Арась Орозбиесэ вейкеяк ломань, кие а содасы Луконь Агань (Луконь – кезэрень кудолем). Те мендявозь кутьмере бабинентень топодсть вейксэньгемень ниле иеть. А вана кода вечкить кортамо велень эрицятне: «Вейксэньгемень нилетне ансяк паспортсонзо, оймезэ од тейтерень».
Зярдо вастовинек Ага баба марто, сон аштесь озадо каль ало пенгестэ теезь озамопель лангсо ды кедьсэнзэ якавтсь чувтонть ланга.
– Ванат, шабракай, кодамо сёргов-моргов рунгозо, те корты вейкеде – иензэ сядо, паряк, седеяк ламо. Кирдажом, – пейдезь корты бабась.
Ага баба марто теевинь содавиксэкс лавсьсэ. Авань валонзо коряс, шабрась свал лездыль сырькаень туртов эйкакшонь ваномо. Эрьва чи сыль тенек. Мельс ледстяса, кода минь сазоркан марто кургонь автезь кунсолынек сырькайтнень, а сынь чинь-чоп ёвтнильть тенек кезэрень шкадо ёвкст ды морсильть нурькине морынеть. Вадрят ульнесть шкатне…
Чачсь-кассь шабрань бабинесь, Агафья Антоновна, Орданьбуе ёнксонь Орозбие велесэ 1929 иень февралень 18-це чистэ сокицянь-видицянь семиясо. Тетянзо-аванзо свал важодсть колхозсо. Семияст ульнесь покш (кавто ялаксонзо ды колмо сазорканзо). Войнадо икелень эйкакштне трявсть-кастовсть вачочисэ ды арасьчисэ, секскак кавто ялаксонзо чачомадо мейле сеске кулость. Семиясонть кадовсть «пацянь ниле кандтницят». Школав молема шканть бабась ледстнесы мельтеме.
– Прядынь ансяк ниле класст. Сёрмадомо, ловномо тонадынь ды саты. Тонавтнемась марявсь пек стака тевекс, ульнесь омбоце тувталгак – арасель оршамопелесь. Варяв карьсэ тельня овсе арасель мель ковгак сыргамс. Тень кувалма тетям-авам кардымизь тонавтнемадонть. Шкань ютазь апак учне сась самай покш зыянось – войнась, сонзэ ушодомадонзо мейле прядовсь эйкакшпингесь… – ледстни бабась.
Войнась ламо мезе нельгсь ломантнень кедьстэ. Кинь ярсамопелензэ, кинь кудонзо, а вана ламотнень сехте питнеенть – эрямонть. Ансяк Агафья Антоновнань семиянзо Пазось ванстызе.
– Ризкстэ пешксельть войнань иетне. Стака сеске муемс валт, кода печтинек те шканть… Сюкпря Пазонтень – коняс палымим. Войнань шкасто, ледстясынь мельс авань валонзо, скалось минек тримизь-андымизь. Бути а сонзэ оезэ, топозо ды ловсозо – венстявлинек пильгенек сеске. А зяро марчонь кши сэвезь, а пиципалаксонь сюкорот, а зяро тикшелопань чай симезь, зяро вирьстэ пенгеть анокстазь. Мельс ледстяса, кода вирьстэ кудов ускилинек эсенек лангсо пенгетнень. Лиясто кельмат, сизят, ансяк ванат, кода седе покш сазоркатне пряст ветить, ды мельгаст ютат тонгак. Весть пурдават эрямонь килангсто – мекев пек стака видемтемс кутьмеренть, – ледстни бабась.
Эряви меремс, Ага баба течинь чис эрьва кизэ аноксты тикшелопат, штобу телень перть улезэ мезе марто симемс чай. Шабрась а бажи симемс рамазь чайде, корты, неть «ядохимикаттнэ» ансяк рудазкавтыть Пазонь максовт ашо рунгонок.
– Сехте тантей чаесь – мятань, чайтикшень (зверобой) ды кстый лопань. А зяро эйсэст витаминт! Лиясто кельмевтьсыть пильгеть эли кедеть, педи эйзэть коське козома, тон, нуцькинем, корштак одажа лопань эли пекше тветкань чайде, ёжот виеми. А бути марят прят ёмавтозь, симть пейделькань чай, апаро мельтне сынсь нардавить. Раужо шукшторов лопатне вадрят судокстомсто, атямарень ды умаринань лопатнестэ чаесь вадрясто кепеди гемоглобинэнть. Тикшелопатнеде байтяк ды эрьвась канды кодамояк лезэ, – тонавты бабась.
