Тедедень январьстэ топодсть 45 иеть, кода Раиса Андреевна Малафеева важоди Отяжбуень Ахматова велень клубонь прявтокс. Те Культурань кудось – Отяжбуень Раськень культурань ды ремеслань центрань филиал. Эрзянь авась весе эрямонзо алтызе велень культурань кепедемантень. Клубось теевсь эрицятнень вечкевикс таркакс, ков сынь пурнавкшныть эрьва кенярксчистэ.
Раиса Андреевна чачсь Отяжбуень Киржеман велесэ. Семиясост пек вечксть морамо. Тетязо ды кавто лелянзо седясть гармошкасо, авазо ды сазоронзо-ялаксонзо парсте морсесть. Вишка Рая эйкакш пингестэ саезь, малавикстнэнь лангс ванозь, кармась киштеме ды морсеме. Школасояк морсесь эрьва кенярксчисэ, тердтнесть клубовгак. А уш мейле истя лиссь – сценась ды клубось кармасть эрямонь тевекс. Раиса Андреевна морси эрзянь ды рузонь морот, сонзэ кунсоломсто кияк а кадови мельтеме, весе цяпить, пильгетне, секень вант, туить киштеме.
Школань прядомадо мейле Раиса Андреевна тонавтнесь Орданьбуесэ бухгалтерэкс. Специальностень коряс эзь саво роботамс. Сон 1981 иестэ саезь важоди Ахматовань велень клубсо. Мирдензэ Иван Анатольевичень марто вейкест-вейкест вастызь-муизь Целпанвелесэ школасо тонавтнемстэ. Иван Анатольевич ульнесь музыкантокс-самоучкакс, сонсь тонадсь седямо баянсо ды гармошкасо. Од шкастонзо пек бажась молемс тонавтнеме музыкантокс. Ансяк эзь лисе тевезэ, малавиксэнзэ потавтызь. Церась эзь карма нусмакалеме, озась тракторонь руль экшс ды пингензэ перть важодсь механизаторокс. Сон ульнесь кеме нежекс нинстэнь. Концертсэ сынь свал вейсэ лиснесть сцена лангс, Раиса Андреевна моры, Иван Анатольевич седи.
Ризксэнтень, 2008 иестэ мирдезэ тусь эрямосто, Раиса Андреевнань оймезэ те шкас а оймави, ризны тень кувалма. Ялатеке эрямось моли седе тов, а кармат кекшнеме кудосо.
Раиса Андреевна умок пурнась «Селяночка» ансамбля, аватне ламо иень перть кецявтыть моросост эсь велень эрицятнень ды инжетнень. Ансамблясь ламоксть ардтнесь Мордовиянь велетнева концерт марто, эрьва косо вастыть лембестэ. Аволь весть велень аватнеде сермалесть «Вперед» райононь газетасо. Сонсь Раиса Андреевна кувать ульнесь Отяжелень райононь Культурань кудонь «Родные просторы» ветеранонь народной хорсо ды лия сводной хорсо морсицякс. Ламо иень перть парсте важодеманзо кисэ ды культурантень покш путовксонть кисэ казевсь эрьва кодамо наградасо. Седеяк пек кецявтыть сонзэ сюкпрянь лембе валтнэ, конатнень евтыть тензэ ломантне седеень эждиця моронзо кис.
Раиса Малафеевань туртов клубось – омбоце кудозо. Тосо панжсь натой вишка музей, пурнась велень эрицятнень кедьстэ кезэрень курмот-кармот. Мельсэнзэ-превсэнзэ ламо бажамот, од тевть, конатнень эрявить топавтомс. Мартонзо вастовомсто весе кортамотне ансяк клубто ды культурань кулятнеде.
Теевсь паро коекс тешкстамс Ахматова велень клубсонть Авань чинть, Од иенть, Татьянань чинть, Февралень 23-це чинть, Мартонь 8-це чинть, Мастянть. Ломантне учить покшчитнень, паро мельсэ сакшныть. Майстэ Изнямонь чинтень свал юты Ине Отечественной войнасо чавовозтненень кеврунгонть вакссо митинг. Покшчитнень анокстамось весе ашти Раиса Андреевнань лангсо. Истя жо сон ютавтни шахматсо налксемань коряс турнирт.
Малафеевтнень семиясо весе вечксызь творчестванть. Цераст ды тейтерест прядызь Н.П. Огарев лемсэ МГУ-нь Национальной культурань институтонть. Екатерина тейтерест ды Сергей мирдезэ эзть туе творческой кияванть, ансяк а менстить культурань кодамояк кенярксчи. А вана Алексей цераст – «Умарина» киштемань ды морамонь государственной ансамблянь хормейстер, хоронь артист, сон – МР-нь заслуженной артист. Ольга низэ вети А.С. Пушкин лемсэ Раськень библиотекасо книгань палатань отделэнть. Раиса Андреевна ашти мельспаросо церанзо кувалма, сонсензэ ды мирдензэ арасть музыкальной образованияст, Алексей топавтынзе мелест!
Малафеевтнень кецявтыть вете нуцькаст, чачсь правнуцькаст, сыньгак сюлмавозь культуранть марто.
Ксюша яксесь «Валдоня» киштемань народной ансамбляв ды театральной студияв. Наташа истя жо киштсь «Валдонясо» ды Кира Черданцевань лемсэ «Каблучок» раськень киштемань ансамблясо. Маша ней кишти «Валдонясо». Церынетне-нуцькинетне – Дима ды Андрей, тонавтнесть фольклоронть А.А. Цветков лемсэ искусствань гимназиясо (Подмосковьясо).
Ксюшань мирдезэ – Артем – военной, ансяк юткошкасто пек вечки яксеме культурань кенярксчитнес. Сехте вишкинесь, Василиса правнуцькась, уш нейке невти прянзо: кишти, морси – лиясто чарькодеви мезде, лиясто – эсензэ, эйкакшонь кельсэ.
Те семиянть вельде неяви, кода морамонтень вечкемась, талантось ютыть покштясто-сырькайстэ саезь – эйкакштненень, нуцькатненень ды седе тов. Вейсэнь вастовоматнесэ сынь, нама, морсить, кортыть минек культурадонть ды искусствадонть. Весе вейкень-вейкень чарькодить, эрьвась важоди культурасо, роботы ломантнень марто. Валост коряс, мельсэст свал кирдить неть валтнэнь: кадык эрьва ваныцясь концерттэ мейле туи седеень витезь, паро ежосо.
Раиса Андреевнанень евтатано седейшкавань лембе валт – сон 45 иеть вети творческой тевензэ. Уледе шумбра, уцяскав, вечкевикс! Кадык топавтовить меленк-бажамонк, велькссэнк карми валдо менель! Кадык малавиксэнк ансяк кецявтыть!
Татьяна Маторкина