметнень ды эсь пачканк меремс: «Оймседе сэтьместэ, илядо пштилгавтне вановтонк, илядо сормсевте конянк». Неть валтнэнь ёвтнеде састо минутань перть. Истя жо эряви теемс улонть, чаманть, кирьганть, лавтовтнень, сантнэнь ды весе рунгонть марто. Марясынк, кода та-кинь чевте кедть кармить панеме сиземанть.

✅Эрядо псака ладсо

Ней ледстинк, кияк зярдояк некшнесь сизезь псака, кона тень кувалма апаргадоволь, кармаволь кайсевеме весень лангс, конанень аволь педя удома? Арсетяно, кияк эзь вастне истямо псака. Псаканть а ризнэвтить мелявкст ды секс сонзэ а эрсить пекень-пуярмонь ормат. Тонадодо стувтомо апаротнень, ливчакавтнеме рунгонть псака ладсо ды тынь ванстсынк эсь прянк ламо зыянтнэнь эйстэ.

✅Ярсак паро ёжосо

Ней весе содатано, кодамо ёжосо озат ярсамо, истямо карми сонзэ лезэзэяк. Бути ломанесь сизезь, сэреди, таго-мезде пели, мезе-бути ризнэвти эйсэнзэ, мелявтовты, кияк те шкастонть кежензэ савтынзе, апаро мельть эйсэнзэ пиштевтить, кельмесь косояк ды козома саизе, маштыкс тапи эйсэнзэ – весе те парс а пачти. Лиякс мерезь, весе тень кувалма ярсамопелесь а канды лезэ ломанентень. Истямо шкасто ломаненть пуярмозо а карми максомо сатышка «сельге» ды сэпе, конатне лездыть «пидемс» ярсамопеленть. Ярсамопелесь карми аштеме коськестэ, наксады-пустни, тень кувалма ломанесь карми якамо вецанасто эли карми марямо прянзо, теке мерят, пуярмозо эцезь таго-мейсэ калгодосо.

Тень а нолдамга тееде истя:
• столь экшсэ пеедькшнемась лезды панемс сиземанть, шождалгавтомс ойменть ды оймавтомс эсь прянть;
• марятадо сэредькс, маштыкс эйсэнк тапи, тевелявонк-мезенк таргозезь, сестэ седе паро ули а ярсамс;
• сёвныде киньгак марто ды тень кувалма пек апаркстомиде – илядо пеле а ярсамс семс, зярс а оймавттадо;
• сизиде, ярсамо озамодо икеле аламос оймседе.

Ламо сэват – стакасто якат

Зярдо ломаненть сталмозо зярыя килодо седе стака, ней тень ловить ормакс. Мекс? Ломаненть рунгосо эрьва килограммас эрявить ниле килот (1) капиллярт, конатнева седеентень эряви панемс верь, мезенть туртов ютавтови ламо вий. Секс снартнеде столь экшстэ стямс, кода мерить, «шожда пексэ», илядо учне, зярдо стакалгадтадо.
Лишной сталмось пек покш зыян канды гипертониктненень. Терявтодо берякадомс вана истя. Кавто недлянь перть чизэнзэ колмоксть ярсамодо икеле симеде ансяк педязь чурька-капста ведь (1:1) ды 30 минутат ярсамодо икеле пинеме-овтумарь марто лакавтозь ведь. Те шкастонть седе аламо ярсадо сывельде, почтсто панезь прякадо-сюкородо ды ламбамодо, ды эрьва чистэ чокшне якадо васня апак капша, мейле седе эрязасто часонь перть. Истямо ладсо ковозонзо «правттадо» 10-15 килот сталмо.

✅Козоманть каршо

Эмалировазь кастрюляс каямс стопка ловсо ды покш пенч шалфей. Пекстамс, лакавтомс састо палыця тол лангсо, мейле педямс. Таго лакавтомс. Симемс псистэ мадемадо икеле.

Раиса Щанкина
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».