Четверг, мая 06, 2021
Важное

Сынст панемс кудазораватне аволь вейке недля таштыльть алт, топо, ой, ды столь лангс неть тантей прякатне путовильть пек покш чистэ. Каймаконь, эли, лиякс меремс, панжакаень анокстамо-панема лувось эрьва семиясонть ванстовсь пингеде-пингес: аватне тонавтылизь сынст панеме тейтерест, тонатне – эсест эйкакшост.

А мезть сёпомс, а весе аватне эрзянь велетнесэ ней ледстясызь неть панжадо прякатнень панема лувост, ды озямскак мартост ламо шка эряви, истя кортыть сетне, конатне зярс содасызь анокстамо коенть. Нузялгадынек, нать, седе шожда молемс лавкав ды рамамс анок тантейкат, конатнес кияк эзизе путо оймензэ, ды теезьгак сынь кие-соды мезде. Мелезэнь те шкас ледстявить эйкакшпорань валскетне, зярдо бабам уштыль каштомо, училь, зярдо пенгетне весе палыть, нардылинзе куловтнень ды каиль явавтозь каштомонтень покш чугунонь вельтямка лангсо нилешка-ветешка каймакт. Кода паро ульнесь ваномс липниця толнэтнень лангс, учомадонть «нильнемс келенть», никсемс качамонь ды модамарень чиненть… Седеяк пароль, суронь пицезь, автордамс пси каймаконть ды куроксто сэвемс кельме чапамо ловсо марто. Нейгак истят «седеень витиця» чить эрсить, зярдо сатано аванень инжекс, ансяк ёжомарямотне уш лият, эдь эйкакшпорасто весемесь маряви седе тантеекс ды эрьва паро ледстнемась моли ёвкс ёнов.


Отяжеле посёлкань эрицясь Валентина Кучаева (тейтерькс Милкина) истя жо мельспаросо ледстни вишка шканзо ды арси, сонензэ панемань-пидемань ёрокчись ютась вечкабабанзо пельде (истя мерить Отяжеле ёнксонь эрицятне аваст ёндо сырькайтненень), кона лововсь велень «стряпчеекс». Валентина чачсь-кассь Низовка велесэ, мейле лиссь мирденень Чукалосто цёра экшс ды уш зярыя иеть эри Отяжелесэ. Сисем иестэ саезь Валентина кургонь автезь вансь, кода сырькаезэ пани прякат, ичи розень кши, керси лапшерникень пачалксеть. Вечкабабавтомонзо вейкеяк покш чи велесэнть эзь юта.

Кудазораватненень, конатне содыльть свадьбань эли ледстямо чинь каванямонь койтнень, эрзянь велетнесэ мерильть «каштомбабат» ды сынст валост пидема-панема кудосонть ульнесь меельцекс. Зяро сал каямс, кода ламбаськавтомс, зяро шка пидемс – сынь содыльть весементь. Сакшныльть Валянь вечкабабанстэнь энялдома марто велень прявттнэяк: эрявсь сеедьстэ панемс кши, теемс поза покш инжетнень туртов... ды зярдояк стряпчеесь эзь моле каршо. А эдь кудазораватнень тевест сеть шкатнестэ певтемельть: пиреть, тингеть, скалт, реветь, ламо эйкакшт – ялатеке весементь теемс-топавтомс кенерильть. Валентина эйкакшпорасто саезь превзэнзэ «чапинзе» весе панемань-пидемань лувтнень, мейсэ пек кенярдовтызе вечкабабанзо.
Низовкасо каймактнеде-панжакайтнеде мерить модамарень прякат. Кучаевтнень семиясо жо сынст лемдизь «вечкабабань прякакс», ды ней сынст панемась теевсь паро коекс. «Вейкеяк кенярксчи минек кудосо а юты неть прякатневтеме, – ёвтни Валентина Кучаева. – Пансян мон сынст покштянь-бабань, тетянь-авань ледстнема читнестэяк, явшан эйсэст роднятнень-раськетнень, ялгатнень-оятнень кедьга. Прям апак шна мерян, мон вечкан панеме ды аволь ансяк прякат-сюкорот. Вишкапингстэ саезь панян тортт, эрьва кодат десертт. Сырган яла ошов инжекс, тосто гайневтить: учотано эйсэть тантей каванямка марто. Сави панемс пачалксеть ды ускомс кастрюлясо лапшерник эли путомс чапавтомо ловсо. Каванявксон шныть ды эштё вешить».