Зяро иеть эрятано шабрацек, содан, церьковасо вейкеяк служба сырькайтементь а ютни, кадык пильгензэ сэредить, сон ялатеке, сэредьксэнь пачк, юты Пазонть марто кортамо. Зяро вийть те ломаньсэнть!
Зярдо кевкстия: мейсэ кувака эрямонь сонзэ салавачизэ? Бабась ансяк пейди каршон: «Паряк, сеньсэ, нуцькинем, мон ней уш кодгемень иеть а ярсан кодамояк сывельде ды зярдояк а ярснян рамазь ярсамопельде!» Те абунгавты.
Ансяк эряви меремс, ломантне, конатне алтыть эсест эрямост Пазонть туртов озномантень, свал истя тейнить. Видьстэ меремс, сынь пингень перть кирдить «пост».
Бути кортамс Пазонтень озномадонть – те Ага бабань сехте вечкевикс ды прявт тевезэ. Сонзэ топавты эрямонзо перть. Истя лиссь: эйкакшпингенть сэвизе войнась, а тейтерьксчись алтазель тетянень-аванень лездамонтень, важодсь апак лотксе, зярыя иеть варчнизе прянзо торфонь таргамосояк. А вана мирденень эзь лисне.
– Ськамон мон. Эдь Пазонть валонзо-тевензэ мельгаяк якицят эрявить. Мон течинь чис кирдян Пазонть икеле валон – эрян ськамон, ламо ознан – те монь седейвитемам ды эрямонь сехте прявт тевем. Пазось тонавты минек вечкемс эрямонть, эсь прянть, пертьпельксэнть ды малавикс ломантнень. Учан вана, зярдо минек ойме лангсо Прявтось тердьсамам модалангсто кудов. Ламо иеть цидярдан, мелесь уш мольсь, – пейди бабась.
Эряви содамс, сырькаесь эрьва Инечистэ ды Троицясто наряжасы кудонзо цецясо-тарадсо. Истя кезэрень койтнень коряс васты покш читнень. Ванстовсть сонзэ пазава икеле понгавтозь гульканзояк. Кияк а соды, зяро иеть неть чувтосто керсезь нармушкатне аштить пазаватнень икеле.
Мон, кода од ломань, нама, а чарькодян, кода шабра сырькаесь пингензэ перть эри телевизортомо. Неень шкане эрьва кудосо ули те «бизныця мекшесь». А сонзэ арась.
– Идемевсень тев те телевизорось. Пек ацирьгалян вишка эйкакштнень кисэ, конатне ансяк чачить, ды тетятне-аватне сеске озавтсызь телевизор икелев. Арази те тев?! Ансяк чачозь, сельмест коласызь. Мон мерян истя: тонавтодо эйкакштнень Пазнэнь озномо, паряк, модалангонь эрямось полавтови – карми седе вадря, – корты сырькаесь.
Ага баба мельс ледстизе, кода аволь весть эрямось налксесь мартонзо зыянонь кандыця кельсэ, ансяк сон эзизе максо прянзо изнямс ды течи вана ёвтни тень, кодамо тамашас понгонесь одсто.
– Ней, нама, пейдян те ледстнеманть лангсо, а се чистэнть арсинь, оймем кадызе рунгом. Кода свал, семиясонть сехте одось эрьва чистэ моли скалонь ваномо. Се валскестэнть ажиятне прасть монь лангс. Якинь-пакинь скал мельга, сизинь ды сась мель поладомс валскень сезезь удоманть луга лангсо. Кувать эзинь кавтолдо, кода улемс порниця скалонть марто – содыя пиксэнзэ пильгезэнь ды теке марто тантейстэ матедевинь. Шкань ютазь стявтымим скалонь гайтев мукснемась. Сельмень панжинь – а скалонть кавто перька аштить верьгизт. Секень вант, кирьгас тензэ кирнявтыть ды повасызь. Мон, кувать апак арсе, юкштадинь апокшке локшосон, скалось тандадсь ды кода ношкстась кудо ёнов, монь жо модаланга усксь мельганзо. Сюкпря Пазонтень, кудось маласоль, а кувать усксь эйсэнь мельганзо. Ней мельс а леди, кода мон таргия зепестэнь вишка пееленть, конасонть керия пиксэнть. Сельмень эзть редя, кода чиинь, а верьгизтнэ, нама, мельган. Кудораськетне маризь пижнематнень ды идимизь порицятнеде сянгосо. Истя вана оргодинь куломадонть, – ледстни бабась.
Ага бабань лангс ванозь, чачи мель варчамс эрямо сырькаенть обуцянзо коряс – рунгонь ды седеень кунсолозь. Кие соды, паряк, самай теньсэ кекшезьгак кувака эрямонь салавачись.
Алена Артемьева