Дубёнкань районсо ней арась вейкеяк ломань, конась бу а аштевель покш каштанчисэ землякост Давид Малыйкинэнь кувалма. Кудосо, лавкасо, важодема таркасо – весе кортамотне Орданьбуе (Ардатово) велень цёрадонть, Россиянь Геройденть. Велень школасонть, конань прявтсо Алена Владимировна Еряшева, уш анокстыть Героенть лемс выставка, козонь Малыйкинэнь авазо Анна Васильевна кандсь эйкакшпорань ды армиясо служамонь фотографият.
Минь сюлмавинек школань прявтонть марто, ды сон ёвтнесь тенек, кодамо семиясо чачсь-кассь Давид, кодамокс сон ульнесь школасо тонавтнемстэ:
– Давид Малыйкин чачсь 1994 иень сентябрянь 14-це чистэ минек велесэ. Тетянзо-аванзо Алексей Егоровичень ды Анна Васильевнань сон омбоце эйкакш. 2000 иестэ Давид тусь 1-це классос ды вейксэ иень ютазь кармась тонавтнеме Дубёнкань Аграрной техникумсо. Сонзэ прядомадо мейле цёрась сеске тусь армиясо служамо. Эйкакш шкасто Давид явовиль эсь ялганзо ютксто виздиця, сельмес а эциця, а покшкавтниця обуцясонзо, ансяк сон свал аноколь лездамс эсь ялганзо туртов. Цёрынесь явсь мель спортонтень, сехте пек шожда атлетикантень. Армиядо мейле Давид сёрмадстсь контракт ды сюлмизе уцясканзо тиринь масторонтень служамонть марто. Зярдо сон сакшны кудов роднянзо-раськензэ содавтомо, свал совси школав, кортни тонавтыцянзо ды, васняяк, классонь руководительницанзо О.В. Савельева марто. Кудосо жо васенцекс лезды тетянзо-аванзо туртов, эдь сынст семиясь кирди хозяйства, кода весе велень эрицятне. Малыйкин – ламо эйкакшонь триця семиясто, сонзэ ули покш патязо Надежда ды веженсь ялаксозо Егор, кона тонавтни 9-це классо. Арсетяно, ней лелязо сонзэ туртов карми седеяк покш примерэкс, кода кармась минек велень весе цёрынькатнень ды весе масторонь эрицятнень туртов.
Минь аштетяно покш каштанчисэ земляконок кувалма! Каземань торжественной церемониянть ваномсто, истямо покштояк покш лементь максомсто, минек школань тонавтыцятнень эзть кирдеве сельведест. Апокшке велестэ простой эрзянь цёрась кортась весе ойместэ ды токинзе ламонь седеест.
Неть читнестэ мон ёвтынь телефонсо тензэ поздоровт истямо покш награданть кувалма ды тердия тиринь школав. Давид мерсь, ансяк карми юткошказо, сон сы миненек ды вастови тонавтыцянзо ды эйкакштнень марто. Эсень ды школань весе коллективенть пельде минь эштё весть бажатано ёвтамс тензэ лембе валт, арсемс кеме шумбрачи, уцяскав эрямо ды кадык ванстыця Ангелэсь свал ули мартонзо.
Алена Еряшева ёвтнесь тенек, те наградась савсь Давидэнь аванзо Анна Васильевнань чачома чинзэ каршо ды кармась тензэ покш казнекс. Ванды, декабрянь 15-це чистэ, сон тешксты 55 иетнень. Ды миньгак эсенек пельде бажатано ёвтамс поздоровт эрзянь аванть туртов, кона кастсь алкуксонь герой. Анна Васильевна эрьва чистэ кортни цёранзо марто телефонсо ды, нама, васенцекс, ёвтась поздоровт седейпелькскензэ туртов. Талномадонть авась авардезевсь, ды Давид, кода маштсь, оймавтсь аванзо. Ней Анна Васильевна Малыйкина аноксты килангов, эдь Давид тердинзе Од иестэ аванзо, сазоронзо ды ялаксонзо инжекс Псков ошов, косо сон эри нинзэ ды тейтерьканзо марто.
Марина ДЕВЯТОВА
Фототне Малыйкинтнэнь семиянь архивстэ