Бути кияк арси, Валентина кочкизе эстензэ пидицянь профессиянть – се маняви. Кучаева школадо мейле зярыя иеть роботась библиотекасо ды ней уш сизьгемень иеть важоди Отяжелень сывелень комбинатсо сюлонь-пекень цехсэ формовщицакс. Профессиясь васоло кулинаронь эли кондитерэнь тевтнень эйстэ ды пек стака. Савкшны важодемс чинек-венек, ансяк мезе парось, мейле максыть оймсема чить. Те шкастонть авась кундыяк эсь вечкевикс тевтнень тееме ды сынст ютксо аволь ансяк панемась-пидемась. Валентина дока пангонь кочкамосо ды цецянь кастомасо, содасынзе Низовкань ды Чукалонь виртнесэ весе пангонь таркатнень, а стяко тензэ мерить «пангобаба». Зяро салтовкст сон теи теленень – а лововитькак! А кудоикельксэзэ Валентинань кизна ёми эрьва кодамо тюсонь цеця потс: сынст кастомась а маряви тензэ мелявксокс, ды зярыя иеде теде икеле Кучаевтне лисекшнесть изницякс «Сехте паро кудоюрт» райононь пелькстамосонть.

Валентина аволь ансяк паро ни, кудазорава, сон вечкиця ава ды сырькай: трясь-кастсь кавто тейтерть: Аленань ды Юлянь, ней весе седейлембензэ максы Руслан нуцькинензэ туртов. Николай мирдезэ сеедьстэ ардтни Московов важодеме, сестэ сынь кадновить кудос колмонест: Валентина, Руслан ды ававтозо – Люба баба. Весе историятне ававтонь ды урьвань аладямодо аволь сынст ланга. Сындест те валмеревксэсь: «Сынь эрясть пек вадрясто, теке псакинеть Мастясто». Ве кудосо ававт-урьват эрить 32 иень перть ды зярдояк эзть ёвта вейкест-вейкест туртов берянь валт. «Салаваксчи, – корты Валентина, – теньсэ кодамояк арась, ансяк эряви вакссот эрицянть ломанекс путомс. Кезэрень пингестэ жо авань ды ававтонь мельваномась тейтертнень-урьватнень туртов ульнесь васень тевекс».
Валентина мелявты, эрзянь раськенть седикелень коензэ-кирданзо семиясо эрямонь, панемань-пидемань коряс иестэ иес ёмить-стувтовить, ды авась седейшкава кази каймаконь-панжакаень, эли модамарень прякань (кие кода тонадсь мереме) панема лувонть минек газетань весе ловныцятнень туртов. Панеде мельспаросо ды пачтинк эйкакшонк ды нуцьканк туртов!

Каймак кургине – истя мерить эрзятне сеть ломантненень, конатне вечкить тантейнестэ ярсамо, эли эйкакштненень, конатне а весе ярсамкатнень вечксызь ды бажить ансяк ламбамос. Панжакай – прякадонть истя мерить а стяко, эдь сонзэ топозо ашти чапаксонть лангсо – панжадо, апак кекше потс.

Кода панемс каймак?

Эряви саемс кемень прякас: 100 граммат оргат, седе паро ули, бути аволь коськеть, истят, конатне микшневить вишка палнэсэ; 3-4 стопкат лембе ведь; покш пенч сахар; аламошка сал; 9 стопкат почт ды вейке стопка чиньжарамо ой. Човорямс ды кадомс кепетеме.
Те шкане ванськавттано ведра модамарть ды пидесынек сынст сал марто. Сайтяно вейке пачка велькс ды 2-3 пачкат скалой (седе ламояк мереви) ды човорясынек модамартнень марто. Кие вечки, каи зярояк ловсосто анокстазь топояк.

Саемс чугунонь пачалгот ды явномс чапаксонть кругомгаст. Верьга кайсесынек модамарень топонть ды путсынек прякатнень явавтозь каштомс эли 220-230 градусос эждезь пси духовкас 15-20 минутас. Зярдо каймактне кармить верьга тюжалгадомо, таргасынек ды ваднесынек верьксэст икелев анокстазь истямо човорявкссо: 3 алт, пельпенч чиньжарамо ой ды 3 пенчть ловсо.

«Каймак» валось саезь тюркской кельстэ. Каймакось татаронь, узбекень, башкирэнь раськетнень туртов овсе аволь модамарень пряка. Истя мерить пидезь вельксэнтень, конанть мейле кельмевтьсызь ды ярсыть пси кшинть лангс ваднезь.

Марина Девятова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».